Vitamin C Deficiency: ചർമ്മം വരണ്ടതാകുന്നു, പല്ല് പൊടിയുന്നു... നിങ്ങൾ അവഗണിക്കാൻ പാടില്ലാത്ത ആറ് ലക്ഷണങ്ങൾ

വിറ്റാമിൻ സിയുടെ കുറവ് വിവിധ ആരോഗ്യ പ്രശ്നങ്ങൾക്ക് കാരണമാകും. രോഗപ്രതിരോധ ശേഷി, ചർമ്മത്തിന്റെ ആരോഗ്യം, മുറിവ് ഉണക്കൽ എന്നിവ ഉൾപ്പെടെ നിരവധി ശാരീരിക പ്രവർത്തനങ്ങളിൽ ഈ അവശ്യ പോഷകം ഒരു പ്രധാന പങ്ക് വഹിക്കുന്നു. മൊത്തത്തിലുള്ള ആരോഗ്യം നിലനിർത്തുന്നതിന് വിറ്റാമിൻ സി ആവശ്യമാണ്. വിറ്റാമിൻ സി കുറയുന്നതിന്റെ ലക്ഷണങ്ങൾ തിരിച്ചറിയുന്നത് വളരെ പ്രധാനമാണ്.

തെറ്റായ ഭക്ഷണക്രമം, മദ്യപാനം, കടുത്ത മാനസികരോഗം, പുകവലി, ഡയാലിസിസ് എന്നിവയാണ് വിറ്റാമിൻ സി കുറയുന്നതിന്റെ അപകട ഘടകങ്ങൾ. കഠിനമായ വിറ്റാമിൻ സി യുടെ കുറവ് വികസിക്കാൻ മാസങ്ങളെടുക്കുമെങ്കിലും, ഇതിനെ സംബന്ധിച്ച് സൂക്ഷ്മമായി അറിഞ്ഞിരിക്കേണ്ടത് പ്രധാനമാണ്.

ക്ഷീണവും ബലഹീനതയും: നിരന്തരം ക്ഷീണവും ബലഹീനതയും അനുഭവപ്പെടുന്നത് വിറ്റാമിൻ സിയുടെ അഭാവത്തിന്റെ ആദ്യകാല സൂചകമായിരിക്കാം. കൊഴുപ്പിനെ ഊർജമാക്കി മാറ്റാൻ സഹായിക്കുന്ന കാർനിറ്റൈൻ എന്ന തന്മാത്രയുടെ ഉൽപാദനത്തിന് ഈ പോഷകം അത്യാവശ്യമാണ്.

വരണ്ടതും വിണ്ടുകീറിയതുമായ ചർമ്മം: ചർമ്മത്തിന്റെ ഇലാസ്തികതയ്ക്കും ആരോ​ഗ്യത്തിനും അത്യന്താപേക്ഷിതമായ കൊളാജൻ ഉൽപാദനത്തിൽ വിറ്റാമിൻ സി പ്രധാന പങ്ക് വഹിക്കുന്നു. വിറ്റാമിൻ സിയുടെ അഭാവം വരണ്ടതും പരുക്കനും കേടുപാടുകൾ ഉള്ളതുമായ ചർമ്മത്തിന് കാരണമാകും. ഇത് മുറിവുകൾ ഉണങ്ങുന്നതിന് വളരെയധികം സമയമെടുക്കുന്നതിലേക്ക് നയിക്കും.

പല്ല് നഷ്ടപ്പെടുന്നത്: മോണയുടെ ആരോഗ്യത്തിന് വിറ്റാമിൻ സി വളരെ പ്രധാനമാണ്. ആവശ്യത്തിന് വിറ്റാമിൻ സി ഇല്ലാത്തത് ജിംഗിവൈറ്റിസിലേക്ക് നയിച്ചേക്കാം, ഇത് ചികിത്സിച്ചില്ലെങ്കിൽ പല്ല് നഷ്ടപ്പെടും. മോണയിൽ നിന്ന് രക്തസ്രാവവും പല്ലുകൾ അയയുന്നതും ഇതിന്റെ സാധാരണ ലക്ഷണങ്ങളാണ്.

സന്ധികളിലും പേശികളിലും വേദന: സന്ധികളിലും പേശികളിലും വേദന ഉണ്ടാകുന്നത് വിറ്റാമിൻ സിയുടെ അഭാവവുമായി ബന്ധപ്പെട്ടിരിക്കുന്നു. സന്ധികളിലും പേശികളിലും കൊളാജന്റെ വികാസത്തിന് ഈ പോഷകം അത്യാവശ്യമാണ്.

സന്ധികളിൽ വീക്കവും വേദനയും: കഠിനമായ കേസുകളിൽ, വിറ്റാമിൻ സിയുടെ കുറവ് സ്കർവിയിലേക്ക് നയിച്ചേക്കാം, ഇതിന് വീർത്തതും വേദനയുള്ളതുമായ സന്ധികൾ, പേശി വേദന എന്നിവയാണ് ലക്ഷണങ്ങൾ.

അണുബാധകൾ: വിറ്റാമിൻ സി പ്രതിരോധശേഷി വർധിപ്പിക്കുന്നു. നിങ്ങൾക്ക് ഇടയ്ക്കിടെ രോ​ഗങ്ങളും അണുബാധകളും ഉണ്ടാകുന്നത് വിറ്റാമിൻ സിയുടെ കുറവ് മൂലമാകാം. വൈറ്റമിൻ സിയുടെ അഭാവം മൂലം രോഗപ്രതിരോധ ശേഷി കുറയുന്നതാണ് ഇതിന് കാരണം.

മനുഷ്യ ശരീരത്തിന് ആവശ്യമായ പോഷകങ്ങളിൽ ഒന്നാണ് വിറ്റാമിൻ സി. മുകളിൽ പറഞ്ഞ ലക്ഷണങ്ങൾ അനുഭവപ്പെടുകയാണെങ്കിൽ, നിങ്ങൾ ഡോക്ടറെ സമീപിക്കുകയും പരിശോധനയ്ക്ക് വിധേയമാകുകയും വേണം.

കുറിപ്പ്: ലേഖനം പൊതുവായ വിവരങ്ങളെ അടിസ്ഥാനമാക്കിയുള്ളതാണ്. ഒരു മെഡിക്കൽ വിദഗ്ധന്റെ ഉപദേശത്തിന് പകരമല്ല.