Crime News: സാമ്പത്തിക തർക്കം, യുവാവിന് കുത്തേറ്റു; രക്ഷപ്പെടാൻ ശ്രമിച്ച പ്രതി വാഹനാപകടത്തിൽപ്പെട്ടു, പോലീസ് പിടികൂടി

കോഴിക്കോട്: സാമ്പത്തിക ഇടപാടുമായി ബന്ധപ്പെട്ട തർക്കത്തിനിടെ യുവാവിന് കുത്തേറ്റു. കൊടുവള്ളി പാലക്കുറ്റി സ്വദേശി സമീറിനെയാണ് കുത്തിപ്പരിക്കേൽപ്പിച്ചത്. സംഭവശേഷം രക്ഷപ്പെടാൻ ശ്രമിച്ച പ്രതിക്ക് വാഹനാപകടത്തിൽ പരിക്കേറ്റു. ഇയാളെ പോലീസ് അറസ്റ്റ് ചെയ്തു.

തിങ്കളാഴ്ച രാത്രിയോടെയാണ് സംഭവം നടന്നത്. ചോട്ടാ നിസാർ എന്നയാളാണ് സമീറിനെ കുത്തിപ്പരിക്കേൽപ്പിച്ചത്. നിസാറും സമീറും തമ്മിൽ സാമ്പത്തിക ഇടപാടുമായി ബന്ധപ്പെട്ട തർക്കം നിലനിന്നിരുന്നുവെന്നാണ് പോലീസ് വ്യക്തമാക്കുന്നത്.

ഇതിനിടെ കഴിഞ്ഞ ദിവസം തർക്കം രൂക്ഷമാവുകയും നിസാർ സമീറിനെ കുത്തിപ്പരിക്കൽപ്പിക്കുകയും ചെയ്യുകയായിരുന്നു. കാലിനാണ് കുത്തേറ്റത്. പരിക്കേറ്റ സമീർ കോഴിക്കോട്ടെ സ്വകാര്യ ആശുപത്രിയിൽ ചികിത്സയിലാണ്.

സംഭവശേഷം രക്ഷപ്പെടാൻ ശ്രമിക്കുന്നതിനിടെ പ്രതി സ‍ഞ്ചരിച്ചിരുന്ന വാഹനാപകടത്തിൽപ്പെട്ടു. മൂഴിക്കലിൽ വച്ചാണ് പ്രതി സഞ്ചരിച്ചിരുന്ന ഇരുചക്രവാഹനം അപകടത്തിൽപ്പെട്ടത്. ഇവിടെ വച്ച് പോലീസ് ഇയാളെ കസ്റ്റഡിയിലെടുക്കുകയായിരുന്നു.