Crib Destroyed: പാലക്കാട് തത്തമംഗലം സ്കൂളിൽ സ്ഥാപിച്ച പുൽക്കൂട്ട് തകർത്ത നിലയിൽ

Crib Destroyed: ഇന്ന് രാവിലെ സ്കൂളിലെത്തിയ അധ്യാപകരാണ് പൂൽക്കൂട് തകർത്ത നിലയിൽ കണ്ടെത്തിയത്.

പാലക്കാട്:  സ്കൂളിൽ സ്ഥാപിച്ച പുൽക്കൂട് തകർത്തതായി പരാതി. പാലക്കാട് തത്തമം​ഗലം ജിബിയുപി സ്കൂളിൽ സ്ഥാപിച്ച് പുൽക്കൂടാണ് തകർത്ത നിലയിൽ കണ്ടെത്തിയത്. ക്രിസ്മസ് ആഘോഷങ്ങളുടെ ഭാ​ഗമായി വെള്ളിയാഴ്ചയായിരുന്നു പുൽക്കൂട് വച്ചത്.  ഇന്ന് രാവിലെ സ്കൂളിലെത്തിയ അധ്യാപകരാണ് പൂൽക്കൂട് തകർത്ത നിലയിൽ കണ്ടെത്തിയത്. 

സ്കൂളിന്റെ ​ഗ്രില്ലിന്റെ ഉള്ളിലൂടെ നീളമുള്ള വടി ഉപയോ​ഗിച്ച് അലങ്കാരങ്ങളെല്ലാം പുറത്തേക്കെടുത്ത് നശിപ്പിക്കുകയായിരുന്നുവെന്ന് അധ്യാപകർ പറയുന്നു. സംഭവത്തിൽ സ്കൂൾ അധികൃതർ ചിറ്റൂർ പൊലീസിൽ പരാതി നൽകി. 

പാലക്കാട് നല്ലേപ്പള്ളി ​ഗവൺമെന്റ് യുപി സ്കൂളിൽ നടത്തിയ ക്രിസ്മസ് ആഘോഷങ്ങൾ വിഎച്ച്പി പ്രവർത്തകർ തടഞ്ഞതിൽ പ്രതിഷേധങ്ങൾ നടക്കുന്നതിനിടെയാണ് ഇത്തരമൊരു സംഭവം ഉണ്ടായിരിക്കുന്നത്. 

അതേസമയം സ്കൂളിലെ ക്രിസ്മസ് ആഘോഷം തടസ്സപ്പെടുത്തിയതിൽ വിഎച്ച്പി ജില്ലാ സെക്രട്ടറി കെ അനിൽകുമാർ, ജില്ലാ സംയോജക് വി സുശാസനൻ, പഞ്ചായത്ത് കമ്മിറ്റി പ്രസിഡന്റ് വേലായുധൻ എന്നിവരെ അറസ്റ്റ് ചെയ്തു. ഇവരെ റിമാൻഡ് ചെയ്തു.