Crime News: ആനക്കൊമ്പ് വിൽപനയ്ക്കെത്തിയ സംഘം വനംവകുപ്പിന്റെ പിടിയിൽ!

വെള്ളനാട്. ആനക്കൊമ്പുകൾ വിൽപന നടത്താനുള്ള ശ്രമത്തിനിടെ രണ്ടുപേർ പിടിയിൽ.  വെള്ളനാട് സ്വദേശി നിബു ജോൺ, വിതുര മേമല സ്വദേശി വിനീത് എന്നിവരെയാണ് വനംവകുപ്പ് അധികൃതർ അറസ്റ്റ് ചെയ്തത്. 

 4 കിലോയോളം തൂക്കം വരുന്ന രണ്ട് ആനക്കൊമ്പുകൾ വിൽപന നടത്താൻ ശ്രമിക്കുന്നതിനിടെയാണ് ഇവർ പിടിയിലായത്. ഇവർ ഇന്നലെ വൈകുന്നേരംട്ട് 6 മണിയോടെ വെള്ളനാട് ഗവ.എൽപി സ്കൂളിന് സമീപത്ത് വച്ച് ആനക്കൊമ്പ് വിൽപന നടത്താൻ ശ്രമിക്കുകയായിരുന്നു. സംഭവത്തിൽ ഒരാളെ കൂടി കസ്റ്റഡിയിൽ എടുത്തിട്ടുണ്ട്. നിബു ജോണിന്റെ വീട്ടിൽ സൂക്ഷിച്ചിരിക്കുകയായിരുന്നു ആന‌ക്കൊമ്പുകൾ എന്നാണ് വിവരം. ഫോറസ്റ്റ് ഇന്റലിജൻസുകാർ നടത്തിയ ഓപറേഷനിലാണ് ഇവർ പിടിയിലാകുന്നത്. 

രഹസ്യ വിവരം ലഭിച്ചതിനെ തുടർന്ന് സംഭവ സ്ഥലത്ത് സ്‌ക്വാഡ് നിരീക്ഷണം നടത്തുകയായിരുന്നു. ഇവരിൽ നിന്നും ഒരു സ്കൂട്ടറും ഒരു ബൈക്കും കസ്റ്റഡിയിൽ എടുത്തിട്ടുണ്ട്. സ്‌ക്വാഡ് ഡിഎഫ്ഓ ശ്രീലേഖയുടെ നേതൃത്വത്തിൽ ആയിരുന്നു ആനക്കൊമ്പ് പിടികൂടിയത്. ആനക്കൊമ്പ് വാങ്ങാൻ എത്തിയവർ ഓടി രക്ഷപ്പെടുകയായിരുന്നു.  ഇവരെ ഇന്ന് കോടതിയിൽ ഹാജരാക്കും. 

പിടികൂടിയ ആനക്കൊമ്പ് നഗരത്തിലെ ഒരു വീട്ടിൽ നിന്ന് മോഷ്ടിച്ചതാണെന്നാണ് പ്രതികൾ മൊഴി നൽകിയത്. പരുത്തിപ്പള്ളി റേഞ്ച് ഓഫീസർ ശ്രീജു എസ്,ചൂളിയമല സെഷൻ ഫോറെസ്റ് ഓഫീസർ അനീഷ് കുമാർ,ബീറ്റ് ഫോറസ്റ്റ് ഓഫീസ് വിനോദ്, വാച്ചർ പ്രദീപ് എന്നിവർ ഉൾപ്പെട്ട സംഘമാണ് ഇൻ്റലിജൻസ് ഉദ്യോഗസ്ഥർക്കു ഒപ്പം പ്രതികളെ പിടികൂടിയത്.