Long Pepper Benefits: രോ​ഗപ്രതിരോധശേഷി വ‍‍ർധിപ്പിക്കാനും ജലദോഷവും ചുമയും ശമിപ്പിക്കാനും മികച്ചത്; തിപ്പലി നൽകും നിരവധി ​ഗുണങ്ങൾ

ജലദോഷവും മൂക്കടപ്പും നിങ്ങളെ അസ്വസ്ഥരാക്കുന്നുണ്ടോ? സീസണൽ രോ​ഗങ്ങളായ ജലദോഷവും ചുമയും ചികിത്സിക്കുന്നതിനുള്ള ഏറ്റവും ഫലപ്രദമായ വീട്ടുവൈദ്യങ്ങളിൽ ഒന്നാണ് ഔഷധസസ്യങ്ങളും സുഗന്ധദ്രവ്യങ്ങളും. കുരുമുളക്, മഞ്ഞൾ, തുളസി മുതലായവയ്ക്ക് ആന്റി-ഇൻഫ്ലമേറ്ററി, ആന്റി ഓക്‌സിഡന്റ്, ആന്റി ബാക്ടീരിയൽ ഗുണങ്ങൾ ഉണ്ട്. ഇത് രോഗപ്രതിരോധ ശേഷി വർധിപ്പിക്കാനും വിവിധ ആരോഗ്യ പ്രശ്‌നങ്ങളിൽ നിന്ന് ആശ്വാസം നേടാനും സഹായിക്കുന്നു.

ഇത്തരത്തിൽ വിവിധ രോ​ഗങ്ങളെ പ്രതിരോധിക്കുന്നതിന് സഹായിക്കുന്ന ഔഷധങ്ങളിൽ ഒന്നാണ് തിപ്പലി അഥവാ ലോം​ഗ് പെപ്പർ. ഇത് നിരവധി ആരോഗ്യ ഗുണങ്ങൾ നൽകുന്നു. ജലദോഷത്തിന്റെ ലക്ഷണങ്ങൾ ലഘൂകരിക്കുന്നത് മുതൽ ശരീരഭാരം കുറയ്ക്കുന്നത് വരെ നിരവധി ​ഗുണങ്ങളാണ് തിപ്പലി നൽകുന്നത്. ഇത് ഗുളികകളായും പൊടിയായും അസംസ്കൃത രൂപത്തിൽ ഭക്ഷണത്തിൽ ചേർത്തും കഴിക്കാം.

ജലദോഷവും മൂക്കടപ്പും: ചുമയും ജലദോഷവും നിയന്ത്രിക്കാനും ഇതിന്റെ ലക്ഷണങ്ങൾ ലഘൂകരിക്കാനും തിപ്പലി സഹായിക്കും. ഭക്ഷണത്തിന് ശേഷം കാൽ ടീസ്പൂൺ തിപ്പലി പൊടി തേനുമായി ചേർത്ത് കഴിക്കുന്നത് ​ഗുണം ചെയ്യും. ഇത് കഫം കുറയ്ക്കാൻ സഹായിക്കും. ഇത് ശ്വസനം എളുപ്പമാക്കാനും സഹായിക്കുന്നു.

ശരീരഭാരം കുറയ്ക്കാൻ: ശരീരത്തിന്റെ മെറ്റബോളിസം മെച്ചപ്പെടുത്തുന്നതിലൂടെ ശരീരഭാരം കുറയ്ക്കാനും തിപ്പലി സഹായിക്കുന്നു. മെറ്റബോളിസം മികച്ചതാകുന്നത് ശരീരത്തിൽ കൊഴുപ്പ് കുറയ്ക്കാനും അമിതവണ്ണം കുറയ്ക്കാനും സഹായിക്കും.

മലബന്ധം: തിപ്പലിയിലെ പോഷകങ്ങൾ ദഹനം മികച്ചതാക്കുകയും മലബന്ധം നിയന്ത്രിക്കാൻ സഹായിക്കുകയും ചെയ്യുന്നു. മലബന്ധം ഉള്ളവർക്ക് തിപ്പലി കഴിക്കുന്നത് വയറുവേദന, വയറുവീർക്കൽ എന്നിവയിൽ നിന്ന് ആശ്വാസം നൽകും.

ഉറക്കം മികച്ചതാക്കുന്നു: ​ഗ്യാസ് സംബന്ധമായ പ്രശ്നങ്ങൾ കാരണം ഉറക്കക്കുറവ് നേരിടുന്നവർക്ക് തിപ്പലി ​ഗുണം ചെയ്യും. അര ടീസ്പൂൺ തിപ്പലി പൊടി പാലിൽ കലർത്തി ഉറങ്ങുന്നതിന് തൊട്ടുമുമ്പ് കഴിക്കുന്നത് നല്ല ഉറക്കം ലഭിക്കാൻ സഹായിക്കും.

ആന്റി-ഇൻഫ്ലമേറ്ററി ഗുണങ്ങൾ: തിപ്പലിക്ക് ആന്റി-ഇൻഫ്ലമേറ്ററി ഗുണങ്ങളുണ്ട്. പൈപ്പറിൻ പോലുള്ള സംയുക്തങ്ങളുടെ സാന്നിധ്യം മൂലമാണ് ഇവയിൽ ആന്റി-ഇൻഫ്ലമേറ്ററി ​ഗുണങ്ങൾ ഉള്ളത്. രോഗപ്രതിരോധ സംവിധാനത്തെ മികച്ചതാക്കാനും തിപ്പലി സഹായിക്കുന്നു. തിപ്പലി ചൂർണം, ഗുളികകൾ എന്നീ രൂപങ്ങളിൽ കഴിക്കാം.