Crime News: വീട്ടിൽ സൂക്ഷിച്ച ചന്ദനവുമായി മലപ്പുറത്ത് ഒരാൾ പിടിയിൽ

മലപ്പുറം: വീട്ടില്‍ സൂക്ഷിച്ച ചന്ദനവുമായി മലപ്പുറം മഞ്ചേരിയില്‍ ഒരാള്‍ വനം വകുപ്പിന്‍റെ പിടിയിലായതായി റിപ്പോർട്ട്. പുല്ലാര ഇല്ലിക്കൽ തൊടി അസ്കർ അലിയെയാണ് 66 കിലോ ചന്ദനവുമായി പിടികൂടിയത്. 

വീടിനോട് ചേര്‍ന്നുള്ള ഷെഡില്‍ ചാക്കുകളിലാക്കി ഒളിപ്പിച്ച് സൂക്ഷിച്ചിരിക്കുകയായിരുന്ന ചന്ദനം വനം വിജിലൻസ് വിഭാഗം നടത്തിയ പരിശോധനയിലാണ് കണ്ടെത്തിയത്. നാല് പ്ലാസ്റ്റിക്ക് ചാക്കുകളില്‍ കെട്ടിയായിരുന്നു ചന്ദനം സൂക്ഷിച്ചിരുന്നത്. വനം വിജിലൻസ് വിഭാഗം നടത്തിയ വിശദമായ തിരച്ചിലില്‍ പറമ്പിലെ തെങ്ങിൻ്റെ മടലുകൾക്കിടയിൽ ഒളിപ്പിച്ച നിലയിലും കുറച്ച് ചന്ദനം കണ്ടെത്തിയിരുന്നു. 

മൂന്ന് ലക്ഷത്തോളം രൂപ വില വരുന്ന ചന്ദനമാണ് പിടികൂടിയായത്.  പിടിയിലായ അസ്‌കർ അലി മഞ്ചേരിയിലെ ചന്ദന മാഫിയയിലെ പ്രധാന കണ്ണികളിൽ ഒരാൾ ആണെന്നാണ് വനം വകുപ്പ് ഉദ്യോഗസ്ഥര്‍ പറയുന്നത്. ഇയാൾക്ക് സേലത്ത് പിടിയിലായ ചന്ദന കേസിലെ പ്രതികളുമായും ബന്ധമുണ്ടെന്നും വനം വകുപ്പ് ഉദ്യോഗസ്ഥർക്ക് വിവരം ലഭിച്ചിട്ടുണ്ട്. 

സേലത്ത് ജൂൺ നാലിനാണ് 1200 കിലോ ചന്ദനവുമായി ആറു പേര്‍ തമിഴ്നാട്ടില്‍ പിടിയിലായത്. ചന്ദനം മറയൂരില്‍ നിന്നടക്കം ശേഖരിച്ച് പുതുശ്ശേരിയിലെ ചന്ദന ഫാക്ടറിയിലിലേക്ക് കടത്താനുള്ള ശ്രമത്തിനിടെയായിരുന്നു ആറംഗ സംഘം പിടിയിലായത്. വനം വകുപ്പ് അറസ്റ്റുക ചെയ്ത അസ്‌കർ അലിയേയും തൊണ്ടിമുതലും കൊടുമ്പുഴ ഡെപ്യൂട്ടി റെയ്ഞ്ച് ഓഫിസർക്ക് കൈമാറിയിട്ടുണ്ട്. അദ്ദേഹത്തിനാണ് കേസില്‍ തുടർ അന്വേഷണ ചുമതലയുള്ളത്.