Crime Patrol Actress: കാമുകനോടുള്ള അടങ്ങാത്ത പ്രണയം, ബന്ധത്തെ എതിർത്ത് കുടുംബം, കുട്ടിയെ തട്ടിക്കൊണ്ടു പോയി സീരിയൽ നടി

കാമുകന്റെ സഹോദരിയുടെ മകനെ തട്ടിക്കൊണ്ടുപോയ കേസിൽ നടി അറസ്റ്റിൽ. ക്രൈം പട്രോളെന്ന ടെലിവിഷൻ സീരിയൽ താരം ഷബ്രിനാണ് അറസ്റ്റിലായത്. മുംബൈയിലെ പാൽഘ‍ർ ജില്ലയിലാണ് സംഭവം. മൂന്നര വയസ്സുള്ള കുട്ടിയെയാണ് നടി തട്ടിക്കൊണ്ടു പോയത്.

കാമുകൻ ബ്രിജേഷ് സിങ്ങുമായുള്ള ബന്ധം വീട്ടുക്കാർ എതിർത്തതാണ് കുട്ടിയെ തട്ടിക്കൊണ്ടുപോകാൻ കാരണമായതെന്ന് പൊലീസ് പറഞ്ഞു. ബ്രിജേഷുമായി ഷബ്രിൻ ഏറെക്കാലമായി പ്രണയത്തിലായിരുന്നു. എന്നാൽ സമുദായങ്ങൾ വ്യത്യസ്തമായതിനാൽ ബ്രിജേഷിന്റെ കുടുംബം ഈ ബന്ധത്തെ എതിർത്തിരുന്നു. 

ബ്രിജേഷിനോടുള്ള കടുത്ത പ്രണയത്തിൽ താൻ എന്താണ് ചെയ്യുന്നതെന്ന് തിരിച്ചറിയാൻ നടിക്ക് സാധിച്ചില്ലെന്നും അഭിനയിച്ച് കൊണ്ടിരിക്കുന്ന ക്രൈം സീരിയൽ ജീവിതത്തിലും അനുകരിക്കാൻ ശ്രമിച്ചെന്നും പൊലീസ് പറഞ്ഞു.

സ്കൂളിൽ നിന്നാണ് കുട്ടിയെ കൊണ്ടുപോയത്. ഷബ്രീനെ മുമ്പ് പരിചയമുണ്ടായിരുന്ന കുട്ടി നടിയോടൊപ്പം പോകാൻ തയ്യാറായി. കുട്ടിയെ ഡോക്ടറെ കാണിക്കാൻ കൊണ്ടു പോകുകയാണെന്നാണ് സ്കൂൾ അധികൃതരോടും പറഞ്ഞത്. എന്നാൽ കുട്ടി വീട്ടിൽ തിരിച്ചെത്താതായതോടെയാണ് കുടുംബം അന്വേഷിച്ചിറങ്ങിയത്.

സ്കൂൾ അധികൃതർ പറഞ്ഞ വിവരമനുസരിച്ച് സിസിടിവി അടക്കം പരിശോധിച്ചപ്പോഴാണ് ഓട്ടോറിക്ഷയിൽ നടി കുഞ്ഞിനെ കൊണ്ടുപോയത് വ്യക്തമായത്. മറ്റൊരു സ്ത്രീയും കൂടെ ഉണ്ടായിരുന്നു. തുടർന്ന് ഓട്ടോ ഡ്രൈവറെ ചോദ്യം ചെയ്തു. മൊബൈൽ ഫോൺ ട്രേസ് ചെയ്ത പോലീസ് ബാന്ദ്രയിൽ നിന്നാണ് നടിയെ പിടികൂടിയത്.