Pocso Case: ഇന്‍സ്റ്റഗ്രാംവഴി പരിചയപ്പെട്ട പെൺകുട്ടിയെ ലൈംഗികമായി പീഡിപ്പിച്ച കേസില്‍ യുവാവ് അറസ്റ്റില്‍

പത്തനംതിട്ട: ഇന്‍സ്റ്റഗ്രാംവഴി പരിചയപ്പെട്ട പെൺകുട്ടിയെ ലൈംഗികമായി പീഡിപ്പിച്ചെന്ന കേസില്‍ യുവാവ് അറസ്റ്റില്‍. കൊല്ലം കടയ്ക്കല്‍ സ്വദേശി അനീഷാണ് അറസ്റ്റിലായത്. പതിനേഴുകാരിയെ പീഡിപ്പിച്ചെന്ന കേസിൽ തിരുവനന്തപുരം പാലിയോട് നിന്നാണ് ഇയാളെ പിടികൂടിയത്. പെണ്‍കുട്ടിയെ കാണാനില്ലെന്ന വീട്ടുകാരുടെ പരാതിയില്‍ പോലീസ് നടത്തിയ അന്വേഷണത്തിലാണ് യുവാവുമായുള്ള ഇന്‍സ്റ്റഗ്രാം സൗഹൃദവും പീഡന വിവരവും പുറത്തറിഞ്ഞത്.

തുടര്‍ന്ന് പെണ്‍കുട്ടിയുടെ മൊഴി രേഖപ്പെടുത്തി വൈദ്യപരിശോധനയ്ക്ക് വിധേയമാക്കി. തുടർന്ന് യുവാവിന്റെ അറസ്റ്റ് രേഖപ്പെടുത്തുകയായിരുന്നു. പ്ലസ്ടു കഴിഞ്ഞതിന് ശേഷം പെണ്‍കുട്ടി പത്തനംതിട്ടയിലെ ഒരു സ്ഥാപനത്തില്‍ ഉപരിപഠനം നടത്തിവരികയായിരുന്നു. ഏതാനും ദിവസങ്ങള്‍ക്ക് മുമ്പ് പെണ്‍കുട്ടി വീട് വിട്ടിറങ്ങി. എറണാകുളത്തേക്ക് പോവുകയാണെന്നും അവിടെ ജോലിക്കായാണ് പോകുന്നതെന്നും കത്തെഴുതിവച്ചാണ് പെണ്‍കുട്ടി വീട്ടില്‍ നിന്ന് പോയത്.

തുടര്‍ന്ന് മകളെ കാണാനില്ലെന്ന് പിതാവ് പോലീസിൽ പരാതി നൽകി. പോലീസ് നടത്തിയ അന്വേഷണത്തിലാണ് പ്രതിയും പെൺകുട്ടിയും തമ്മിൽ സൗഹൃദത്തിലാണെന്ന് മനസ്സിലായത്. പിതാവിന്റെ മൊബൈല്‍ഫോണിലൂടെയാണ് പെൺകുട്ടി ഇന്‍സ്റ്റഗ്രാം അടക്കമുള്ള സാമൂഹിക മാധ്യമങ്ങള്‍ ഉപയോഗിച്ചിരുന്നത്. പോലീസ് ഈ ഫോണ്‍ പരിശോധിച്ചതോടെയാണ് അനീഷുമായുള്ള ബന്ധം കണ്ടെത്തിയത്. മൂന്ന് വര്‍ഷത്തോളമായി ഇരുവരും തമ്മില്‍ സൗഹൃദത്തിലായിരുന്നുവെന്നാണ് പോലീസ് വ്യക്തമാക്കുന്നത്.

ഒരു ലോഡ്ജില്‍വെച്ച് പ്രതി ലൈംഗികമായി പീഡിപ്പിച്ചതായും പെണ്‍കുട്ടി മൊഴി നൽകിയിട്ടുണ്ട്. അതേസമയം, പോലീസ് അന്വേഷണത്തില്‍ അനീഷുമായുള്ള സൗഹൃദം കണ്ടെത്തിയെങ്കിലും പെണ്‍കുട്ടി തന്റെ കൂടെയില്ലെന്നായിരുന്നു ഇയാൾ ആദ്യം മൊഴി നൽകിയത്. തുടർന്ന് ഒപ്പമുണ്ടായിരുന്ന പെണ്‍കുട്ടിയെ തിരുവനന്തപുരത്ത് നിന്ന് ഇയാള്‍ നാട്ടിലേക്ക് ബസ് കയറ്റി വിട്ടു. നാട്ടില്‍ ബസ് ഇറങ്ങിയതിന് പിന്നാലെ പെൺകുട്ടിയെ പോലീസ് കസ്റ്റഡിയിലെടുത്തു. തുടര്‍ന്ന് മൊഴിയെടുത്തതോടെയാണ് പീഡനവിവരം പുറത്തറിഞ്ഞത്.