Summer Diet: കത്തുന്ന ചൂടിൽ ശരീരത്തിന് സംരക്ഷണം വേണം; ഭക്ഷണത്തിൽ ചേർക്കൂ ഇവ

സീസൺ മാറുന്നതിനനുസരിച്ച് ഭക്ഷണക്രമത്തിലും മാറ്റങ്ങൾ വരുത്തുന്നത് ആരോ​ഗ്യത്തിന് ​ഗുണം ചെയ്യും. വേനൽക്കാലത്തെ ഉയർന്ന ചൂടിൽ തണുത്ത ഭക്ഷണങ്ങൾക്കാണ് കൂടുതൽ പ്രധാന്യം നൽകുക. ശരീരം ഊർജത്തോടെയിരിക്കാനും ഉന്മേഷമുള്ളതാക്കാനും ജലാംശം നൽകുന്ന പഴങ്ങളും പച്ചക്കറികളും തിരഞ്ഞെടുക്കുന്നത് ​ഗുണം ചെയ്യും.

ചില സു​ഗന്ധവ്യഞ്ജനങ്ങളും ശരീരത്തിന് തണുപ്പ് നൽകാൻ സഹായിക്കും. സുഗന്ധവ്യഞ്ജനങ്ങളിൽ നിരവധി ബയോ ആക്റ്റീവ് സംയുക്തങ്ങളും ആൻ്റിഓക്‌സിഡൻ്റുകളും അടങ്ങിയിട്ടുണ്ട്, ഇത് ആന്തരിക ശരീര താപനില കുറയ്ക്കാൻ സഹായിക്കുന്നു. അതിനാൽ, വേനൽക്കാലത്ത് ഉപയോ​ഗിക്കേണ്ട സു​ഗന്ധവ്യജ്ഞനങ്ങൾ ഏതെല്ലാമാണെന്ന് നോക്കാം.

ഉലുവ വിത്തുകൾ: ഉലുവ അസിഡിറ്റി, ഓക്കാനം, മലബന്ധം എന്നിവയെ ചെറുക്കാൻ സഹായിക്കും. ഇത് ശരീരം തണുപ്പിക്കുന്നതിനും സഹായിക്കുന്നു. ഉലുവ കുതിർത്ത വെള്ളം രാവിലെ വെറുംവയറ്റിൽ കുടിക്കുന്നത് നല്ലതാണ്.

മല്ലി: ആൻ്റി ഓക്‌സിഡൻ്റുകൾ, വിറ്റാമിനുകൾ, ധാതുക്കൾ എന്നിവയാൽ സമ്പന്നമാണ് മല്ലി. ശരീരത്തിൽ നിന്ന് വിഷാംശം പുറന്തള്ളാനും ദഹന പ്രശ്നങ്ങൾ ഒഴിവാക്കാനും അവ സഹായിക്കുന്നു. വേനൽക്കാലത്ത് മല്ലിയില കഴിക്കുന്നത് ഗുണകരമാണെന്ന് കണക്കാക്കപ്പെടുന്നു.

പുതിന: വേനൽക്കാല ഭക്ഷണത്തിൽ ചേർക്കാവുന്ന ഏറ്റവും മികച്ച ഭക്ഷണങ്ങളിൽ ഒന്നാണ് പുതിന. പുതിന ശരീരം തണുപ്പിക്കാനും ദഹനം മികച്ചതാക്കാനും സഹായിക്കുന്നു. പുതിന ചർമ്മത്തിനും ഗുണം ചെയ്യും. പുതിന ശരീരത്തിന് തിളക്കവും ഉന്മേഷവും നൽകുന്നു.

ജീരകം: പല ഇന്ത്യൻ വിഭവങ്ങളിലും സാധാരണയായി ചേർക്കുന്ന ഒരു ഘടകമാണ് ജീരകം. വേനൽക്കാലത്ത് പല പാനീയങ്ങളിലും ജീരകം ചേർക്കുന്നു. ശരീരത്തിന് ഊർജവും ആരോഗ്യവും നൽകുന്ന ഇരുമ്പും മറ്റ് പോഷകങ്ങളും ജീരകത്തിൽ ധാരാളമായി അടങ്ങിയിട്ടുണ്ട്.

ഏലം: ശരീരത്തിലെ ചൂട് കുറയ്ക്കാൻ സഹായിക്കുന്ന സു​ഗന്ധവ്യഞ്ജനമാണ് ഏലക്ക. ഇത് ശരീരത്തിന്റെ ആന്തരിക ഊഷ്മാവ് കുറയ്ക്കുകയും ശരീരത്തിൽ തണുപ്പ് നിലനിർത്താൻ സഹായിക്കുകയും ചെയ്യുന്നു. ഏലക്കായിൽ അടങ്ങിയിരിക്കുന്ന ആൻ്റിഓക്‌സിഡൻ്റുകൾ വീക്കം കുറയ്ക്കാനും മൊത്തത്തിലുള്ള ആരോഗ്യം മികച്ചതാക്കാനും സഹായിക്കുന്നു.