Cash Found From Congress MP`s Seat: കോൺഗ്രസ് എംപിയുടെ സീറ്റിൽ നിന്നും നോട്ടുകെട്ട്; അന്വേഷണത്തിന് നിർദ്ദേശം നൽകി ജഗ്ദീപ് ധൻകർ

ന്യൂഡൽഹി: രാജ്യസഭ കോൺ​ഗ്രസ് എംപി മനു അഭിഷേക് സിംഗ്‌വിയുടെ ഇരുപ്പിടത്തിൽ നിന്നും നോട്ടുകെട്ട് കണ്ടെത്തിയ സംഭവത്തിൽ അന്വേഷണത്തിന് നി‍ർദ്ദേശം നൽകി രാജ്യസഭാ അധ്യക്ഷൻ. അഭിഷേക് മനു സിങ്‌വിക്ക് അനുവദിച്ച സീറ്റ് നമ്പ‍ർ 222 ൽ നിന്നും പാർലമെന്റ് സുരക്ഷാ ഉദ്യോഗസ്ഥർ പണം കണ്ടെത്തിയെന്നാണ് റിപ്പോർട്ട്.

ഇത് സംബന്ധിച്ച് രാജ്യസഭാ ചെയർമാൻ ജഗ്ദീപ് ധൻകർ വിശദീകരണം നൽകി. എന്നാൽ അഭിഷേക് മനു സിങ്‌വി ആരോപണങ്ങൾ നിഷേധിച്ചു.  ധൻഖറിൻ്റെ ഈ വാദം കോൺഗ്രസ് എംപിമാരുടെ പ്രതിഷേധത്തിന് കാരണമാകുകയും അന്വേഷണത്തിന് മുൻപ് പേരുകൾ പറയേണ്ടതില്ലെന്ന് മല്ലികാർജുൻ ഖാർഗെയും പറഞ്ഞു. 

രാജ്യസഭയിൽ പോകുമ്പോൾ 500 രൂപയുടെ ഒരുനോട്ട് മാത്രമാണ് തൻ്റെ കൈവശം ഉണ്ടാകാറുള്ളതെന്നും ഈ ആരോപണം തന്നെ ഞെട്ടിച്ചുവെന്നും സിങ്‌വി പ്രതികരിച്ചു. തൻ്റെ സീറ്റിൽ നിന്നും നോട്ട് കണ്ടെത്തിയെന്ന ആരോപണം അഭിഷേക് സിംഗ്‌വി നിഷേധിച്ചു.

രാവിലെ സഭ ചേര്‍ന്നയുടന്‍ ഭരണപക്ഷത്ത് നിന്നും ബഹളം തുടങ്ങിയിരുന്നു. സുരക്ഷ ഉദ്യോഗസ്ഥര്‍ കഴിഞ്ഞ ദിവസം എംപിമാരുടെ ഇരിപ്പിടം പരിശോധിച്ചതിന്‍റെ കാരണം വ്യക്തമാക്കണമെന്ന് ആവശ്യപ്പെട്ട് എംപിമാര്‍ ബഹളം വച്ചു. പതിവ് പരിശോധനയെന്ന് പാര്‍ലമെന്‍ററി കാര്യമന്ത്രി കിരണ്‍ റിജുജു പറഞ്ഞെങ്കിലും എംപിയുടെ പേര് വ്യക്തമാക്കാതെ ഇരിപ്പിടത്തില്‍ നിന്ന് നോട്ട് കെട്ടുകള്‍ കണ്ടെത്തിയെന്ന് വ്യക്തമാക്കി. 

ഒടുവിൽ പ്രതിപക്ഷം ബഹളം വച്ചതോടെ പണം എവിടെ നിന്നാണ് പിടിച്ചെടുത്തതെന്ന് അധ്യക്ഷന്‍ ജഗദീപ് ധന്‍കര്‍ വിശദീകരിക്കുകയായിരുന്നു. പിന്നാലെ അന്വേഷണവും പ്രഖ്യാപിച്ചു.