Crime News: മകളുടെ വിവാഹ ദിനത്തിൽ വിവാഹപ്പന്തലിലിട്ട് പിതാവിനെ അടിച്ചുകൊന്നു; നാല് പേർ കസ്റ്റഡിയിൽ
Murder: വടശ്ശേരിക്കോണം സ്വദേശി രാജു (63) ആണ് മരിച്ചത്. സംഭവത്തിൽ അയൽവാസികളായ നാല് പേർ പിടിയിലായി. മൺവെട്ടി ഉപയോഗിച്ച് അടിച്ചാണ് രാജുവിനെ കൊലപ്പെടുത്തിയത്.
തിരുവനന്തപുരം: കല്ലമ്പലത്ത് മകളുടെ വിവാഹ ദിനത്തിൽ പിതാവിനെ വീട്ടിൽ കയറി അടിച്ചുകൊന്നു. വടശ്ശേരിക്കോണം സ്വദേശി രാജു (63) ആണ് മരിച്ചത്. സംഭവത്തിൽ അയൽവാസികളായ നാല് പേർ പിടിയിലായി. മൺവെട്ടി ഉപയോഗിച്ച് അടിച്ചാണ് രാജുവിനെ കൊലപ്പെടുത്തിയത്. ജിഷ്ണുവിൻറെ വിവാഹ ആലോചന ശ്രീലക്ഷ്മിയുടെ വീട്ടുകാർ നിരസിച്ചതാണ് വിരോധത്തിന് കാരണമെന്നാണ് നാട്ടുകാർ പറയുന്നത്.
ജിഷ്ണു, ഇയാളുടെ സഹോദരൻ ജിജിൻ, ശ്യാം, മനു എന്നിവരാണ് പിടിയിലായത്. ജിഷ്ണുവിന്റെ സഹോദരനാണ് രാജുവിനെ മൺവെട്ടി കൊണ്ട് അടിച്ചു വീഴ്ത്തിയത്. രാജു നിലത്തുവീണ ശേഷവും പ്രതികൾ ക്രൂരമായി മർദ്ദിച്ചു. ഇന്ന് രാവിലെ പത്തരയോടെയാണ് രാജുവിന്റെ മകളുടെ വിവാഹം നടക്കേണ്ടിയിരുന്നത്.
ഇന്ന് ശിവഗിരിയിൽ വച്ച് മകൾ ശ്രീലക്ഷ്മിയുടെ വിവാഹം നടക്കാനിരിക്കെയാണ് രാജു കൊല്ലപ്പെട്ടത്. ഗൾഫിൽ നിന്ന് മടങ്ങി വന്ന ശേഷം നാട്ടിൽ ഓട്ടോ ഡ്രൈവർ ആയി ജോലി ചെയ്യുകയായിരുന്നു രാജു. വിവാഹ തലേദിവസമായ ഇന്നലെ രാത്രി ഒരു മണിയോടുകൂടി പെൺകുട്ടിയുടെ സുഹൃത്തായിരുന്ന ജിഷ്ണു സഹോദരൻ ജിജിൻ എന്നിവരുൾപ്പെട്ട നാലംഗ സംഘം വിവാഹ വീട്ടിൽ എത്തി ബഹളം വയ്ക്കുകയായിരുന്നു.
ALSO READ: Crime News: യുവതിയെ ശല്യം ചെയ്തത് ചോദ്യം ചെയ്ത ബന്ധുവിനെ കുത്തിക്കൊന്നു
വിവാഹ തലേന്നത്തെ ആഘോഷങ്ങൾ തീർന്നതിന് പിന്നാലെയാണ് സംഘം എത്തിയത്. കാറിൽ ഉച്ചത്തിൽ പാട്ട് വച്ച് ബഹളം ഉണ്ടാക്കി. പിന്നീട് ഇവർ വീട്ടിലേക്കെത്തി. വധുവായ ശ്രീലക്ഷ്മിയും ജിഷ്ണുവും തമ്മിൽ മുൻപ് സുഹൃത്തുക്കളായിരുന്നു. എന്നാൽ, ഈ സൗഹൃദം പെൺകുട്ടി അവസാനിപ്പിച്ചിരുന്നു.
ജിഷ്ണുവും സഹോദരനും വീട്ടിലെത്തി ബഹളം വച്ചതോടെ ശ്രീലക്ഷ്മിയുടെ പിതാവ് ഇവരെ തടഞ്ഞു. വീട്ടിൽ നിന്നും ഇറങ്ങിപ്പോകാൻ ആവശ്യപ്പെട്ടു. ഇതേ തുടർന്ന് വാക്കേറ്റം ഉണ്ടായി. വാക്കേറ്റത്തിനിടെ ജിഷ്ണുവിന്റെ സഹോദരൻ ജിജിൻ മണ്‍വെട്ടി കൊണ്ട് രാജുവിനെ അടിക്കുകയായിരുന്നു. താഴെ വീണ രാജുവിനെ വീണ്ടും പ്രതികൾ മർദ്ദിച്ചു. മൺവെട്ടി കൊണ്ട് വെട്ടുകയും കത്തി കൊണ്ട് കുത്തുകയും ചെയ്തു.
ആക്രമണത്തിന് ശേഷം ഓടി രക്ഷപ്പെടാൻ ശ്രമിച്ച പ്രതികളെ നാട്ടുകാർ ഓടിച്ചിട്ട് പിടികൂടുകയായിരുന്നു. തുടർന്ന് നാട്ടുകാർ വിവരമറിയിച്ചതിനെ തുടർന്ന് പോലീസെത്തി ഇവരെ കസ്റ്റഡിയിലെടുത്തു. പ്രതികളെ ചോദ്യം ചെയ്തുവരികയാണെന്ന് പോലീസ് അറിയിച്ചു.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEE MALAYALAM App ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...