Train Accident: ഹൗറ-മുംബൈ എക്സ്പ്രസ് പാളം തെറ്റി; 2 മരണം, നിരവധി പേർക്ക് പരിക്ക്

റാഞ്ചി: ജാർഖണ്ഡിൽ ഹൗറ-മുംബൈ എക്സ്പ്രസ് പാളം തെറ്റി 2 പേർ മരിച്ചു. 20 പേർക്ക് പരിക്കേറ്റു. ഇന്ന് പുലർച്ചെയാണ് അപകടമുണ്ടായത്. ട്രെയിനിൻ്റെ 18 കോച്ചുകലാണ് പാളം തെറ്റിയത്. പുലർച്ചെ 3.45ഓടെ ജംഷഡ്പൂരിൽ നിന്ന് 80 കിലോമീറ്റർ അകലെ ബരാബാംബൂവിനടുത്താണ് അപകടമുണ്ടായത്. അപകട വിവരം അറിയിച്ച ഉടൻ തന്നെ രക്ഷാപ്രവർത്തകർ സ്ഥലത്തെത്തി രക്ഷാപ്രവർത്തനം നടത്തി.

സമീപത്തായി ഒരു ഗുഡ്‌സ് ട്രെയിനും പാളം തെറ്റിയിട്ടുണ്ട്. രണ്ട് അപകടങ്ങളും ഒരേസമയം നടന്നതാണോയെന്ന് ഇതുവരെ വ്യക്തമായിട്ടില്ല. പാളം തെറ്റിയ 18 കോച്ചുകളിൽ 16 എണ്ണം പാസഞ്ചർ കോച്ചുകളും ഒരു പവർ കാറും ഒരു പാൻട്രി കാറുമാണ്. പരിക്കേറ്റവർക്ക് റെയിൽവേ മെഡിക്കൽ ടീ പ്രാഥമിക ചികിത്സ നൽകി. കൂടുതൽ മെച്ചപ്പെട്ട ചികിത്സയ്ക്കായി ചക്രധർപൂരിലേക്ക് മാറ്റി. അപകടത്തിന്റെ കാരണം അന്വേഷിച്ചുവരികയാണെന്ന് അധികൃതർ അറിയിച്ചു. അപകടത്തെത്തുടർന്ന് നിരവധി ട്രെയിനുകൾ റദ്ദാക്കുകയും വഴിതിരിച്ചുവിടുകയും ചെയ്തതായി അധികൃതർ പറഞ്ഞു.