ಭಾರತದಲ್ಲಿ ತಯಾರಾಯಿತು covid-19 ಲಸಿಕೆ: ಫೆಬ್ರವರಿಯಲ್ಲಿ ಲಭ್ಯ!

ನವದೆಹಲಿ: ಭಾರತದಲ್ಲೇ ತಯಾರಿಸಿದ ಕೋವಿಡ್ 19 ಸೋಂಕಿನ ಲಸಿಕೆಯು ಮುಂದಿನ ವರ್ಷ ಅಂದರೆ 2021 ರ ಫೆಬ್ರುವರಿಯ ಆರಂಭದಲ್ಲಿ ಲಭ್ಯವಾಗುವ ಸಾಧ್ಯತೆಗಳಿರುವುದಾಗಿ ವಿಜ್ಞಾನಿಗಳು ತಿಳಿಸಿದ್ದಾರೆ.

ನಿರೀಕ್ಷೆಗಿಂತ ಒಂದು ತಿಂಗಳ ಮುನ್ನವೇ ಕೋವಿಡ್ ಲಸಿಕೆ ಲಭಿಸುವ ಸಾಧ್ಯತೆ ಇದೆ.ಅಂತಿಮ ಹಂತದ ಪ್ರಯೋಗದಲ್ಲಿ ಈ ಲಸಿಕೆ ಸುರಕ್ಷಿತ ಮತ್ತು ಪರಿಣಾಮಕಾರಿ ಎಂಬ ಅಂಶ ಕಂಡುಬಂದಿರುವುದಾಗಿ ಸರ್ಕಾರದ ಹಿರಿಯ ವಿಜ್ಞಾನಿ ರಾಯಿಟರ್ಸ್ ಗೆ ತಿಳಿಸಿದ್ದಾರೆ.

ಕೇಂದ್ರ ಸರ್ಕಾರದ ಇಂಡಿಯನ್ ಕೌನ್ಸಿಲ್ ಆಫ್ ಮೆಡಿಕಲ್ ರಿಸರ್ಚ್ (ICMR) ಜತೆಗೂಡಿ ಖಾಸಗಿ ಕಂಪನಿಯಾದ ಭಾರತ್ ಬಯೋಟೆಕ್ (Bharat Biotech) "ಕೋವ್ಯಾಕ್ಸಿನ್" ಲಸಿಕೆಯನ್ನು ಅಭಿವೃದ್ದಿಪಡಿಸಿದ್ದು, ಈ ಲಸಿಕೆ 2021ರ ಏಪ್ರಿಲ್ ನಂತರ ಲಭ್ಯವಾಗುವ ಸಾಧ್ಯತೆ ಇದೆ ಎಂದು ಈ ಮೊದಲು ತಿಳಿಸಿತ್ತು.

ಕೋವಿಡ್ ಗಾಗಿ ಸಿದ್ಧಪಡಿಸುತ್ತಿರುವ ಕೋವ್ಯಾಕ್ಸಿನ್ ಲಸಿಕೆ ಪ್ರಯೋಗದಲ್ಲಿ ತುಂಬಾ ಪರಿಣಾಮಕಾರಿ ಫಲಿತಾಂಶ ಕಂಡು ಬಂದಿರುವುದಾಗಿ ಐಸಿಎಂಆರ್ ವಿಜ್ಞಾನಿ ರಜನಿಕಾಂತ್ ತಿಳಿಸಿದ್ದಾರೆ. ಈ ನೂತನ ಲಸಿಕೆ ಮುಂದಿನ ವರ್ಷ(2021) ದ ಫೆಬ್ರುವರಿ ಅಥವಾ ಮಾರ್ಚ್ ನಲ್ಲಿ ಲಭ್ಯವಾಗುವ ಸಾಧ್ಯತೆ ಇದೆ ಎಂದು ಹೇಳಿದೆ. ಆದರೆ ಈ ಬಗ್ಗೆ ಭಾರತ್ ಬಯೋಟೆಕ್ ತಕ್ಷಣಕ್ಕೆ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ ಎಂದು ವರದಿ ಹೇಳಿದೆ.ಒಂದು ವೇಳೆ ಫೆಬ್ರುವರಿಯಲ್ಲಿ ಕೋವ್ಯಾಕ್ಸಿನ್ (vaccine) ಲಸಿಕೆ ಬಿಡುಗಡೆಯಾದರೆ ಮೇಡ್ ಇನ್ ಇಂಡಿಯಾದ ಮೊದಲ ಲಸಿಕೆ ಲಭ್ಯವಾದಂತಾಗಲಿದೆ ಎಂದು ವರದಿ ತಿಳಿಸಿದೆ.