LDL Cholesterol: എൽഡിഎൽ കൊളസ്ട്രോൾ കുറയ്ക്കാം; ഈ ഭക്ഷണങ്ങൾ ഒഴിവാക്കണം

രക്തത്തിൽ കൊളസ്ട്രോളിന്റെ അളവ് വർധിക്കുന്നത് ഹൃദയാരോ​ഗ്യത്തെ ദോഷകരമായി ബാധിക്കും. ആരോഗ്യകരമായ ഭക്ഷണശീലം പിന്തുടരുന്നത് രക്തത്തിലെ ചീത്ത കൊളസ്ട്രോളിനെ നിയന്ത്രിക്കാൻ സഹായിക്കും. പുകവലി, അമിത മദ്യപാനം, വ്യായാമം ഇല്ലായ്മ തുടങ്ങിയവയൊക്കെ രക്തത്തിൽ കൊളസ്ട്രോളിന്റെ അളവ് വർധിക്കാൻ കാരണമാകും. കൊളസ്ട്രോൾ കുറയ്ക്കാൻ ഒഴിവാക്കേണ്ട ചില ഭക്ഷണങ്ങൾ ഇവയാണ്.

റെഡ് മീറ്റ്: ബീഫ്, പോർക്ക്, മട്ടൻ തുടങ്ങിയ റെഡ് മീറ്റിലെല്ലാം പൂരിതകൊഴുപ്പ് ഉയർന്ന അളവിൽ അടങ്ങിയിട്ടുണ്ട്. അതിനാൽ ഉയർന്ന കൊളസ്‌ട്രോൾ ഉള്ളവർ റെഡ് മീറ്റ് കഴിക്കുന്നത് ഒഴിവാക്കുന്നതാണ് നല്ലത്. 

വറുത്തതും പൊരിച്ചതുമായ ഭക്ഷണങ്ങൾ: എണ്ണയിൽ വറുത്തതും കൊഴുപ്പുള്ളതുമായ ഭക്ഷണങ്ങൾ കൊളസ്ട്രോൾ വർധിപ്പിക്കും. സാച്ചുറേറ്റഡ് കൊഴുപ്പ് അധികമുള്ളതിനാൽ എണ്ണയിൽ വറുത്ത ഭക്ഷണങ്ങൾ കഴിക്കുന്നത് ഒഴിവാക്കണം.

സംസ്കരിച്ച ഭക്ഷണങ്ങൾ: സംസ്കരിച്ച ഭക്ഷണങ്ങൾ കൊളസ്ട്രോൾ വർധിപ്പിക്കാൻ ഇടയാക്കും. ഇവയിൽ അടങ്ങിയിരിക്കുന്ന സോഡിയവും സാച്ചുറേറ്റഡ് കൊഴുപ്പും രക്തത്തിലെ കൊളസ്ട്രോളിന്റെ അളവ് വർധിപ്പിക്കും.

ബട്ടർ, ചീസ്: ബട്ടർ, ചീസ് തുടങ്ങിയവ കൊളസ്ട്രോൾ വർധിപ്പിക്കുന്ന ഭക്ഷണങ്ങളാണ്. കൊഴുപ്പും സോ‍ഡിയവും ധാരാളം അടങ്ങിയ ബട്ടർ, ചീസ് തുടങ്ങിയ ഭക്ഷണങ്ങൾ ഒഴിവാക്കുന്നത് കൊളസ്ട്രോൾ കുറയ്ക്കാൻ സഹായിക്കും.

കേക്കുകളും ബിസ്ക്കറ്റുകളും: കേക്ക്, കുക്കീസ്, ഫ്രെഞ്ച് ഫ്രൈസ് തുടങ്ങിയ ഭക്ഷണങ്ങളിൽ ഉപ്പ്, കലോറി, കൊഴുപ്പ്, ആഡഡ് ഷു​ഗർ എന്നിവയെല്ലാം കൂടുതലായി അടങ്ങിയിട്ടുണ്ട്. അതിനാൽ ഇവയെല്ലാം കൊളസ്ട്രോളിന്റെ അളവ് വർധിപ്പിക്കാൻ കാരണമാകും.

പഞ്ചസാര : പഞ്ചസാര ധാരാളം അടങ്ങിയ പാനീയങ്ങളും ഭക്ഷണങ്ങളും കൊളസ്ട്രോൾ വർധിപ്പിക്കും. അതിനാൽ, പഞ്ചസാര ധാരാളമായി അടങ്ങിയ പാനീയങ്ങളും ഭക്ഷണങ്ങളും ഒഴിവാക്കുന്നതാണ് നല്ലത്.