Wayanad Relief Fund: വയനാട് ദുരിതാശ്വാസ ഫണ്ടിന്റെ പേരിൽ അനധികൃത പിരിവ്; കോൺഗ്രസ്‌ പ്രവർത്തകനെ സസ്‌പെൻ്റ് ചെയ്തു

കോഴിക്കോട്: വയനാട് ദുരിതാശ്വാസ ഫണ്ടിന്റെ  പേരിൽ അനധികൃത പിരിവ് നടത്തിയ കോൺഗ്രസ്‌ പ്രവർത്തകനെ സസ്‌പെൻ്റ് ചെയ്തതായി റിപ്പോർട്ട്. 

ചേളന്നൂർ മണ്ഡലത്തിലെ കോൺഗ്രസ് പ്രവർത്തകനായ പി.എം അനസിനെതിരെയാണ് നടപടി. ജില്ലാ കോൺഗ്രസ് കമ്മിറ്റി നിയോഗിച്ച രണ്ടംഗ കമ്മീഷൻ ചേളന്നൂർ മണ്ഡലത്തിൽ അനധികൃത പിരിവ് നടന്നതായി കണ്ടെത്തിയിരുന്നു. ഇതിന്റെ അടിസ്ഥാനത്തിൽ ഡിസിസി പ്രസിഡന്റ്‌ കെ പ്രവീൺ കുമാർ അനസിനെതിരെ നടപടിയെടുക്കുകയുമായിരുന്നു.

ശ്രുതിയെ തനിച്ചാക്കി ജെൻസൺ മരണത്തിന് കീഴടങ്ങി

കൽപ്പറ്റ വെള്ളാരംകുന്നിൽ വാഹനാപകടത്തിൽ പരിക്കേറ്റ് അതീവ ​ഗുരുതരാവസ്ഥയിലായിരുന്ന ജെൻസൺ മരണത്തിന് കീഴടങ്ങി. അപകടത്തിന് പിന്നാലെ ആശുപത്രിയിൽ പ്രവേശിപ്പിച്ച ജെൻസൺ വെൻ്റിലേറ്ററിലായിരുന്നു. 8.52ഓടെ ആശുപത്രി അധികൃതർ മരണം സ്ഥിരീകരിക്കുകയായിരുന്നു. ചൂരൽമല ദുരന്തത്തിൽ ഉറ്റവരെ എല്ലാം നഷ്ടപ്പെട്ട ശ്രുതിയുടെ പ്രതിശ്രുത വരനാണ് ജെൻസൺ. ശ്രുതി ഉൾപ്പെടെ 9 പേർക്കാണ് അപകടത്തിൽ പരിക്കേറ്റത്. ഇവരുടെയെല്ലാം ആരോഗ്യ നില തൃപ്തികരമാണ്.

തലയിൽ ആന്തരിക രക്തസ്രാവം, കണ്ണിനും മൂക്കിനും ഉൾപ്പെടെ ജെൻസണ് ഗുരുതരമായി പരിക്കേറ്റിരുന്നു. കൽപ്പറ്റ വെള്ളാരംകുന്നിൽ ഇന്നലെ ഉച്ചയ്ക്ക് ശേഷമാണ് ജെൻസണും ശ്രുതിയും ബന്ധുക്കളും സഞ്ചരിച്ചിരുന്ന ഒമ്നി വാൻ സ്വകാര്യ ബസിൽ ഇടിച്ചത്. ഇടിയുടെ ആഘാതത്തിൽ വാനിൻ്റെ മുൻഭാഗം തകർന്നു. പിറകു ഭാഗം തുറന്നു. വാൻ വെട്ടിപ്പൊളിച്ചാണ് പരിക്കേറ്റവരെ പുറത്തെടുത്തത്. 

ശ്രുതിയുടെ മാതാപിതാക്കളും സഹോദരിയും അടക്കം 9 പേരാണ് ഉരുൾപ്പൊട്ടലിൽ മരിച്ചത്. മാതാപിതാക്കളെയും സഹോദരനെയും നഷ്ടപ്പെട്ട ശ്രുതിയുടെ ബന്ധു ലാവണ്യയും ഒമ്നി വാനിൽ ഉണ്ടായിരുന്നു.