Crime News: വിവാഹം കഴിഞ്ഞ് 14 ദിവസം മാത്രം, നവവധു ഭർതൃവീട്ടിൽ തൂങ്ങിമരിച്ചു; ഭർത്താവ് അറസ്റ്റിൽ

തിരുവനന്തപുരം: കാട്ടാക്കടയിൽ നവവധു ഭർതൃവീട്ടിൽ തൂങ്ങി മരിച്ച സംഭവത്തിൽ ഭർത്താവിനെ അറസ്റ്റ് ചെയ്ത് പോലീസ്. വീരണകാവ് വില്ലേജിൽ ആനകോട് കല്ലാമം കല്ലറക്കുഴി ഷിബിൻ ഭവനിൽ വിപിൻ (28) ആണ് അറസ്റ്റിലായത്. കാട്ടാക്കട ഡിവൈഎസ്പിയുടെ നേതൃത്വത്തിലുള്ള പോലീസ് സംഘമാണ് ഇയാളെ അറസ്റ്റ് ചെയ്തത്.

2023 ജൂൺ രണ്ടിനാണ് പന്നിയോട് തണ്ണിച്ചാൻകുഴി സ്വദേശികളായ പ്രഭാകരൻ്റെയും ഷൈലജയുടെയും മകൾ സോന (23) ആണ് തൂങ്ങിമരിച്ചത്. ഇരുവരുടെയും വിവാഹം കഴിഞ്ഞ് 14 ദിവസം മാത്രമേ ആയിരുന്നുള്ളൂ. കാട്ടാക്കട പോലീസ് അന്ന് അസ്വഭാവിക ഭരണത്തിന് കേസെടുത്തിരുന്നു. എന്നാൽ മരണത്തിൽ ദുരൂഹത ആരോപിച്ച് പെൺകുട്ടിയുടെ പിതാവ് അന്നത്തെ ഡിവൈഎസ്പിക്ക് പരാതി നൽകിയിരുന്നു.

എന്നാൽ അന്ന് പോലീസ് വിപിനെ അറസ്റ്റ് ചെയ്യാൻ തയ്യാറായില്ല. തുടർന്ന് ആക്ഷൻ കൗൺസിൽ രൂപീകരിച്ച് സമരം നടത്തി. സംഭവത്തിൽ വിശദമായ അന്വേഷണം വേണമെന്നും കേസ് ക്രൈംബ്രാഞ്ചിന് കൈമാറണമെന്നും ആവശ്യപ്പെട്ട് മുഖ്യമന്തിക്കും ഉന്നത പോലീസ് ഉദ്യോഗസ്ഥർക്കും പരാതി നൽകിയിരുന്നു. ഇതിന് ശേഷമാണ് പ്രതിയെ അറസ്റ്റ് ചെയ്തത്.

ഓട്ടോ ഡ്രൈവറായ വിപിനും  സോനയും ഒന്നര വർഷത്തെ പ്രണയത്തിന് ശേഷം ജൂൺ 19ന് ആണ് വിവാഹിതരായത്. സംഭവദിവസം ഉച്ചക്കും വിരുന്ന് സൽക്കാരത്തിനായി ബന്ധുവീട്ടിലും സോനയുടെ വീട്ടിലും പോയിരുന്നു. അന്ന് രാത്രി പതിനൊന്നരയോടെ വിപിനാണ് കിടപ്പ് മുറിയിൽ സോന തൂങ്ങി നിൽക്കുന്നതായി വീട്ടുകാരെയും അയൽക്കാരെയും അറിയിച്ചത്.

പോലീസെത്തും മുൻപ് കയർ അറുത്തു മാറ്റി ആശുപത്രിയിലെത്തിച്ചെങ്കിലും മരണം സംഭവിച്ചു. വിപിൻ കിടന്ന അതേ മുറിയിലാണ് സോനയെ തൂങ്ങിമരിച്ച നിലയിൽ കണ്ടെത്തിയത്. ഉറങ്ങിപ്പോയതിനാൽ അറിഞ്ഞില്ലെന്നാണ് വിപിൻ പോലീസിന് മൊഴി നൽകിയത്. എന്നാൽ ഈ മൊഴിയിൽ പോലീസിന് സംശയം ഉണ്ടായിരുന്നു.

മറ്റ് കുടുംബ പ്രശ്നങ്ങളൊന്നും ഇല്ലെന്നാണ് ഇവർ പറയുന്നത്. വിപിനെ വിശദമായി ചോദ്യം ചെയ്തുവെങ്കിലും ഇയാൾ ഒഴിഞ്ഞുമാറുകയായിരുന്നു. വിപിന്റെ അതേ മൊഴിയാണ് വിപിന്റെ അമ്മയും നൽകിയത്. സോനയെ താഴെയിറക്കി ഒരു മണിക്കൂർ കഴിഞ്ഞാണ് കാട്ടാക്കടയിലെ സ്വകാര്യ ആശുപത്രിയിൽ എത്തിച്ചതെന്നാണ് സൂചന.