Farmers Protest: അതിര്‍ത്തിയില്‍ സംഘര്‍ഷം, കർഷകരുടെ ഡൽഹി ചലോ മാർച്ച് രണ്ട് ദിവസത്തേക്ക് മാറ്റിവച്ചു

New Delhi: കര്‍ഷകരുടെ ഡല്‍ഹി ചലോ മാര്‍ച്ച്‌ രണ്ട് ദിവസത്തേക്ക് മാറ്റിവച്ചു. പഞ്ചാബ്-ഹരിയാന അതിർത്തിയിലെ രണ്ട് പ്രതിഷേധ കേന്ദ്രങ്ങളിലൊന്നായ ഖനൗരിയിൽ നടന്ന ഏറ്റുമുട്ടലിൽ ഒരു കര്‍ഷകന്‍  മരിക്കുകയും 12 ഓളം പോലീസുകാർക്ക് പരിക്കേൽക്കുകയും ചെയ്തതിനെത്തുടർന്നാണ്  ഡൽഹി ചലോ മാർച്ച് രണ്ട് ദിവസത്തേക്ക് മാറ്റിവച്ചിരിയ്ക്കുന്നത്.  

പ്രതിഷേധവുമായി ബന്ധപ്പെട്ട അടുത്ത നടപടികള്‍ വെള്ളിയാഴ്ച വൈകുന്നേരം തീരുമാനിക്കുമെന്ന് കർഷക നേതാവ് സർവാൻ സിംഗ് പന്ദർ ശംഭുവിൽ മാധ്യമപ്രവർത്തകരോട് പറഞ്ഞു. 

കര്‍ഷക പ്രശ്നം അവസാനിപ്പിക്കാനുള്ള ശ്രമത്തിൽ ഞായറാഴ്ച രാത്രി മൂന്ന് കേന്ദ്രമന്ത്രിമാരുടെ പാനലുമായി നടന്ന നാലാം റൗണ്ട് ചർച്ചയെത്തുടർന്ന് രണ്ട് ദിവസത്തെ ഇടവേളയ്ക്ക് ശേഷം ഖനൗരിയിലെയും ശംഭുവിലെയും പഞ്ചാബിലെ കർഷകർ രാവിലെ തന്നെ തങ്ങളുടെ പ്രക്ഷോഭം പുനരാരംഭിച്ചിരുന്നു. 

ഖനൗരി, ശംഭു അതിർത്തികളിൽ പ്രതിഷേധിച്ച കർഷകർക്ക് നേരെ ഹരിയാന പോലീസ് അതിക്രമം നടത്തിയതായി കര്‍ഷകര്‍ ആരോപിക്കുന്നു. 'കര്‍ഷകരില്‍ പലർക്കും പരിക്കേൽക്കുകയും  പലരേയും കാണാതാവുകയും ചെയ്തിട്ടുണ്ട്. സ്ഥിതിഗതികൾ കണക്കിലെടുത്ത്, 'ഡൽഹി ചലോ' മാർച്ച് അടുത്ത രണ്ട് ദിവസത്തേക്ക് നിർത്തിവയ്ക്കാൻ തീരുമാനിച്ചു. ഈ രണ്ട് ദിവസങ്ങളിൽ, പരിക്കേറ്റവരുടെയും കാണാതായ കർഷകരുടെയും കുടുംബങ്ങളെ കാണുകയും ഭാവി നടപടിയെക്കുറിച്ച് തീരുമാനിക്കുകയും ചെയ്യും',  കർഷക നേതാവ് പാന്ദർ മാധ്യമങ്ങളോട് പറഞ്ഞു.

കർഷക നേതാവ് ബൽദേവ് സിംഗ് സിർസയാണ് മരിച്ച കർഷകനെ പഞ്ചാബിലെ ബത്തിണ്ട ജില്ലയിലെ ബലോകേ ഗ്രാമവാസിയായ ശുഭ്‌കരൻ സിംഗ് (21) ആണ് എന്ന് തിരിച്ചറിഞ്ഞത്. മൂന്ന് പേരെ ഖനൗരിയിൽ നിന്ന് ആശുപത്രിയിലേക്ക് കൊണ്ടുപോയതായും അവരിൽ ഒരാൾ മരിച്ചതായും പട്യാല ആസ്ഥാനമായുള്ള രജീന്ദ്ര ആശുപത്രിയിലെ മെഡിക്കൽ സൂപ്രണ്ട് എച്ച്എസ് രേഖി പറഞ്ഞു. മരിച്ചയാളുടെ തലയിൽ മുറിവുണ്ടെന്നും മറ്റ് രണ്ട് പേർ ആരോഗ്യസ്ഥിതി വീണ്ടെടുത്ത തായും അദ്ദേഹം പറഞ്ഞു.  

വിളകൾക്ക് മിനിമം താങ്ങുവിലയ്ക്ക് (MSP) നിയമപരമായ ഗ്യാരണ്ടി, കാർഷിക കടം എഴുതിത്തള്ളൽ, കര്‍ഷകര്‍ക്കെതിരെയുള്ള കേസുകള്‍ പിന്‍വലിക്കുക എന്നിവ ഉൾപ്പെടെയുള്ള ആവശ്യങ്ങൾ ഉന്നയിച്ചുള്ള പ്രക്ഷോഭത്തില്‍ ആയിരക്കണക്കിന് കർഷകർ ആണ് പങ്കെടുക്കുന്നത്. ഡല്‍ഹിയുടെ രണ്ട് പ്രധാന അതിര്‍ത്തികളില്‍ കര്‍ഷകര്‍ ദിവസങ്ങളായി ക്യാമ്പ് ചെയ്യുകയാണ്.