Kattappana Twin Murder : നിധീഷ് ആദ്യം പറഞ്ഞത് കുഞ്ഞിന്റെ മൃതദേഹം കുഴിച്ചിട്ടു, ഇപ്പോൾ പറയുന്നു കത്തിച്ചുയെന്ന്; വലഞ്ഞ് പോലീസ്

കട്ടപ്പന ഇരട്ട കൊലപാതക കേസിൽ ഇന്ന് തിങ്കളാഴ്ച രണ്ടാം ദിവസം നടത്തിയ തിരച്ചിലിലും നവജാതശിശുവിന്റെ മൃതദേഹ അവശിഷ്ടങ്ങൾ കണ്ടെത്താനായില്ല. ഇതോടെ ഇന്നത്തെ തെരച്ചിൽ താൽക്കാലികമായി അവസാനിപ്പിച്ചു. പ്രധാന പ്രതിയായ നിധീഷിന്റെ മൊഴിമാറ്റം പോലീസിനെ വലയ്ക്കുന്നു. വിശദമായ ചോദ്യം ചെയ്യലിന് ശേഷം മറ്റു രണ്ടു പ്രതികളായ വിഷ്ണുവിന്റെയും സുമയുടെയും അറസ്റ്റ്  രേഖപ്പെടുത്തും.

നിധീഷിന്റെ മൊഴിയുടെ അടിസ്ഥാനത്തിലാണ് സാഗര ജംക്ഷനിലെ വീടിനു സമീപത്തെ തൊഴുത്തിൽ കഴിഞ്ഞ രണ്ട്  ദിവസങ്ങളിലായി പരിശോധന നടത്തിയത്. തൊഴുത്തിന്റെ തറ കുഴിച്ചു പരിശോധന നടത്തിയെങ്കിലും ഒന്നും കണ്ടെത്താനായില്ല. ഇതിനിടെ നിധീഷ്  മൊഴി മാറ്റിയതും പോലീസിനെ കുഴപ്പിച്ചു. 2016 ൽ നവജാത ശിശുവിനെ കൊന്ന് കട്ടപ്പന സാഗരാ ജംക്ഷനിലെ വീടിനു സമീപത്തെ തൊഴുത്തിൽ കുഴിച്ചിട്ടു എന്നായിരുന്നു നിധീഷിന്റെ ആദ്യ മൊഴി. എന്നാൽ  മൃതദേഹം ഇവിടെ നിന്നും മാറ്റി കത്തിച്ചു എന്നടക്കം ഇയാൾ മൊഴി മാറ്റി.

ഇതിന് ശേഷം പോലീസ് സംഘം വിശദമായ ചോദ്യം ചെയ്യൽ നടത്തിയിരുന്നു. നിധീഷിനൊപ്പം പ്രതികളായ വിജയൻറെ മകൻ വിഷ്ണു, ഭാര്യ സുമ എന്നിവരെയും പോലീസ് ചോദ്യം ചെയ്തു. ഇതിനുശേഷമാണ് ഇന്ന് നാലുമണിയോടെ വീണ്ടും തറ കുഴിച്ചുള്ള പരിശോധന പുനരാരംഭിച്ചത്. എന്നാൽ ഒന്നും കണ്ടെത്തുവാൻ കഴിഞ്ഞില്ല. ഇതോടെ പോലീസ് സംഘം തിരച്ചിൽ അവസാനിപ്പിച്ചു.  

പ്രതി നിധീഷ് മൊഴിമാറ്റുകയും മൃതദേഹ അവശിഷ്ടങ്ങൾ കണ്ടെത്താൻ കഴിയാതെയും വന്നതോടെ പ്രതികളെ കൂടുതൽ വിശദമായ ചോദ്യം ചെയ്യാനാണ് പോലീസിന്റെ തീരുമാനം ഇതിനുശേഷമായിരിക്കും മറ്റു പ്രതികളായ വിഷ്ണു, സുമ എന്നിവരുടെ അറസ്റ്റും രേഖപ്പെടുത്തുക.