Jammu Kashmir: ജമ്മുകശ്മീരിലെ കുൽ​ഗാമിൽ ഭീകരരും സുരക്ഷാസേനയും ഏറ്റുമുട്ടി; അഞ്ച് ഭീകരരെ വധിച്ചു, രണ്ട് സൈനികർക്ക് വീരമൃത്യു

കുൽഗാം: ജമ്മു കശ്മീരിലെ കുൽഗാം ജില്ലയിൽ ഞായറാഴ്ച രണ്ട് ഏറ്റുമുട്ടലുകളിൽ അഞ്ചോളം ഭീകരർ കൊല്ലപ്പെട്ടു. ആക്രമണത്തിൽ രണ്ട് ഇന്ത്യൻ സൈനികർ വീരമൃത്യു വരിച്ചു. മോഡേർഗാം ഗ്രാമത്തിലാണ് ആദ്യ ഏറ്റുമുട്ടൽ നടന്നത്. ഇവിടെയുണ്ടായ ഏറ്റുമുട്ടലിൽ പാരാ കമാൻഡോ ആയിരുന്ന ലാൻസ് നായിക് പ്രദീപ് നയിന് ജീവൻ നഷ്ടപ്പെട്ടു.

പ്രദേശത്ത് ഭീകരർ ഒളിച്ചിരിക്കുന്നുവെന്ന വിവരം ലഭിച്ചതിനെ തുടർന്നാണ് പോലീസും സൈന്യവും സംയുക്ത തിരച്ചിൽ ആരംഭിച്ചത്. ഇതിനിടെ ഏറ്റുമുട്ടലുണ്ടാകുകയായിരുന്നു. കുൽഗാം ജില്ലയിലെ മോഡേർഗാം വില്ലേജിലാണ് ആദ്യത്തെ ഏറ്റമുട്ടലുണ്ടായത്. പോലീസും സുരക്ഷാ സേനയും ഭീകരർക്കെതിരെ ശക്തമായ പോരാട്ടം തുടരുകയാണെന്ന് കശ്മീർ സോൺ പോലീസ് സമൂഹമാധ്യമമായ എക്സിലൂടെ അറിയിച്ചു.

പ്രദേശത്ത് ലഷ്‌കർ ഭീകരർ ഉണ്ടെന്ന് സുരക്ഷാ സേനയ്ക്ക് വിവരം ലഭിച്ചു. ഇതിനെ തുടർന്ന് നടത്തിയ തിരച്ചിലിൽ ഫ്രിസൽ ചിന്നിഗാം ഗ്രാമത്തിലാണ് രണ്ടാമത്തെ ഏറ്റുമുട്ടൽ നടന്നത്. ഏറ്റുമുട്ടലിൽ ഒന്നാം രാഷ്ട്രീയ റൈഫിൾസിലെ ഹവൽദാർ രാജ് കുമാർ വീരമൃത്യു വരിച്ചു. ഒരു ഭീകരൻ കുടുങ്ങിയതായി കരുതുന്നു.

തിരച്ചിലിനിടെ സുരക്ഷാസേനയ്ക്ക് നേരെ വെടിവെപ്പുണ്ടായി. ഒരു വീടിനുള്ളിൽ ഒളിച്ചിരുന്ന ഭീകരർ സുരക്ഷാ സേനാം​ഗങ്ങൾക്ക് നേരെ വെടിയുതിർക്കുകയായിരുന്നു. തുടർന്നാണ് ഏറ്റമുട്ടലുണ്ടായത്. കഴിഞ്ഞ മാസം പുൽവാമ മേഖലയിൽ സുരക്ഷാ സേനയും ലഷ്‌കർ ഇ തൊയ്ബ ഭീകരരും തമ്മിൽ ഏറ്റുമുട്ടലുണ്ടായിരുന്നു.