Dark circles: കണ്ണിന് ചുറ്റുമുള്ള കറുത്ത പാട് കുറയ്ക്കാം... വീട്ടിൽ തന്നെയുണ്ട് മാർ​ഗങ്ങൾ

പിഗ്മെന്റേഷൻ എന്ന് വിളിക്കപ്പെടുന്ന കണ്ണിന് താഴെയുള്ള ഇരുണ്ട വൃത്തങ്ങൾ പലരെയും ബാധിക്കുന്ന ഒരു പ്രശ്നമാണ്. കണ്ണുകൾക്ക് താഴെയുള്ള ഇരുണ്ട വൃത്തം നിങ്ങളെ ക്ഷീണിതരായും പ്രായക്കൂടുതൽ ഉള്ളവരായും തോന്നിപ്പിക്കുന്നതിന് കാരണമാകും. കണ്ണിന് ചുറ്റും കറുത്ത വൃത്തങ്ങൾ പ്രത്യക്ഷപ്പെടുന്നതിന് ജനിതകശാസ്ത്രം, ഉറക്കക്കുറവ്, വാർധക്യം എന്നിങ്ങനെ നിരവധി ഘടകങ്ങൾ ഉണ്ടെങ്കിലും, ലളിതമായ വീട്ടുവൈദ്യങ്ങൾ ഉപയോഗിച്ച് നിങ്ങൾക്ക് അവയെ ഫലപ്രദമായി കൈകാര്യം ചെയ്യാൻ കഴിയും. കണ്ണിന് താഴെയുള്ള പിഗ്മെന്റേഷനെ ചെറുക്കാൻ സഹായിക്കുന്ന അഞ്ച് പ്രകൃതിദത്ത പരിഹാരങ്ങൾ എന്തെല്ലാമാണെന്ന് നോക്കാം.

വെള്ളരിക്ക: വെള്ളരിക്ക കണ്ണിന് ചുറ്റുമുള്ള കറുത്ത വൃത്തം കുറയ്ക്കുന്നതിന് ഒരു മികച്ച പ്രതിവിധിയാണ്. വെള്ളരിക്ക ആന്റി ഓക്‌സിഡന്റുകളാൽ സമ്പുഷ്ടമായതിനാൽ ചർമ്മത്തിന് നിരവധി ​ഗുണങ്ങൾ നൽകും. വെള്ളരിക്ക കഷണങ്ങൾ കുറച്ച് സമയത്തേക്ക് റഫ്രിജറേറ്ററിൽ വയ്ക്കുക. കണ്ണുകൾ അടച്ച് ഈ തണുത്ത കഷ്ണങ്ങൾ കണ്ണിന് മുകളിൽ 10-15 മിനിറ്റ് വയ്ക്കുക. തണുപ്പ് നീർക്കെട്ട് കുറയ്ക്കുകയും കണ്ണിന് താഴെയുള്ള ഭാഗത്തെ കറുത്ത വൃത്തത്തെ കുറയ്ക്കുകയും ചെയ്യും.

ഉരുളക്കിഴങ്ങ്: ഉരുളക്കിഴങ്ങിൽ പിഗ്മെന്റേഷൻ കുറയ്ക്കാൻ സഹായിക്കുന്ന പ്രകൃതിദത്ത ബ്ലീച്ചിംഗ് ഏജന്റുകളും എൻസൈമുകളും അടങ്ങിയിട്ടുണ്ട്. ഉരുളക്കിഴങ്ങിന്റെ നേർത്ത കഷ്ണങ്ങൾ മുറിച്ച് കണ്ണുകൾ അടച്ച് ഇവ 15-20 മിനിറ്റ് കണ്ണുകളിൽ വയ്ക്കുക. ഇത് പതിവായി ഉപയോ​ഗിക്കുന്നത് കണ്ണുകൾക്ക് ചുറ്റുമുള്ള കറുത്ത വൃത്തം കുറയ്ക്കാൻ സഹായിക്കും. ചില ആളുകൾക്ക് ഉരുളക്കിഴങ്ങിന്റെ നീര് അലർജിയുണ്ടാക്കാൻ സാധ്യതയുണ്ട്. അതിനാൽ ആദ്യം ഇവ കൈകളിലോ കാലുകളിലോ അലർജി ടെസ്റ്റ് നടത്തിയ ശേഷം മാത്രം ഉപയോ​ഗിക്കുക.

ടീ ബാഗ്: ഗ്രീൻ അല്ലെങ്കിൽ ബ്ലാക്ക് ടീ പോലുള്ള കഫീൻ അടങ്ങിയ ടീ ബാഗുകൾ രക്തക്കുഴലുകളെ സങ്കോചിപ്പിക്കാനും കണ്ണിന് താഴെയുള്ള നീർവീക്കം കുറയ്ക്കാനും സഹായിക്കും. ടീ ബാഗുകൾ അൽപനേരം ഫ്രിഡ്ജിൽ വയ്ക്കുക, അതിന് ശേഷം 10-15 മിനിറ്റ് കണ്ണുകൾക്ക് മുകളിൽ വയ്ക്കുക. ചായയിലെ ടാന്നിൻ കണ്ണിന് ചുറ്റുമുള്ള ഇരുണ്ട വൃത്തങ്ങൾ മാറ്റാൻ സഹായിക്കും.

ബദാം ഓയിൽ: ബദാം ഓയിൽ വിറ്റാമിൻ ഇയാൽ സമ്പുഷ്ടമാണ്, ഇത് കണ്ണുകൾക്ക് താഴെയുള്ള അതിലോലമായ ചർമ്മത്തെ പോഷിപ്പിക്കുകയും മോയ്സ്ചറൈസ് ചെയ്യുകയും ചെയ്യുന്നു. ഉറക്കസമയത്തിന് മുമ്പ് കണ്ണിന് ചുറ്റും ഇരുണ്ട വൃത്തങ്ങളിൽ ഏതാനും തുള്ളി ബദാം ഓയിൽ മൃദുവായി മസാജ് ചെയ്യുക. രാത്രി മുഴുവൻ അത് വിശ്രമിക്കാൻ അനുവദിക്കുക. സ്ഥിരമായ ഉപയോഗത്തിലൂടെ, പിഗ്മെന്റേഷൻ ലഘൂകരിക്കാൻ ബദാം ഓയിൽ സഹായിക്കും.

മഞ്ഞൾ പേസ്റ്റ്: ആന്റി-ഇൻഫ്ലമേറ്ററി ​ഗുണങ്ങളും ചർമ്മത്തിന് തിളക്കം നൽകുന്ന ഗുണങ്ങളുമുള്ള ശക്തമായ പ്രകൃതിദത്ത ഘടകമാണ് മഞ്ഞൾ. ഒരു നുള്ള് മഞ്ഞൾപ്പൊടി കുറച്ച് തുള്ളി പാലിലോ റോസ് വാട്ടറിലോ കലർത്തി പേസ്റ്റ് രൂപത്തിലാക്കുക. ഈ പേസ്റ്റ് കണ്ണിന് ചുറ്റുമുള്ള ഇരുണ്ട വൃത്തങ്ങളിൽ പുരട്ടുക, 10-15 മിനിറ്റ് വിശ്രമിക്കാൻ അനുവദിക്കുക, തുടർന്ന് കഴുകിക്കളയുക. മഞ്ഞൾ ഉപയോഗിക്കുമ്പോൾ ശ്രദ്ധിക്കുക. കാരണം ഇത് ചർമ്മത്തിൽ കറയുണ്ടാക്കും, അതിനാൽ ഇത് മിതമായ അളവിൽ ഉപയോഗിക്കുക.