Murder Case: കാമുകിയെ കുത്തിക്കൊന്നശേഷം യുവാവ് പോലീസ് സ്റ്റേഷനിൽ കീഴടങ്ങി; സംഭവം ഹരിയാനയിൽ

ഹരിയാന: വഴക്കിനെ തുടര്‍ന്ന് കാമുകിയെ കുത്തിക്കൊന്ന് കാമുകൻ.  സംഭവം നടന്നത് ശനിയാഴ്ച രാത്രി സദര്‍ പോലീസ് സ്റ്റേഷന്‍ പരിധിയിലെ തിക്രി ഗ്രാമത്തിലാണ്. കാമുകിയെ കൊലപ്പെടുത്തിയ ശേഷം സദര്‍ പോലീസ് സ്റ്റേഷനില്‍ യുവാവ്  കീഴടങ്ങുകയായിരുന്നു. 

യുവതിയുടെ തലയിലും കഴുത്തിലും കുത്തേറ്റ പാടുകള്‍ കണ്ടെത്തിയിരുന്നു. 22 വയസ്സുള്ള യുവതിയുടെ മൃതദേഹം രക്തത്തില്‍ കുളിച്ച നിലയിലായിരുന്നു.  മരിച്ച യുവതിയും പ്രതിയും മഹാരാഷ്ട്രയിലെ അകോല ജില്ലയില്‍ നിന്നുള്ളവരാണെന്നാണ് റിപ്പോർട്ട്. ഇരുവരും പ്രണയത്തിലായിരുന്നോയെന്നാണ് പോലീസിന്റെ സംശയം.  മൂന്ന് ദിവസം മുൻപ് കൊല്ലപ്പെട്ട യുവതി യുവാവിനെ കാണാന്‍ എത്തിയിരുന്നതായും പോലീസ് പറഞ്ഞു. മഹാരാഷ്ട്രയില്‍ തനിക്കെതിരെ യുവതി പീഡന പരാതി നല്‍കിയിരുന്നുവെന്നും ഇത് പറഞ്ഞ് യുവതി തന്നെ ബ്ലാക്ക് മെയില്‍ ചെയ്തിരുന്നതായും പ്രതി പോലീസിന് മൊഴി നല്‍കിയിട്ടുണ്ട്.  

യുവതി തന്നെത്തേടി ഗുരുഗ്രാമിലെത്തിയെന്നും അവിടെവച്ചുണ്ടായ വഴക്കിന്റെ ദേഷ്യത്തിലാണ് യുവതിയെ കൊലപ്പെടുത്തിയതെന്നും പ്രതി പോലീസിനോട് പറഞ്ഞു. സംഭവത്തെ കുറിച്ചുള്ള എല്ലാ വസ്തുതകളും അന്വേഷിച്ചു വരികയാണെന്നും കൊലപാതകത്തിന് കേസ് രജിസ്റ്റര്‍ ചെയ്തതായും സദര്‍ പോലീസ് സ്റ്റേഷനിലെ എസ്എച്ച്ഒ അറിയിച്ചു.