Theft: പാലോട് ബിവറേജസ് ഔട്ട്ലെറ്റിൽ മോഷണം; മദ്യക്കുപ്പികളും സിസിടിവിയും മോഷ്ടിച്ചു

തിരുവനന്തപുരം: പാലോട് ബിവറേജസ് ഔട്ട്ലെറ്റിൽ മോഷണം. പൂട്ട് തകർത്ത് ആണ്  മോഷ്ടാക്കൾ അകത്ത് കയറിയത്. സിസിടിവിയുടെ ഹാർഡ് ഡിസ്കും മോണിറ്ററും മോഷ്ടിച്ചു. ഒരു മൊബൈൽ ഫോൺ കാണാതായിട്ടുണ്ട്. മദ്യ കുപ്പികൾ വലിച്ച് വാരിയിട്ട നിലയിൽ ആയിരുന്നു. 

കംപ്യൂട്ടറിന്റെയും മറ്റ് കേബിളുകളും  ഊരി മാറ്റിയ നിലയിൽ ആണ് കാണപ്പെട്ടത്. എത്ര രൂപയുടെ മദ്യം മോഷണം പോയെന്ന് സ്റ്റോക്ക് എടുത്താൽ മാത്രമേ അറിയാൻ കഴിയൂവെന്ന് അധികൃതർ പറഞ്ഞു.

പാലോട് പാണ്ഡ്യൻ പാറ വനമേഖലയോട് ചേർന്നാണ് വിദേശ മദ്യ ഷോപ്പ് സ്ഥിതി ചെയ്യുന്നത്. വാമനപുരം എക്സൈസ് വകുപ്പിന്റെ കീഴിൽ വരുന്ന ഷോപ്പാണ്. പാലോട് പോലീസ് സ്ഥലത്തെത്തി അന്വേഷണം ആരംഭിച്ചു.

വിരലടയാള വിദ​ഗ്ധരും സ്ഥലത്തെത്തി പരിശോധന നടത്തി. രാവിലെ പത്ത് മണിയോടെ ഷോപ്പ് മാനേജർ വന്നപ്പോൾ ഷട്ടറിൻ്റെ പൂട്ട് തകർത്ത നിലയിലായിരുന്നു. ഇന്നലെ ഷോപ്പ് അവധിയായിരുന്നു. മദ്യം തറയിൽ ഒഴിച്ചിട്ടുള്ളതായും കണ്ടെത്തി. സംഭവത്തിൽ പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.