Parliament Budget Session: പാർലമെന്‍റിന്‍റെ ബജറ്റ് സമ്മേളനം ജനുവരി 31 മുതല്‍

Parliament Budget Session: പാർലമെന്‍റിന്‍റെ ബജറ്റ് സമ്മേളനം ജനുവരി 31ന് ആരംഭിച്ച് ഫെബ്രുവരി 9 ന് സമാപിക്കും. 

പാർലമെന്‍റിന്‍റെ ഇരുസഭകളുടെയും സംയുക്ത സമ്മേളനത്തെ അഭിസംബോധന ചെയ്തുകൊണ്ട് രാഷ്ട്രപതി ദ്രൗപതി മുർമു നടത്തുന്ന പ്രസംഗത്തോടെയാണ് സമ്മേളനം ആരംഭിക്കുന്നത്. പ്രസംഗത്തിൽ ഗവൺമെന്‍റിന്‍റെ നേട്ടങ്ങളും നയ മുൻഗണനകളും രാഷ്‌ട്രപതി ഉയര്‍ത്തിക്കാട്ടും.  

ശേഷം ഫെബ്രുവരി ഒന്നിന് ധനമന്ത്രി നിർമ്മല സീതാരാമൻ ഇടക്കാല ബജറ്റ് അവതരിപ്പിക്കും. പേപ്പര്‍ രഹിത ബജറ്റാണ് ഇത്തവണയും ധനമന്ത്രി അവതരിപ്പിക്കുക. കൊറോണ കാലം മുതല്‍, അതായത്, 2021 മുതലാണ് രാജ്യത്ത് ഡിജിറ്റലായി ബജറ്റ് അവതരിപ്പിച്ചു തുടങ്ങിയത്. 2024 ലെ വരാനിരിക്കുന്ന ഇടക്കാല ബജറ്റും മറ്റ് പൊതു ബജറ്റുകളെപ്പോലെ തന്നെ പേപ്പർ രഹിതമായിരിക്കും, കൂടാതെ ഡിജിറ്റലാകുന്ന ആദ്യത്തെ ഇടക്കാല ബജറ്റും ആയിരിക്കും.

ഇടക്കാല ബജറ്റിൽ , സ്ത്രീ കർഷകർക്ക് പ്രധാനമന്ത്രി കിസാൻ സമ്മാൻ നിധി ഇരട്ടിയാക്കാനുള്ള നിർദ്ദേശം ഉണ്ടായേക്കാം എന്നാണ് സൂചന. ഇത് സർക്കാരിന് 12,000 കോടി രൂപ അധിക ചിലവ് വരുത്തും. 

ഒരു തിരഞ്ഞെടുപ്പ് വർഷത്തിലോ സമ്പൂർണ ബജറ്റിന് സമയം തികയാതെ വരുമ്പോഴോ ആണ് ഭരിക്കുന്ന സർക്കാർ ഇടക്കാല ബജറ്റ് പാർലമെന്‍റിൽ അവതരിപ്പിക്കുന്നത്. തിരഞ്ഞെടുപ്പിന് ശേഷം അധികാരമേറ്റ പുതിയ സർക്കാർ ആയിരിക്കും സമ്പൂര്‍ണ്ണ വാർഷിക ബജറ്റ് അവതരിപ്പിക്കുക. 

ധനമന്ത്രി സീതാരാമൻ അവതരിപ്പിക്കുന്ന തുടർച്ചയായ ആറാമത്തെ ബജറ്റാണിത്. 2024-25 സാമ്പത്തിക വർഷത്തിലെ ആദ്യ കുറച്ച് മാസങ്ങളിലെ ചെലവുകളുടെ വിശദാംശങ്ങളുള്ള ഇടക്കാല ബജറ്റുമായി ബന്ധപ്പെട്ട രേഖകൾ http://www.indiabudget.gov.in-ൽ ഓൺലൈനായി അപ്‌ലോഡ് ചെയ്യും.