Mobile Theft: കൊച്ചിയിലെ അലൻ വോക്കറുടെ ഷോയ്ക്കിടെ ഫോൺ മോഷണം; മൂന്നുപേർ ഡൽഹിയിൽ പിടിയിൽ!

കൊച്ചി: കൊച്ചിയിലെ അലൻ വോക്കറുടെ ഷോയ്ക്കിടെ മൊബൈലുകൾ മോഷ്ടിച്ച സംഭവത്തില്‍ മൂന്ന് പേർ ഡൽഹിയിൽ പിടിയിൽ.  ഒരാഴ്ചയായി പോലീസ് നടത്തിയ തിരച്ചിലിനിടയിലാണ് ഇവരെ രാജ്യ തലസ്ഥാനത്തു നിന്നും പിടികൂടിയത്. ഇവർ മോഷ്ടിച്ച 21 മൊബൈൽ ഫോണുകൾ കണ്ടെത്തിയിട്ടുണ്ട്. കൂടുതൽ പ്രതികൾക്കായി അന്വേഷണം തുടരുകയാണെന്ന് പോലീസ് അറിയിച്ചു. 

ഐഫോണും ആൻഡ്രോയിഡും ഉൾപ്പടെ 39 ഫോണുകളാണ് കൊച്ചി ബോൾഗാട്ടി പാലസ് ഗ്രൗണ്ടിലെ അലൻ വാക്കർ ഷോയ്ക്കിടെ നഷ്ടമായത്. പതിനായിരത്തോളം പേര്‍ പങ്കെടുത്ത മെഗാ ഡിജെ ഷോ സ്റ്റേജില്‍ അലന്‍ വാക്കര്‍ സംഗീതത്തിന്‍റെ ലഹരി പടര്‍ത്തുമ്പോഴായിരുന്നു സംഗീതാസ്വാദകര്‍ക്കിടയില്‍ വന്‍ കവര്‍ച്ച നടന്നത്. കാണികള്‍ക്കിടയിലേക്ക് കൃത്യമായ ആസൂത്രണത്തോടെ എത്തിയ കവര്‍ച്ച സംഘം നുഴഞ്ഞുകയറി. ചടുല താളത്തിനൊത്ത് നൃത്തം ചവിട്ടുന്നവരെ നോക്കിനിന്ന് മൊബൈല്‍ ഫോണുകള്‍ മോഷ്ടിക്കുകയായിരുന്നു എന്നാണ് പോലീസ് പറയുന്നത്. 

മൊബൈല്‍ ഫോണുകള്‍ എല്ലാം മോഷണം പോയത്  മുന്‍നിരയില്‍ 6000 രൂപയുടെ വിഐപി ടിക്കറ്റെടുത്ത് സംഗീതമാസ്വദിച്ചവരില്‍ നിന്നാണ്. അലൻ വാക്കറുടെ ബാംഗ്ലൂർ ഷോയ്ക്കിടെയും ഫോണുകൾ നഷ്ടപ്പെട്ടിരുന്നു.  ഈ മോഷണ സംഘമാണോ അതിനു പിന്നിലെന്നും പോലീസ് അന്വേഷിക്കുന്നുണ്ട്. ഫോണുകൾ പലതും ഓഫ്‍ലൈൻ മോഡിലാകുമ്പോൾ പഴയ ലൊക്കേഷൻ വിവരം ലഭിക്കുന്നത് അന്വേഷണ സംഘത്തെ കുഴച്ചിരുന്നു. ഡൽഹിയിലെ ചോർ ബസാറിൽ മൊബൈലുകളെത്തിയെന്ന വിവരത്തിന്‍റെ അടിസ്ഥാനത്തിലാണ് അന്വേഷണ സംഘം ഡൽഹിയിലേക്ക് തിരിച്ചത്. 

ഫോണുകളുടെ ലൊക്കേഷന്‍ കേന്ദ്രീകരിച്ച് നടത്തിയ അന്വേഷണത്തിലാണ് മോഷണ സംഘം വലയിലായത്. പിടിയിലായവരെ ചോദ്യം ചെയ്തു വരുകയാണ്. സിറ്റി പോലീസിലെ രണ്ട് ടീമുകള്‍ ഡല്‍ഹിയിലുണ്ട്.  പ്രതികൾ രണ്ട് സംഘങ്ങളായി തിരിഞ്ഞാണ് ഫോണ്‍ മോഷണം നടത്തിയതെന്നും അന്വേഷണ സംഘം കണ്ടെത്തിയിട്ടുണ്ട്.