ಮತ್ತೆ ಶುರುವಾಗ್ತಿದೆ ʼಕನ್ನಡದ ಕೋಟ್ಯಾಧಿಪತಿʼ... ಪುನೀತ್ ರಾಜ್ಕುಮಾರ್ ಬದಲಿಗೆ ನಿರೂಪಕ ಇವರೇ! ಅಪ್ಪು ಪ್ರಾಣಸ್ನೇಹಿತನಿಗೆ ಅರಸಿ ಬಂತಾ ಈ ಆಫರ್!?
ಕರ್ನಾಟಕದಲ್ಲಿ ಅತಿ ಹೆಚ್ಚು ಜನಪ್ರಿಯತೆ ಗಳಿಸಿದ ಟಿವಿ ಕಾರ್ಯಕ್ರಮಗಳಲ್ಲಿ ʼಕನ್ನಡದ ಕೋಟ್ಯಾಧಿಪತಿʼ ಒಂದು ಹೆಜ್ಜೆ ಮುಂದೆಯೇ ನಿಲ್ಲುತ್ತದೆ. ಬಡವರಿಗೆ ಸಹಾಯವಾಗಿ ನಡೆಯುತ್ತಿದ್ದ ಈ ಕ್ವಿಜ್‌ ಕಾರ್ಯಕ್ರಮವನ್ನು ಪವರ್‌ ಸ್ಟಾರ್‌ ಡಾ.ಪುನೀತ್ ರಾಜ್ಕುಮಾರ್ ಅವರು ನಡೆಸಿಕೊಡುತ್ತಿದ್ದರು.
ಆದರೆ ಇದೀಗ ಅಪ್ಪು ನಮ್ಮನ್ನ ಅಗಲಿದ್ದಾರೆ. ಕಿರುತೆರೆಯಲ್ಲಿ ಮೊದಲ ಬಾರಿಗೆ ನಿರೂಪಕರಾಗಿ ಪಾದಾರ್ಪಣೆ ಮಾಡಿದ ಪುನೀತ್ ರಾಜ್ಕುಮಾರ್ ಅವರು, ತಮ್ಮ ಮುಗ್ಧ ನಿರೂಪಣೆಯಿಂದ ಜನಮನ ಗೆದ್ದಿದ್ದರು. ಇನ್ನೊಂದೆಡೆ ಆ ಕಾರ್ಯಕ್ರಮ ಒಂದಷ್ಟು ಸೀಸನ್‌ಗಳ ಬಳಿಕ ಸ್ಥಗಿತಗೊಂಡಿತ್ತು. ಆದರೆ ಇದೀಗ ಮತ್ತೆ ಆರಂಭಗೊಳ್ಳಲಿದೆ ಎಂಬ ಮಾತು ಕೇಳಿಬರುತ್ತಿದೆ.
ಕನ್ನಡಿಗರಿಗೆ ಮೀಸಲಾಗಿದ್ದ ಈ ಕಾರ್ಯಕ್ರಮವು ಕನ್ನಡ ದೂರದರ್ಶನದ ಅತಿದೊಡ್ಡ ರಿಯಾಲಿಟಿ ಶೋಗಳಲ್ಲಿ ಒಂದಾಗಿದೆ. ಒಂದು ಕೋಟಿ ರೂಪಾಯಿಗಳ ಬಹುಮಾನವನ್ನು ನೀಡುತ್ತಿದ್ದ ಈ ಅದ್ಭುತ ಕಾರ್ಯಕ್ರಮವನ್ನು, ನಟ ಪುನೀತ್ ರಾಜ್ಕುಮಾರ್ ನಿರೂಪಣೆ ಮಾಡುತ್ತಿದ್ದರು. ಈ ಸಂದರ್ಭದಲ್ಲಿ ಅಪ್ಪು 8 ಕೋಟಿ ರೂಪಾಯಿ ಸಂಭಾವನೆ ರೂಪದಲ್ಲಿ ಪಡೆದಿದ್ದರಂತೆ. ಆದರೆ ಆ ದುಡ್ಡನ್ನು ತಮ್ಮ ಸ್ವಂತಕ್ಕೆ ಬಳಸಿಕೊಳ್ಳದ ಕರುಣಾಮಯಿ, ಮಕ್ಕಳ ಶಿಕ್ಷಣಕ್ಕಾಗಿ ಮೀಸಲಿಟ್ಟಿದ್ದರು ಎನ್ನಲಾಗಿದೆ.
ಇದೀಗ ಕನ್ನಡದ ಕೋಟ್ಯಾಧಿಪತಿ ಕಾರ್ಯಕ್ರಮ ಮತ್ತೆ ಪ್ರಾರಂಭವಾಗಲಿದ್ದು, ಹೊಸ ನಿರೂಪಕನನ್ನು ಈಗಾಗಲೇ ಆಯ್ಕೆ ಮಾಡಲಾಗಿದೆ ಎಂದು ಹೇಳಲಾಗುತ್ತಿದೆ. ಆ ನಟ ಬೇರಾರು ಅಲ್ಲ, ಅಪ್ಪು ಪ್ರಾಣ ಸ್ನೇಹಿತ, ಕರುನಾಡ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಎಂದು ಹೇಳಲಾಗುತ್ತಿದೆ.
ಈ ವಿಚಾರ ಒಂದಷ್ಟು ಮೂಲಗಳಿಂದು ತಿಳಿದುಬಂದಿದ್ದು ಬಿಟ್ಟರೆ, ಯಾವುದೇ ಅಧಿಕೃತ ಹೇಳಿಕೆಗಳು ಲಭ್ಯವಾಗಿಲ್ಲ. ಮತ್ತೊಂದೆಡೆ, ಕಿಚ್ಚ ಈ ಕಾರ್ಯಕ್ರಮವನ್ನು ನಿರೂಪಣೆ ಮಾಡಿದ್ದೇ ಆದಲ್ಲಿ, ಅಪ್ಪು ಮತ್ತು ಕಿಚ್ಚನ ಅಭಿಮಾನಿಗಳಿಗೆ ಸಂತಸವಾಗಲಿದೆ.
ಈಗಾಗಲೇ ಕಿಚ್ಚ 'ಬಿಗ್‌ಬಾಸ್ ಕನ್ನಡ' ನಿರೂಪಣೆಯನ್ನ ಇನ್ಮುಂದೆ ಮಾಡುವುದಿಲ್ಲ ಎಂದು ಪೋಸ್ಟ್‌ ಶೇರ್‌ ಮಾಡಿದ್ದರು. ಈ ಬೆನ್ನಲ್ಲೇ ಇಂತಹ ಸುದ್ದಿ ಸೋಶಿಯಲ್‌ ಮೀಡಿಯಾದಲ್ಲಿ ಹಬ್ಬಿರುವುದು ಕುತೂಹಲ ಮೂಡಿಸಿದೆ.
ಸೂಚನೆ: ಸೋಶಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗುತ್ತಿರುವ ಮಾಹಿತಿಯ ಅನುಸಾರ ಈ ವರದಿ ಬರೆಯಲಾಗಿದೆ. ಯಾವುದೇ ನಿಖರತೆ ಇದರಲ್ಲಿ ಒಳಗೊಂಡಿಲ್ಲ. ಜೀ ಕನ್ನಡ ನ್ಯೂಸ್‌ ಈ ಸುದ್ದಿಯನ್ನು ಯಾವುದೇ ಕಾರಣಕ್ಕೂ ಖಚಿತಪಡಿಸುವುದಿಲ್ಲ.