Selam Bus Accident: സേലത്ത് ബസ് മറിഞ്ഞ് നാലുപേർക്ക് ദാരുണാന്ത്യം; 63 പേർക്ക് പരിക്ക്

സേലം: വിനോദ സഞ്ചാര കേന്ദ്രമായ ഏർക്കാട്ടു നിന്നും സേലത്തേക്ക് പോകുകയായിരുന്ന യാത്രാബസ് മറിഞ്ഞ് നാലുപേർ മരിച്ചു. 63 പേർക്ക് പരിക്കേറ്റിട്ടുണ്ട്.  അപകടം നടന്നത് ഇന്നലെ രാത്രിയാണ്. 

വിനോദ സഞ്ചാരികളുമായി പോയ സ്വകാര്യ ബസാണ് അപകടത്തിൽ പെട്ടത്.  അപകടത്തിൽ സേലം സ്വദേശികളായ കാർത്തി, മുനീശ്വരൻ, ഹരിറാം എന്നിവരും തിരിച്ചറിയാത്ത ഒരാളുമാണ് മരിച്ചത്. ഏർക്കാട് ബസ്‌ സ്റ്റാൻഡിൽ നിന്നും 60 ഓളം യാത്രക്കാരുമായി സേലത്തേക്കു വന്ന സ്വകാര്യബസ് ചുരത്തിലെ 11-ാം വളവിൽ വെച്ചാണ്  താഴേക്ക് മറിഞ്ഞത്.  

വളവ് തിരിക്കുന്നതിനിടെ ഡ്രൈവർക്ക് ബസിന്റെ നിയന്ത്രണം നഷ്ടമായി മതിലിൽ ബസിടിച്ച് ബസ് 50 അടി താഴ്ചയിലേക്ക്‌ മറിയുകയായിരുന്നു.  സംഭവത്തിൽ കുറച്ച് യാത്രക്കാർ ബസിൽനിന്ന്‌ പുറത്തേക്ക് തെറിച്ചുപോയതായും റിപ്പോർട്ടുണ്ട്. ബാക്കിയുള്ളവർ ബസിന്റെ അടിയിൽപ്പെടുകയായിരുന്നു.  പരിക്കേറ്റവരിൽ നിരവധി [പേരുടെ നില ഗുരുതരമാണെന്നാണ് റിപ്പോർട്ട്.

സേലം ഏർക്കാട് ഭാഗത്തുനിന്ന്‌ പത്ത് ആംബുലൻസെത്തി പരിക്കേറ്റവരെ സേലം സർക്കാർ ആശുപത്രിയിലെത്തിച്ചു. സേലം കളക്ടർ വൃന്ദാദേവി പോലീസ് കമ്മിഷണർ വിജയകുമാരി എന്നിവർ സ്ഥലത്തെത്തി രക്ഷപ്രവർത്തനത്തിന് നേതൃത്വം നൽകിയിരുന്നു. പോലീസും ഫയർഫോഴ്‌സും സ്ഥലത്തെത്തി രക്ഷാപ്രവർത്തനം നടത്തി.