Tripura Violence: ക്ഷേത്ര വിഗ്രഹം നശിപ്പിച്ചതിനെ തുടർന്ന് ത്രിപുരയിൽ വീടുകൾ അഗ്നിക്കിരയാക്കി അക്രമികൾ!

അഗർത്തല: ത്രിപുരയിൽ ക്ഷേത്രവിഗ്രഹം തകർന്നതിനെ തുടർന്ന് അക്രമികൾ വീടുകളും വാഹനങ്ങളും അഗ്നിക്കിരയാക്കി. കൈതുർബാരിയിൽ കാളി ദേവിയുടെ പ്രതിഷ്ഠ തകർന്ന നിലയിൽ കണ്ടതിന് പിന്നാലെയായിരുന്നു ഈ ആക്രമണം. 

ആക്രമണത്തിൽ പടിഞ്ഞാറൻ ത്രിപുരയിലെ റാണിർബസാർ ജില്ലയിലെ 16 വീടുകളും നിരവധി വാഹനങ്ങളും ഒരു കൂട്ടം ആളുകൾ തീവെച്ച് നശിപ്പിച്ചതായി പോലീസ് പറഞ്ഞു. സംഭവത്തിൽ ആർക്കും പരിക്കേറ്റിട്ടില്ല. അക്രമത്തിന് പിന്നിൽ ആരാണെന്നത് ഇതുവരെ തിരിച്ചറിഞ്ഞിട്ടില്ല. ആൾക്കൂട്ടത്തെ കണ്ട് ജനങ്ങൾ ഓടിക്കൂടുകയായിരുന്നു എന്നാണ് ദൃക്‌സാക്ഷികൾ പറഞ്ഞത്. സംഘർഷം ലഘൂകരിക്കാൻ കനത്ത സുരക്ഷാ സംവിധാനങ്ങൾ സംഭവ സ്ഥലത്ത് നിയോഗിച്ചിട്ടുള്ളതായി അധികൃതർ പറഞ്ഞു.  മാത്രമല്ല റാണിർബസാർ ഉൾപ്പെടുന്ന ജിരാണിയ സബ്ഡിവിഷനിൽ നിരോധനമേർപ്പെടുത്തിയിട്ടുണ്ട്. 

ഇവിടെ അഞ്ചോ അതിൽ കൂടുതൽ ആളുകളോ കൂട്ടം കൂടി നിൽക്കരുതെന്നും ഉത്തരവിൽ വ്യക്തമാക്കുന്നു.  വീടുകൾ കത്തിച്ച സംഭവം ആശങ്കയുണ്ടാക്കുന്നുവെന്നും എല്ലാവരും ക്രമസമാധാനം പാലിക്കണമെന്നും തിപ്ര മോത്ത മേധാവി പ്രദ്യോത് കിഷോർ മാണിക്യ ദെബ്ബാർമ അറിയിച്ചു. ‘നമ്മുടെ നാട് പ്രകൃതി ദുരന്തത്തിൽ വലയുമ്പോൾ ചിലർ മതരാഷ്ട്രീയം കളിക്കുന്നുവെന്നും. അക്രമികളെ അവരുടെ വിശ്വാസങ്ങൾ കണക്കിലെടുക്കാതെ തന്നെ ശിക്ഷിക്കണമെന്നും നിയമം എല്ലാവർക്കും ബാധകമാണെന്നും അദ്ദേഹം പറഞ്ഞു.