Ayodhya Ram Mandir: അയോദ്ധ്യ രാമക്ഷേത്ര പ്രതിഷ്ഠ: ഈ സംസ്ഥാനങ്ങളിൽ `ജനുവരി 22`ന് ഡ്രൈ ഡേ

ന്യൂഡൽഹി: ജനുവരി 22 തിങ്കളാഴ്ച്ചയാണ് അയോദ്ധ്യ രാമക്ഷേത്രത്തിന്റെ പ്രതിഷ്ഠാ ദിനം. അന്നു മുതൽ വിശ്വാസികൾക്ക് വേണ്ടി ക്ഷേത്രം തുറന്നു നൽകും. പ്രധാനമന്ത്രി നരേന്ദ്രമോദിയടക്കം ക്ഷണിക്കപ്പെട്ട വിവിധ വിശിഷ്ടാതിഥികൾ പ്രാണ പ്രതിഷ്ഠാ ചടങ്ങിൽ പങ്കെടുക്കും. അയോദ്ധ്യ രാമക്ഷേത്ര പ്രതിഷ്ഠാ ദിനമായ ജനുവരി 22ന് അസ്സമിൽ 'ഡ്രൈ ഡേ' പ്രഖ്യാപിച്ചിരിക്കുകയാണ്. മുഖ്യമന്ത്രി ഹിമന്ത ബിശ്വ ശർമ്മ സന്നിഹിതനായ ഒരു പ്രസ്സ് കോൺഫറൻസിൽ വെച്ച് അസ്സം ടൂറിസം മന്ത്രിയാണ് ഈ കാര്യം വ്യക്തമാക്കിയത്.  

അസ്സമിനെ കൂടാതെ ഛത്തീസ്​ഗഢിലും അയോദ്ധ്യ രാമക്ഷേത്ര പ്രതിഷ്ഠാ ദിനത്തിൽ സംസ്ഥാനത്തുടനീളം ഡ്രൈ ഡേ പ്രഖ്യാപിച്ചിരിക്കുകയാണ്. ഛത്തീസ്​ഗഢ് മുഖ്യമന്ത്രി വിഷ്ണു ദേവ് ആണ് ഈ കാര്യം അറിയിച്ചത്. അതേസമയം അയോദ്ധ്യരാമക്ഷേത്ര പ്രതിഷ്ഠയുടെ ക്ഷണം കോൺ​ഗ്രസ് സ്വീകരിച്ചെങ്കിലും കേരളത്തിലെ കോൺ​ഗ്രസ് നേതാക്കൾ ഇതുവരെ നിലപാട് വ്യക്തമാക്കിയിട്ടില്ല. ഇതിനെതിരെ ബിജെപി സംസ്ഥാന അദ്ധ്യക്ഷൻ കെ സുരേന്ദ്രൻ കഴിഞ്ഞ ദിവസം രം​ഗത്തു വന്നിരുന്നു. 

മധ്യപ്രദേശിലും കർണാടകയിലും മറ്റ് സംസ്ഥാനങ്ങളിലും അയോധ്യയിലെ രാമക്ഷേത്രത്തിന്റെ പ്രതിഷ്ഠാദിനം വിപുലമായി ആഘോഷിക്കുന്ന കോൺഗ്രസ് കേരളത്തിലും നിലപാട് വ്യക്തമാക്കണമെന്നാണ് കെ സുരേന്ദ്രൻ ആവശ്യപ്പെട്ടത്. കേരളത്തിലെ കോൺ​ഗ്രസ് നേതാക്കൾക്ക് മറ്റു സംസ്ഥാനങ്ങളെ അപേക്ഷിച്ച് എന്തു പ്രത്യേകതയാണുള്ളതെന്നും, കോൺ​ഗ്രസിന്റെ ഉന്നത നേതാവ് രാഹുൽ​ഗാന്ധി കേരളത്തിൽ നിന്നുള്ള എംപിയാണെന്നും, സം​ഘടന സെക്രട്ടറി കെസി വേണു​ഗോപാലും മലയാളിയാണ്. എന്നിട്ടും എന്താണ് കേരളത്തിലെ ഹിന്ദുക്കളുടെ വികാരം കോൺ​ഗ്രസ് അവ​ഗണിക്കുന്നതെന്നും സുരേന്ദ്രൻ ചോദിച്ചു.