Crime News: പൈനാവ് ആക്രമണത്തിന് പിന്നിൽ വിവാഹ മോചനം ആവശ്യപ്പെട്ടതിലുള്ള വൈരാഗ്യം; സന്തോഷ്‌ ലക്ഷമിട്ടത് ഭാര്യ വീട്ടുകാരെ വകവരുത്താൻ

ഇടുക്കി: പൈനാവ് ആക്രമണത്തിന് പിന്നിൽ വിവാഹ മോചനം ആവശ്യപ്പെട്ടതിലുള്ള വൈരാഗ്യമെന്ന് പോലീസ് സൂപ്രണ്ട് വിഷ്ണു പ്രദീപ് പറഞ്ഞു. പ്രതി സന്തോഷ്‌ ഭാര്യ വീട്ടുകാരെ വകവരുത്താനാണ് ലക്ഷമിട്ടത്. ആശുപത്രിയിൽ നിന്ന് ഭാര്യാ മാതാവും  കുടുംബവും തിരികെയെത്തി എന്ന ധാരണയിലാണ് വീടുകൾക് തീവച്ചത്.

ഭാര്യ വീട്ടുകാരെ വകവരുത്തുക എന്ന ലക്ഷ്യം ഇയാൾക്ക് ഉണ്ടായിരുന്നതായും നിലവിൽ ആശുപത്രിയിൽ ചികിത്സയിലുള്ള ഭാര്യാ മാതാവും ഭാര്യയുടെ സഹോദരനും വീട്ടിലെത്തിയിട്ടുണ്ടെന്നുള്ള നിഗമനത്തിലാണ് പുലർച്ചെ ഇയാൾ വീടുകൾക്ക് തീവച്ചതെന്ന് ചോദ്യം ചെയ്യലിൽ നിന്ന്  മനസ്സിലാക്കുന്നതായും പോലീസ് സൂപ്രണ്ട് വ്യക്തമാക്കി.

കഴിഞ്ഞ ദിവസം ഭാര്യാ മാതാവിനെയും ചെറുമകളെയും തീ വച്ച്  കൊലപ്പെടുത്താൻ ശ്രമിച്ച ശേഷം തമിഴ്നാട്ടിലേക്ക് കടന്ന പ്രതി വീണ്ടും പൈനാവിൽ എത്തി. ഇതിന് ശേഷം, വീടുകൾക് നേരെ ആക്രമണം നടത്തുകയായിരുന്നു. വീണ്ടും തമിഴ്‌നാട്ടിലേക്ക് കടക്കാൻ ശ്രമിക്കുന്നതിനിടെ ബോഡിമെട്ടിൽ നിന്നാണ് ഇയാളെ പിടികൂടിയത്.