ನಾವು ಉರಿ-ನಂಜುಗಳನ್ನು ನೀಡುವವರಲ್ಲ, ಭವಿಷ್ಯ ನೀಡುವವರು: ಕಾಂಗ್ರೆಸ್

ಬೆಂಗಳೂರು: ನಾವು ಉರಿ, ನಂಜುಗಳನ್ನು ನೀಡುವವರಲ್ಲ, ಭವಿಷ್ಯ ನೀಡುವವರು ಎಂದು ಬಿಜೆಪಿಗೆ ಕಾಂಗ್ರೆಸ್ ತಿರುಗೇಟು ನೀಡಿದೆ. ಟಿಪ್ಪು ಸುಲ್ತಾನ್ ಕೊಂದವರು ಉರಿಗೌಡ, ನಂಜೇಗೌಡ ಎನ್ನುತ್ತಿರುವ ಬಿಜೆಪಿ ರಾಜಕೀಯಕ್ಕಾಗಿ ಕಲ್ಪಿತ ಹೆಸರುಗಳ ಸೃಷ್ಟಿಸಿದೆ ಎಂದು ಕಾಂಗ್ರೆಸ್ ಆರೋಪಿಸಿದೆ.

ಇದೇ ವಿಚಾರವಾಗಿ ಸೋಮವಾರ ಟ್ವೀಟ್ ಮಾಡಿರುವ ಕಾಂಗ್ರೆಸ್, ‘ನಾವು ಯುವಕರಿಗೆ ತ್ರಿಶೂಲದೀಕ್ಷೆ ಕೊಡುವವರಲ್ಲ, ವಿದ್ಯಾದೀಕ್ಷೆ ಕೊಡುವವರು. ನಾವು ಯುವಕರಿಗೆ ಕೋಮು ದ್ವೇಷ ತುಂಬುವವರಲ್ಲ, ಬದುಕಿನಲ್ಲಿ ಆತ್ಮವಿಶ್ವಾಸ ತುಂಬುವವರು. ನಾವು ಯುವಕರ ಕೈಗೆ ಕಲ್ಲು, ಲಾಠಿ ನೀಡುವವರಲ್ಲ, ಸ್ವಾಭಿಮಾನ, ಸ್ವಾವಲಂಬನೆಯ ದಾರಿ ತೋರುವವರು. ನಾವು ಉರಿ, ನಂಜುಗಳನ್ನು ನೀಡುವವರಲ್ಲ, ಭವಿಷ್ಯ ನೀಡುವವರು’ ಎಂದು ಟ್ವೀಟ್ ಮಾಡಿದೆ.

‘ಯುವಸಮುದಾಯದ ಧ್ವನಿಯಾಗಿ, ಭರವಸೆಯಾಗಿ, ಬೆಳಕಾಗಿ ಕಾಂಗ್ರೆಸ್ ನಾಯಕರಾದ ರಾಹುಲ್ ಗಾಂಧಿ ಇಂದು ಮತ್ತೊಮ್ಮೆ ಕರ್ನಾಟಕಕ್ಕೆ ಆಗಮಿಸುತ್ತಿದ್ದಾರೆ. ಈ ಬಾರಿ ಜೋಡಿಸುವುದು ಛಿದ್ರವಾಗಿರುವ ಯುವಸಮುದಾಯದ ಭವಿಷ್ಯದ ಕನಸುಗಳನ್ನು. ಕತ್ತಲಾವರಿಸಿದ ಯುವ ಸಮುದಾಯದ ಬದುಕಿಗೆ ಬೆಳಕೊಂದನ್ನು ತರುತ್ತಿದ್ದಾರೆ’ ಎಂದು ಕಾಂಗ್ರೆಸ್ ಹೇಳಿದೆ.

ಭ್ರಷ್ಟ ಬಿಜೆಪಿ ಸರ್ಕಾರದಿಂದಾಗಿ ಸ್ಪರ್ಧಾತ್ಮಕ ಪರೀಕ್ಷೆ ಬರೆದ 25 ಲಕ್ಷಕ್ಕೂ ಅಧಿಕ ಪದವೀಧರ ಯುವ ಸಮುದಾಯದ ನಿರೀಕ್ಷೆ ಬತ್ತಿ ಹೋಗಿದೆ. 54 ಸಾವಿರ PSI ಹಗರಣದ ಸಂತ್ರಸ್ತರಿದ್ದಾರೆ. PSI, KPTCL, KMF ಸೇರಿದಂತೆ ಎಲ್ಲದರಲ್ಲೂ ಹುದ್ದೆ ಮಾರಾಟದ ಹಗರಣ. ನೊಂದ ಯುವ ಸಮುದಾಯಕ್ಕೆ ಕಾಂಗ್ರೆಸ್ ಬೆಳಕೊಂದನ್ನು ನೀಡಲಿದೆ. ನಿರೀಕ್ಷಿಸಿ...’ ಎಂದು ಕಾಂಗ್ರೆಸ್ ಟ್ವೀಟ್ ಮಾಡಿದೆ.

ಯುವ ಸಮುದಾಯಕ್ಕೆ ಈಗ ಬೇಕಿರುವುದು ಭರವಸೆ, ಭವಿಷ್ಯ, ಸಂಪಾದನೆ. ಕಾಂಗ್ರೆಸ್ ಈ ನಿಟ್ಟಿನಲ್ಲಿ ಮಹತ್ವದ ಹೆಜ್ಜೆಯನ್ನಿಡಲಿದೆ, ಯುವಕರಲ್ಲಿ ಭರವಸೆ ಮೂಡಿಸುವ ಪ್ರಯತ್ನ ಮಾಡಲಿದೆ’ ಎಂದು ಕಾಂಗ್ರೆಸ್ ಭರವಸೆ ನೀಡಿದೆ.