Cholesterol Lowering Foods: ഉയ‍ർന്ന കൊളസ്ട്രോൾ ഉള്ളവ‍ർ ഈ നാല് ഭക്ഷണങ്ങൾ കഴിക്കരുത്; ഹൃദയാഘാത സാധ്യത കൂടുതൽ, പകരം ഈ ഭക്ഷണങ്ങൾ നല്ലത്

മോശം ജീവിതശൈലിയും ആരോ​ഗ്യകരമല്ലാത്ത ഭക്ഷണക്രമവും മൂലം പലരിലും ഉണ്ടാകുന്ന ആരോ​ഗ്യ പ്രശ്നമാണ് ഉയർന്ന കൊളസ്ട്രോൾ. കൊളസ്ട്രോൾ ആരോ​ഗ്യത്തിന് ആവശ്യമായ വസ്തുവാണ്. എന്നാൽ, പരിധിയിൽ കൂടുതൽ രക്തത്തിൽ കൊളസ്ട്രോൾ വർധിക്കുന്നത് ചീത്ത കൊളസ്ട്രോൾ വർധിക്കാനും സ്ട്രോക്ക്, ഹൃദയാ​ഘാതം, മറ്റ് ഹൃദ്രോ​ഗങ്ങൾ എന്നിവയിലേക്ക് നയിക്കാനും കാരണമാകും.

കൊളസ്ട്രോൾ നിയന്ത്രണത്തിന് ആളുകൾ ഏറ്റവും ആദ്യം സ്വീകരിക്കുന്ന മാർ​ഗം ഭക്ഷണനിയന്ത്രണമാണ്. കൊളസ്ട്രോളിന്റെ അളവ് വളരെ ഉയർന്നിരിക്കുകയാണെങ്കിൽ ചിലപ്പോൾ മരുന്ന് കഴിക്കേണ്ടതായി വരും. എങ്കിലും ഭക്ഷണനിയന്ത്രണവും കൊളസ്ട്രോൾ കുറയ്ക്കുന്നതിൽ വലിയ പങ്കുവഹിക്കുന്നുണ്ട്.

ഡോക്ടറുടെ നിർദേശാനുസരണം മരുന്നിനൊപ്പമോ മരുന്ന് കഴിക്കാതെയോ ഭക്ഷണ നിയന്ത്രണത്തിലൂടെ കൊളസ്ട്രോൾ കുറയ്ക്കാൻ സാധിക്കും. കൊളസ്ട്രോളിന്റെ അളവ് കൃത്യമായി നിലനിർത്തുന്നത് സ്ട്രോക്ക്, ഹൃദയാഘാതം എന്നിവയുടെ സാധ്യത കുറയ്ക്കും. കൊളസ്ട്രോൾ കുറയ്ക്കുന്നതിന് കഴിക്കേണ്ടതും ഒഴിവാക്കേണ്ടതുമായ ഭക്ഷണങ്ങൾ ഏതെല്ലാമാണെന്ന് അറിയാം.

കൊളസ്ട്രോൾ കുറയ്ക്കാൻ സഹായിക്കുന്ന ചില ഭക്ഷണങ്ങളാണ് ഓട്സ് ബാർലി തുടങ്ങിയ തവിടുള്ള ധാന്യങ്ങൾ. വഴുതനങ്ങ, വെണ്ടയ്ക്ക, അണ്ടിപ്പരിപ്പ്, വെജിറ്റബിൾ ഓയിൽ, ആപ്പിൾ, മുന്തിരി, സ്ട്രോബെറി, സോയ, കൊഴുപ്പുള്ള മത്സ്യങ്ങൾ, നാരുകൾ കൂടുതലായി അടങ്ങിയ ഭക്ഷണങ്ങൾ എന്നിവ കഴിക്കുന്നതും കൊളസ്ട്രോൾ കുറയ്ക്കാൻ സഹായിക്കും.

ഉയർന്ന അളവിൽ പൂരിത കൊഴുപ്പ് അടങ്ങിയ ഭക്ഷണങ്ങളാണ് രക്തത്തിൽ കൊളസ്ട്രോളിന്റെ അളവ് വർധിപ്പിക്കുന്നത്. ഇത് അമിതവണ്ണത്തിനും കാരണമാകും. കൊള്സ്ട്രോൾ വലിയ അളവിൽ ഉയർന്നിരിക്കുകയാണെങ്കിൽ നി‍ർബന്ധമായും ഒഴിവാക്കേണ്ട ഭക്ഷണങ്ങളുണ്ട്. റെഡ് മീറ്റ്, ബെയ്ക്ക് ചെയ്ത ഭക്ഷണങ്ങൾ എന്നിവയെല്ലാം ചീത്ത കൊളസ്ട്രോളിന്റെ അളവ് വർധിപ്പിക്കും.

റെഡ് മീറ്റ് (പോത്ത് ഇറച്ചി, പന്നിയിറച്ചി, ആട്ടിറച്ചി) തുടങ്ങിയ റെഡ് മീറ്റ് വിഭാ​ഗത്തിൽപ്പെടുന്ന ഇറച്ചികൾ ഒഴിവാക്കണം. ഇവയിൽ ഉയ‍ർന്ന അളവിൽ പൂരിത കൊഴുപ്പ് അടങ്ങിയിരിക്കുന്നു. ഇവ സ്ഥിരമായി കഴിക്കുന്നവർ കൊളസ്ട്രോൾ വർധിച്ചാൽ ഇവയുടെ ഉപയോ​ഗം പരിമിതപ്പെടുത്തുക.

കൊളസ്ട്രോൾ നിയന്ത്രണ വിധേയമാകുന്നത് വരെ പൂരിത കൊഴുപ്പും കൊളസ്ട്രോളും കുറഞ്ഞ ചിക്കൻ, ടർക്കി ബ്രെസ്റ്റ്, മീൻ എന്നിവ കഴിക്കുക. വറുത്ത ഭക്ഷണങ്ങൾ കൊളസ്ട്രോൾ വർധിപ്പിക്കും. ബെയ്ക്ക് ചെയ്ത ഭക്ഷണങ്ങളും പ്രൊസസ് ചെയ്ത ഭക്ഷണങ്ങളും കഴിക്കുന്നത് ഒഴിവാക്കുക.