Immunity Booster: രോ​ഗപ്രതിരോധശേഷി മികച്ചതാക്കാനും ഊർജം ലഭിക്കാനും ഈ ഹെർബൽ ചായകൾ കുടിക്കാം

ഭൂരിഭാ​ഗം ആളുകളും ദിവസം ആരംഭിക്കുന്നത് ഒരു ​ഗ്ലാസ് ചായ കുടിച്ചായിരിക്കും. പ്രഭാതത്തിൽ ഒരു ചായ കുടിക്കുന്നത് ഊർജം നൽകാൻ സഹായിക്കുന്നു. ഹെർബൽ ചായ കുടിക്കുന്നത് മൊത്തത്തിലുള്ള ആരോ​ഗ്യം മികച്ചതാക്കാനും പ്രതിരോധശേഷി വർധിപ്പിക്കാനും സഹായിക്കുന്നു. ഇത് ദഹനസംബന്ധമായ പ്രശ്നങ്ങൾ ഒഴിവാക്കാനും ശരീരത്തിൽ ആവശ്യത്തിന് ജലാംശം നിലനിർത്താനും സഹായിക്കുന്നു.

ഹെർബൽ ടീയിൽ കലോറി കുറവായതിനാൽ ഇവ ആരോ​ഗ്യത്തിന് ​ഗുണം ചെയ്യും. ഇവയുടെ ഔഷധ ​ഗുണങ്ങൾ ശരീരത്തിന് വിശ്രമം നൽകാനും സഹായിക്കും. അതിനാൽ, നിങ്ങളുടെ ദിനചര്യയിൽ ഹെർബൽ ടീ ഉൾപ്പെടുത്തുന്നത് ആരോ​ഗ്യത്തിന് ​ഗുണം ചെയ്യും. നിങ്ങളുടെ ദിനചര്യയിൽ ഉൾപ്പെടുത്താവുന്ന ഹെർബൽ ചായകൾ ഏതെല്ലാമാണെന്ന് അറിയാം.

ഹണി ലെമൺ ജിഞ്ചർ ടീ: ഇഞ്ചി, നാരങ്ങ, തേൻ എന്നിവ ധാരാളം ആരോ​ഗ്യ ​ഗുണങ്ങളുള്ളവയാണ്. ഇഞ്ചിയിലും നാരങ്ങയിലും വിറ്റാമിൻ സി ധാരാളമായി അടങ്ങിയിരിക്കുന്നു. ഇത് രോ​ഗപ്രതിരോധശേഷി വ‍ർധിപ്പിക്കാൻ സഹായിക്കുന്നു. ദഹനസംബന്ധമായ പ്രശ്നങ്ങൾക്കും ഇഞ്ചി മികച്ചതാണ്.

ചെമ്പരത്തി ചായ: ചെമ്പരത്തി ചായ ഹൃദയാരോ​ഗ്യം മെച്ചപ്പെടുത്തും. ഇത് രക്തചംക്രമണം മികച്ചതാക്കുന്നു. ഇത് കൊളസ്ട്രോളിന്റെ അളവ് കുറയ്ക്കുകയും പ്രതിരോധശേഷി വർധിപ്പിക്കുകയും ചെയ്യുന്നു. ഈ ഹെർബൽ ചായ അണുബാധകളെ ചെറുക്കാൻ സഹായിക്കുന്നു.

പുതിന ഇഞ്ചി ചായ: പുതിനയും ഇഞ്ചിയും ചേർത്ത ചായ കുടിക്കുന്നത് മൊത്തത്തിലുള്ള ആരോ​ഗ്യം വർധിപ്പിക്കാൻ സഹായിക്കും. ദഹനപ്രശ്നങ്ങൾ കുറയ്ക്കുകയും വയറുമായി ബന്ധപ്പെട്ട ആരോ​ഗ്യപ്രശ്നങ്ങൾ കുറയ്ക്കുകയും ചെയ്യും. പുതിന ഊർജ്ജം നൽകാൻ സഹായിക്കുന്നു.

തുളസി അശ്വ​ഗന്ധ ചായ: തുളസിയും അശ്വ​ഗന്ധയും നിരവധി ഔഷധ ​ഗുണങ്ങളുള്ളതാണ്. ശരീരത്തിന് ആവശ്യമായ ഊർജം ലഭിക്കാൻ തുളസിയും അശ്വ​ഗന്ധയും ചേർത്ത ചായ കുടിക്കുന്നത് നല്ലതാണ്. ഇത് സമ്മർദ്ദം കുറയ്ക്കാനും മൊത്തത്തിലുള്ള ആരോ​ഗ്യം മികച്ചതാക്കാനും സഹായിക്കുന്നു.

മഞ്ഞൾ ചായ: മഞ്ഞളിൽ കാണപ്പെടുന്ന കുർക്കുമിൻ എന്ന സംയുക്തം നിരവധി ആരോ​ഗ്യ​ഗുണങ്ങൾ നൽകുന്നു. ഇത് ആന്റി ഇൻഫ്ലമേറ്ററി ​ഗുണങ്ങളുള്ളതാണ്. ഇത് പ്രതിരോധശേഷി വർധിപ്പിക്കുന്നതിനും ദഹനം മെച്ചപ്പെടുത്തുന്നതിനും ഹൃദയാരോ​ഗ്യം മികച്ചതാക്കുന്നതിനും സഹായിക്കുന്നു.