Drugs Seized: ദഹിക്കാത്ത തരത്തിലുള്ള ടേപ്പില്‍ പൊതിഞ്ഞ് ലഹരിമരുന്ന് വിഴുങ്ങി ദമ്പതികൾ; കൊച്ചിയിൽ 30 കോടി രൂപയുടെ കൊക്കെയ്ൻ പിടികൂടി ഡിആര്‍ഐ

കൊച്ചി: ലഹരി മരുന്ന് വിഴുങ്ങി കൊച്ചിയിലെത്തിയ വിദേശ ദമ്പതിമാർ പിടിയിൽ. മുപ്പതുകോടി രൂപയടെ ലഹരി മരുന്നാണ് ഇവർ വിഴുങ്ങിയിരുന്നത്. ടാൻസാനിയൻ സ്വദേശികളായ ദമ്പതിമാരെ നെടുമ്പാശേരി അന്താരാഷ്ട്ര വിമാനത്താവളത്തിൽ നിന്ന് ഡിആർഐ സംഘം അറസ്റ്റ് ചെയ്തു. ഒമാനിൽ നിന്ന് വ്യാഴാഴ്ചയാണ് ഇവർ കൊച്ചിയിൽ എത്തിയത്.

ഇവരെ കസ്റ്റഡിയിൽ എടുത്ത ഡിആർഐ സംഘം ആലുവ താലൂക്ക് ആശുപത്രിയിൽ എത്തിച്ച് നടത്തിയ വൈദ്യപരിശോധനയിൽ ആണ് ശരീരത്തിനുള്ളിൽ കൊക്കൈയ്ൻ ഒളിപ്പിച്ചിരിക്കുന്നതായി കണ്ടെത്തിയത്. യുവാവിന്റെ വയറിനുള്ളിൽ ഏകദേശം രണ്ട് കിലോയോളം കൊക്കെയ്നാണ് കണ്ടെത്തിയത്. ഇത് പുറത്തെടുത്തു. തുടർന്ന് യുവാവിനെ റിമാൻഡ് ചെയ്തു.

യുവതിയുടെ ശരീരത്തിലും ഇതേ അളവിൽ ലഹരിമരുന്ന് ഉണ്ടെന്നാണ് കരുതുന്നത്. ഇത് പുറത്തെടുക്കാനായി യുവതി ആശുപത്രിയിൽ തന്നെ തുടരുകയാണ്. ദഹിക്കാത്ത തരത്തിലുള്ള ടേപ്പില്‍ പൊതിഞ്ഞ് ക്യാപ്സൂൾ രൂപത്തിലാക്കിയാണ് ഇവർ ലഹരിമരുന്ന് വിഴുങ്ങിയതെന്നാണ് ഉദ്യോ​ഗസ്ഥർ വ്യക്തമാക്കുന്നത്.

ഇത് കൊച്ചിയിലെത്തിച്ച് കൈമാറ്റം ചെയ്യാൻ കൊണ്ടുവന്നതാണെന്നും സൂചനയുണ്ട്. സംഭവത്തിൽ ഡിആർഐ അന്വേഷണം ഊർജ്ജിതമാക്കി. കൊച്ചി നെടുമ്പാശേരി അന്താരാഷ്ട്ര വിമാനത്താവളം വഴി ലഹരിക്കടത്ത് വ്യാപകമായതിനെ തുടർന്ന് ഉദ്യോഗസ്ഥർ പരിശോധന ശക്തമാക്കി.