Cholesterol: ശരീരത്തിൽ എച്ച്‍‍ഡിഎൽ കൊളസ്ട്രോൾ വർധിപ്പിക്കാൻ ഈ ജീവിതശൈലി മാറ്റങ്ങൾ അനിവാര്യം

ഉയർന്ന സാന്ദ്രതയുള്ള ലിപ്പോപ്രോട്ടീൻ (ഹൈ ഡെൻസിറ്റി ലിപ്പോ പ്രോട്ടീൻ) അഥവാ എച്ച്ഡിഎൽ കൊളസ്ട്രോൾ ശരീരത്തിന് ആവശ്യമായ നല്ല കൊളസ്ട്രോളായി കണക്കാക്കപ്പെടുന്നു. ലോ ഡെൻസിറ്റി ലിപ്പോ പ്രോട്ടീൻ അഥവാ എൽഡിഎൽ കൊളസ്ട്രോൾ ചീത്ത കൊളസ്ട്രോളാണ്.

ഇത് ധമനികളിൽ അടിഞ്ഞുകൂടി ഓക്സിജൻ പ്രവാഹവും രക്തപ്രവാഹവും തടയുന്നു. രക്തത്തിൽ എൽഡിഎൽ കൊളസ്ട്രോൾ വർധിക്കുന്നത് ഹൃദയാഘാതം പോലുള്ള ​ഗുരുതരമായ ആരോ​ഗ്യാവസ്ഥകളിലേക്ക് നയിക്കും.

ശരീരത്തിൽ ചീത്ത കൊളസ്ട്രോളിന്റെ അളവ് കുറയ്ക്കുന്നത് പോലെ പ്രധാനമാണ് നല്ല കൊളസ്ട്രോളിന്റെ അളവ് വർധിപ്പിക്കുന്നതും. ചില ഭക്ഷണങ്ങൾ ഡയറ്റിൽ ഉൾപ്പെടുത്തുന്നത് നല്ല കൊളസ്ട്രോളിന്റെ അളവ് വർധിപ്പിക്കാൻ സഹായിക്കും.

ആരോ​ഗ്യകരമായ ഡയറ്റ്  പിന്തുടരുന്നതിനൊപ്പം വ്യായാമം ശീലമാക്കേണ്ടതും പ്രധാനമാണ്. കൊളസ്ട്രോളിന്റെ അളവ് ആരോ​ഗ്യകരമായി നിലനിർത്തുന്നതിന് ജീവിതശൈലിയിൽ ശ്രദ്ധിക്കേണ്ട കാര്യങ്ങൾ എന്തെല്ലാമാണെന്ന് നോക്കാം.

വ്യായാമം: പതിവ് വ്യായാമം ശീലമാക്കുന്നത് കൊളസ്ട്രോളിന്റെ അളവ് കുറയ്ക്കാൻ പ്രധാനമാണ്. നടത്തം, ഓട്ടം, സൈക്ലിങ്, നീന്തൽ തുടങ്ങിയ വ്യായാമങ്ങൾ കൊളസ്ട്രോളിന്റെ അളവ് കുറയ്ക്കുന്നതിനും മൊത്തത്തിലുള്ള ആരോ​ഗ്യം മികച്ചതാക്കുന്നതിനും സഹായിക്കും.

ആരോ​ഗ്യകരവും അനാരോ​ഗ്യകരവുമായ കൊഴുപ്പുകൾ: അവോക്കാഡോ, നട്സ് എന്നിവയിൽ കാണപ്പെടുന്നത് ആരോ​ഗ്യകരമായ കൊഴുപ്പുകളാണ്. ഇത് ആരോ​ഗ്യത്തിന് ​ഗുണം ചെയ്യും. ജങ്ക് ഫുഡുകൾ കഴിക്കുന്നത് പകരം ആരോ​ഗ്യകരമായ കൊഴുപ്പുകൾ അടങ്ങിയ ഭക്ഷണങ്ങൾ തിരഞ്ഞെടുക്കുക.

ഒമേ​ഗ-3 ഫാറ്റി ആസിഡ്: മത്സ്യം, ഫ്ലാക് സീഡ്, ചിയ വിത്തുകൾ, വാൽനട്ട് എന്നിവയിൽ ഒമേ​ഗ-3 ഫാറ്റി ആസിഡ് അടങ്ങിയിട്ടുണ്ട്. ഒമേ​ഗ-3 ഫാറ്റി ആസിഡുകൾ അടങ്ങിയ ഭക്ഷണം കഴിക്കുന്നത് എച്ച്ഡിഎൽ കൊളസ്ട്രോളിന്റെ അളവ് വർധിപ്പിക്കാൻ സഹായിക്കും.

പഞ്ചസാര കുറയ്ക്കുക: കൃത്രിമ മധുരം ചേർത്ത ഭക്ഷണങ്ങളും പാനീയങ്ങളും ഉപേക്ഷിക്കുക. വൈറ്റ് ബ്രെഡ്, പാസ്ത തുടങ്ങിയ ശുദ്ധീകരിച്ച കാർബോഹൈഡ്രേറ്റ് ഭക്ഷണങ്ങൾ കുറയ്ക്കുക. പഞ്ചസാരയുടെ ഉപയോ​ഗം ഒഴിവാക്കുന്നത് എച്ച്ഡിഎൽ കൊളസ്ട്രോൾ വർധിപ്പിക്കും.

പുകവലി ഉപേക്ഷിക്കുക: പുകവലി എച്ച്ഡിഎൽ കൊളസ്ട്രോളിന്റെ അളവ് കുറയ്ക്കുകയും വിവിധ ആരോ​ഗ്യപ്രശ്നങ്ങൾക്കുള്ള സാധ്യത വർധിപ്പിക്കുകയും ചെയ്യുന്നു. അതിനാൽ, പുകവലി ഉപേക്ഷിക്കേണ്ടത് പ്രധാനമാണ്.