Pinarayi Vijayan Threat Call | മുഖ്യമന്ത്രിക്ക് വധ ഭീക്ഷണി, പിന്നിൽ ഏഴാം ക്ലാസുകാരൻ, അറിയാതെ പറ്റിയെന്ന് വീട്ടുകാർ

തിരുവനന്തപുരം: മുഖ്യമന്ത്രി പിണറായി വിജയനെ വധിക്കുമെന്ന് ഭീഷണി. പൊലീസ് ആസ്ഥാനത്തെ കൺട്രോൾ റൂമിൽ ഭീഷണിയുമായി ഫോണ്‍ വിളിയെത്തിയത് ഇന്നലെ വൈകിട്ടാണ്. സംഭവത്തില്‍ മ്യൂസിയം പൊലീസ് കേസെടുത്തു. തുടർന്ന് നടത്തിയ അന്വേഷണത്തില്‍ സ്കൂൾ വിദ്യാർത്ഥിയാണ് വധ ഭീഷണിയുമായി ഫോണ്‍ വിളിച്ചതെന്ന് കണ്ടെത്തുകയായിരുന്നു. എറണാകുളം സ്വദേശിയായ 12 വയസുകാരനാണ് കൺട്രോൾ റൂമിൽ വിളിച്ചത്. ഈ കുട്ടിയാണ് മുഖ്യമന്ത്രിയെ വധിക്കുമെന്ന് ഭീഷണിപ്പെടുത്തിയത്

വിശദമായി അന്വേഷണത്തിൻറ ഭാഗമായി  വിദ്യാർഥിയുടെ വീട്ടുകാരുമായി പോലീസ് സംസാരിച്ചു.  കുട്ടി ഫോണിൽ കളിച്ചപ്പോൾ അറിയാതെ കോൾ പോയെന്നാണ് വിശദീകരണം. സംഭവത്തിൽ വിശദമായ അന്വേഷണം നടക്കുകയാണ്. പോലീസ് ആസ്ഥാനത്തെ 112 എന്ന നമ്പരിലേക്കാണ് കോൾ വന്നത്. കുട്ടിയുടെ അമ്മയുടേതാണ് ഫോൺ. ഏഴാം ക്ലാസ് വിദ്യാർഥിയുടെ കോളായതിനാൽ മറ്റ് നടപടികളിലേക്ക് പോലീസ് കടക്കാൻ സാധ്യതയില്ല.