High Cholesterol Diet: കൊളസ്ട്രോൾ വില്ലനാകുന്നോ? ഈ ഭക്ഷണങ്ങൾ കഴിക്കാം

അനാരോഗ്യകരമായ ഭക്ഷണ ശീലങ്ങൾ വർധിക്കുന്നതിനാൽ ഇന്ത്യയിൽ കൊളസ്ട്രോൾ രോ​ഗികളുടെ എണ്ണം ഉയരുകയാണ്. കൊളസ്ട്രോൾ വർധിക്കുന്നത് ഹൃദയ സംബന്ധമായ പ്രശ്‌നങ്ങൾക്ക് കാരണമാകുന്നു. 2022-ൽ 32,000-ത്തിലധികം വ്യക്തികൾ ഹൃദയാഘാതം മൂലം മരിച്ചതായാണ് കണക്കുകൾ വ്യക്തമാക്കുന്നത്.

ആരോ​ഗ്യകരമായ ഭക്ഷണക്രമം പിന്തുടരുന്നത് കൊളസ്‌ട്രോളിൻ്റെ അളവ് നിയന്ത്രിക്കുന്നതിൽ നിർണായക പങ്ക് വഹിക്കുന്നു. ബദാം, ഓട്‌സ് തുടങ്ങിയ ഭക്ഷണങ്ങൾ ഡയറ്റിൽ ഉൾപ്പെടുത്തുന്നത് എൽഡിഎൽ കൊളസ്ട്രോൾ ഗണ്യമായി കുറയ്ക്കുകയും ഹൃദയത്തിന്റെ ആരോ​ഗ്യം മികച്ചതാക്കുകയും ചെയ്യും. എൽഡിഎൽ കൊളസ്ട്രോൾ കുറയ്ക്കാൻ സഹായിക്കുന്ന ഭക്ഷണങ്ങൾ ഏതെല്ലാമാണെന്ന് അറിയാം.

ബദാം: ബദാം പോഷക സമ്പുഷ്ടമാണ്. ബദാം ഹൃദയത്തിന് ​ഗുണം ചെയ്യുന്ന ആരോഗ്യകരമായ കൊഴുപ്പുകൾ, വിറ്റാമിനുകൾ, ധാതുക്കൾ എന്നിവയാൽ സമ്പന്നമാണ്. ഇത് നിങ്ങളുടെ ഭക്ഷണത്തിൽ നിർബന്ധമായും ചേർക്കേണ്ടതാണ്. ബദാം മൊത്തം കൊളസ്‌ട്രോളും എൽഡിഎൽ കൊളസ്‌ട്രോളും കുറയ്ക്കുകയും ഹൃദയത്തിന് ദോഷമാകുന്ന വീക്കം കുറയ്ക്കുകയും ചെയ്യും.

ഓട്‌സ്: ലയിക്കുന്ന നാരുകളാൽ സമ്പന്നമായ ഓട്‌സ് ഹൃദയത്തിന്റെ ആരോ​ഗ്യത്തിന് ​ഗുണം ചെയ്യുന്നു. ഇത് ദഹന വ്യവസ്ഥയെ മികച്ചതാക്കുകയും കൊളസ്ട്രോളിന്റെ അളവ് കുറയ്ക്കുകയും ചെയ്യുന്നു. പ്രഭാതഭക്ഷണമായി ഓട്സ് കഴിക്കുന്നത് ശരീരത്തിലെ വിഷാംശങ്ങൾ ഇല്ലാതാക്കാനും ദഹനം മികച്ചതാക്കാനും സഹായിക്കും.

പയറുവർ​ഗങ്ങൾ: ബീൻസ്, പയർ, ചെറുപയർ എന്നിവ ലയിക്കുന്ന നാരുകൾ, പ്രോട്ടീൻ, ധാതുക്കൾ എന്നിവയാൽ സമ്പന്നമായ പയറുവർ​ഗങ്ങളാണ്. ഈ പോഷക സാന്ദ്രമായ ഭക്ഷണങ്ങൾ രക്തത്തിലെ കൊളസ്ട്രോളിൻ്റെ ആഗിരണം കുറയ്ക്കുന്നതിലൂടെ എൽഡിഎൽ കൊളസ്ട്രോളിന്റെ അളവ് കുറയ്ക്കാൻ സഹായിക്കും.

അവോക്കാഡോ: ആന്റി ഓക്സിഡന്റുകൾ, നാരുകൾ, മോണോസാച്ചുറേറ്റഡ് കൊഴുപ്പുകൾ എന്നിവയുൾപ്പെടെയുള്ള പോഷകങ്ങളാൽ സമ്പന്നമാണ് അവോക്കാഡോ. ഇത് എൽഡിഎൽ കൊളസ്ട്രോളിൻ്റെ അളവ് കുറയ്ക്കുകയും ഹൃദയത്തിന്റെ ആരോ​ഗ്യം മികച്ചതാക്കുകയും ചെയ്യുന്നു.

ബെറിപ്പഴങ്ങൾ: സ്ട്രോബെറി, ബ്ലൂബെറി, റാസ്ബെറി, ബ്ലാക്ക്ബെറി എന്നിവയിൽ ആൻ്റി ഓക്‌സിഡൻ്റുകളും നാരുകളും ധാരാളമായി അടങ്ങിയിട്ടുണ്ട്. ഇത് എൽഡിഎൽ കൊളസ്‌ട്രോളിൻ്റെ അളവ് കുറയ്ക്കാനും ഹൃദ്രോഗ സാധ്യത കുറയ്ക്കാനും സഹായിക്കുന്നു. കൊളസ്ട്രോൾ കുറയ്ക്കുന്നതിലൂടെ ഹൃദയത്തിന്റെ ആരോ​ഗ്യം മികച്ചതാക്കാനും ഹൃദ്രോ​ഗങ്ങൾക്കുള്ള സാധ്യത കുറയ്ക്കാനും സാധിക്കും.