Robbery: മൊബൈൽ ഫോൺ മോഷ്ടാവ് പിടിയിൽ; കയ്യിൽ 15 ഗ്രാം കഞ്ചാവും!

കൊല്ലം: കുരീപ്പുഴ നെല്ലിമുക്കിൽ പ്രവർത്തിക്കുന്ന മെഡിക്കൽ ഷോപ്പിൽ മരുന്ന് വാങ്ങാനെത്തിയ ആളുടെ മൊബൈൽ ഫോൺ മോഷ്ടിച്ചു കടന്നുകളഞ്ഞ യുവാവ് പിടിയിൽ.  

കൊല്ലം വെസ്റ്റ് വില്ലേജിൽ കോട്ടമുക്ക് വിദ്യാനഗർ എസ്.വി. ഭവനിൽ വിജയ്‌നെയാണ് കൊല്ലം വെസ്റ്റ് പോലീസ് പിടികൂടിയത്.  പോലീസിനെ കണ്ട് അക്രമാസക്തനായ പ്രതിയുടെ കയ്യിൽ നിന്നും 15 ഗ്രാം കഞ്ചാവും കണ്ടെടുത്തിരുന്നു. ഇതിന്റെ പേരിലും കേസെടുത്തിട്ടുണ്ട്.

വ്യാഴാഴ്ച രാത്രി ഒൻപതരയോടെ മെഡിക്കൽ ഷോപ്പിൽ മരുന്ന് വാങ്ങാനെത്തിയ കുരീപ്പുഴ സ്വദേശി ഷിബുവിന്റെ 23,000 രൂപ വിലവരുന്ന മൊബൈൽ ഫോണാണ് പ്രതി മോഷ്ടിച്ചു കടന്നു കളഞ്ഞത്. കടയിലെ സിസിടിവി ദൃശ്യങ്ങൾ പരിശോധിച്ചപ്പോൾ ഷിബുവിന്റെ തൊട്ടുപുറകിലായി നിന്നിരുന്ന വിജയ് ഫോൺ മോഷ്ടിക്കുന്നതായി കണ്ടെത്തി.

കൊല്ലം വെസ്റ്റ് പോലീസ് സ്റ്റേഷനിൽ ഉടൻ വിവരം അറിയിക്കുകയും പോലീസ് സംഘം സ്ഥലത്തെത്തി സിസിടിവി ദൃശ്യങ്ങൾ പരിശോധിക്കുകയും ചെയ്തു. തുടർന്ന് മൊബൈൽ നമ്പർ കേന്ദ്രീകരിച്ചു നടത്തിയ അന്വേഷണത്തിൽ പ്രതിയെ പിന്തുടർന്ന് പിടികൂടുകയായിരുന്നു. കൊല്ലം വെസ്റ്റ് സബ് ഇൻസ്പെക്ടർ അനീഷിന്റെ നേതൃത്വത്തിൽ എസ്.ഐ. ഹസൻകുഞ്ഞ്, എസ്.സി.പി.ഒ.മാരായ സുമേഷ്, ദീപു, സി.പി.ഒ.മാരായ അനിൽ, വിനോജ് എന്നിവരടങ്ങിയ സംഘമാണ് പ്രതിയെ പിടികൂടിയത്.