Alaskapox: ആശ്വസിക്കാറായിട്ടില്ല..! കോവിഡിന് പിന്നാലെ പുതിയ വൈറസ്, അലാസ്‌കപോക്‌സ് പരക്കുന്നു

കോവിഡ് മഹാമാരിയുടെ പിടിയിൽ നിന്ന് ലോകം മോചിതമായി വരുന്നതിനിടെ ആശങ്ക പരത്തി പുതിയ വൈറസ്. അലാസ്കപോക്സ് എന്ന വൈറസാണ് അമേരിക്കയിൽ ഭീതി പരത്തുന്നത്. ഡിസീസ് എക്‌സും സോംബി വൈറസുകളും ഇപ്പോഴും ആശങ്കയായി തുടരുന്ന സാഹചര്യത്തിലാണ് അലാസ്കപോക്സുമായി ബന്ധപ്പെട്ട റിപ്പോർട്ടുകൾ പുറത്തുവരുന്നത്. 

അലാസ്കപോക്സ് വൈറസ് ബാധിച്ച് ഒരാൾക്ക് അമേരിക്കയിൽ ജീവൻ നഷ്ടമായതായാണ് വിവരം. 2015 ലാണ് ഈ രോഗം ആദ്യമായി പ്രത്യക്ഷപ്പെട്ടത്. അലാസ്കപോക്സ് എന്ന പുതിയതും അപൂർവവുമായ വൈറസ് ബാധിച്ച് അലാസ്കയിൽ അന്ന് ഒരാൾ മരിച്ചു. അന്ന് മുതലാണ് ഈ വൈറസിന് അലാസ്കപോക്സ് എന്ന പേര് ലഭിച്ചത്. ആദ്യമായി രോ​ഗം റിപ്പോർട്ട് ചെയ്തതിന് പിന്നാലെ മറ്റ് 7 പേർക്ക് കൂടി സമാനമായ വൈറസ് ബാധയേറ്റതായി കണ്ടെത്തിയിരുന്നു. എന്നാൽ ഇതാദ്യമായാണ് അമേരിക്കയിൽ ഈ വൈറസ് ബാധിച്ച് ഒരാൾ മരിക്കുന്നത്. പ്രായമായ ആളാണ് മരിച്ചത്. മരിച്ചയാൾക്ക് പ്രതിരോധശേഷിയും വളരെ കുറവായിരുന്നു എന്നാണ് റിപ്പോർട്ട്.

സാധാരണയായി ചെറിയ മൃ​ഗങ്ങളിലാണ് ഈ രോ​ഗം കണ്ടുവരുന്നത്. എന്നാൽ മൃ​ഗങ്ങളിൽ നിന്ന് മനുഷ്യരിലേയ്ക്ക് ഇത് പകരുന്നതായി തെളിവുകളൊന്നും ഇതുവരെ ലഭിച്ചിട്ടില്ല. മരിച്ചയാൾക്ക് എങ്ങനെയാണ് രോഗം ബാധിച്ചത് എന്നതിനെ കുറിച്ച് വിവരങ്ങൾ ലഭ്യമായിട്ടുമില്ല. രോ​ഗം ബാധിച്ച് മരിച്ചയാൾ വനത്തിന് സമീപമാണ് താമസിച്ചിരുന്നത്. മേഖലയിൽ അലഞ്ഞുതിരിഞ്ഞിരുന്ന പൂച്ചകളെ ഇയാൾ പരിപാലിച്ചിരുന്നു. പൂച്ചകളിൽ നടത്തിയ പരിശോധനയിൽ രോ​ഗം കണ്ടെത്താനായില്ല. രോ​ഗം ബാധിച്ച എലിയ പൂച്ച ഭക്ഷിച്ചിരിക്കാമെന്നും ഈ പൂച്ചയുടെ നഖം കൊണ്ട് വ്യക്തിയിലേയ്ക്ക് വൈറസ് പടർന്നിരിക്കാമെന്നുമാണ് നി​ഗമനം. 

അലാസ്കപോക്‌സിൻ്റെ ലക്ഷണങ്ങൾ 

ത്വക്കിനേൽക്കുന്ന ക്ഷതമാണ് അലാസ്കപോക്സ് വൈറസിൻ്റെ പ്രധാന ലക്ഷണങ്ങൾ. ലിംഫ് നോഡുകൾക്ക് വീക്കം, സന്ധി വേദന അല്ലെങ്കിൽ പേശി വേദന എന്നിവയാണ് പ്രധാന ലക്ഷണങ്ങൾ. ദുർബലമായ പ്രതിരോധശേഷി ഉള്ള ആളുകൾക്ക് ഈ രോഗം വരാനുള്ള സാധ്യത കൂടുതലാണെന്ന് പഠനങ്ങൾ തെളിയിച്ചിട്ടുണ്ട്. ശരിയായ പരിചരണം നൽകണമെന്നാണ് ഡോക്ടർമാർ അഭിപ്രായപ്പെടുന്നത്.