Shahana death case: തിരുവല്ലത്തെ ഷഹനയുടെ ആത്മഹത്യ; പ്രതികളെ സഹായിച്ച പോലീസുകാരന് സസ്പെൻഷൻ

തിരുവനന്തപുരം: തിരുവല്ലത്ത് ഭർതൃ മാതാവിന്റെ മാനസിക പീഡനം മൂലം യുവതി ആത്മഹത്യ ചെയ്ത സംഭവത്തിൽ പ്രതികളെ സഹായിച്ച പോലീസുകാരനെ സസ്പെൻഡ് ചെയ്തു. പ്രതികളെ സഹായിച്ചെന്ന ആരോപണത്തിന് വിധേയനായ സിപിഒ നവാസിനെയാണ് സസ്പെൻഡ് ചെയ്തത്. കേസിലെ പ്രതികളെ രക്ഷപ്പെടാൻ സഹായിച്ചതിനാണ് ഇയാൾക്കെതിരെ നടപടി സ്വീകരിച്ചത്.

കടയ്ക്കൽ പോലീസ് സ്റ്റേഷനിലെ സിപിഒ ആണ് പ്രതികളുടെ ബന്ധു കൂടിയായ നവാസ്. 2020ൽ ആണ് നൗഫലും ഷഹനയും വിവാഹിതരായത്. വീട്ടുകാരുടെ സമ്മതത്തോടെയാണ് ഇരുവരും വിവാഹിതരായത്. പിന്നീട് ഷഹനയുടെ കുടുംബത്തിന്റെ സാമ്പത്തിക സ്ഥിതി പോരെന്ന് പറഞ്ഞ് നൗഫലിന്റെ മാതാവ് ഉൾപ്പെടെയുള്ള ബന്ധുക്കൾ നിരന്തരം പരിഹസിക്കുമായിരുന്നുവെന്ന് ഷഹനയുടെ ബന്ധുക്കൾ പറയുന്നു.

പരിഹാസം പിന്നീട് പീഡനമായി മാറി. ഷഹനയ്ക്കെതിരെയുള്ള പീഡനം നൗഫൽ തടഞ്ഞില്ലെന്നും ഷഹനയുടെ കുടുംബം ആരോപിക്കുന്നു. നൗഫലിൻറെ ചികിത്സക്കായി പോയ സമയത്ത് ഷഹനയെ ആശുപത്രിയിൽ വെച്ച് നൗഫലിന്റെ മാതാവ് മർദ്ദിച്ചതായും കുടുംബം ആരോപിക്കുന്നു.

ഇതേ തുടർന്ന് ഷഹന സ്വന്തം വീട്ടിലേക്ക് മാറി. ഇതിനിടെ, അനുജൻറെ മകൻറെ ജന്മദിനവുമായി ബന്ധപ്പെട്ട ചടങ്ങിൽ പങ്കെടുക്കാൻ ഷഹനയെ കൂട്ടിക്കൊണ്ടുപോകാൻ ഭർത്താവ് നൗഫൽ എത്തിയെങ്കിലും നേരിട്ട് ക്ഷണിക്കാത്തതിനാൽ ഷഹന പോകാൻ തയ്യാറായില്ല.

ഇതോടെ ഭർത്താവ് കുഞ്ഞിനെയുമെടുത്ത് പോയി. ഇതിന് പിന്നാലെ ഷഹന മുറിയിൽ കയറി വാതിലടച്ചു. ഏറെ സമയം കഴിഞ്ഞിട്ടും പുറത്തേക്ക് വരാതായതിനെ തുടർന്ന് വീട്ടുകാർ വാതിലിൽ മുട്ടി വിളിച്ചെങ്കിലും പ്രതികരണമില്ലാത്തതിനെ തുടർന്ന് വാതിൽ ചവിട്ടി തുറന്നു നോക്കിയപ്പോഴാണ് യുവതിയെ മരിച്ച നിലയിൽ കണ്ടത്.