UdayaNidhi Stalin: തമിഴ്നാട്ടിൽ പടക്കം പൊട്ടി മരിച്ചവരുടെ കുടുംബങ്ങൾക്ക് സർക്കാർ ജോലി നൽകും; ഉദയനിധി സ്റ്റാലിൻ

ചെന്നൈ: തമിഴ്നാട്ടിൽ പടക്ക നിർമ്മാണശാലയിൽ ഉണ്ടായ പൊട്ടിത്തെറിയ തുടർന്ന് മരിച്ചവരുടെ കുടുംബത്തിൽ ഉള്ളവർക്ക് സർക്കാർ ജോലി നൽകുമെന്ന് മന്ത്രി ഉദയനിധി സ്റ്റാലിൻ പ്രഖ്യാപിച്ചു. ഇന്നലെ ചാത്തൂരിനടുത്ത് കുണ്ടയിരുപ്പു പ്രദേശത്തെ പടക്കനിർമാണശാലയിലുണ്ടായ അപകടത്തെ തുടർന്ന് 5 സ്ത്രീകളടക്കം പത്തുപേരാണ് മരിച്ചത്. മരിച്ചവർക്ക് അനുശോചനം രേഖപ്പെടുത്തിയ അദ്ദേഹം തമിഴ്നാട് മുഖ്യമന്ത്രി എം.കെ.സ്റ്റാലിൻ മുഖ്യമന്ത്രിയുടെ ദുരിതാശ്വാസ നിധിയിൽ നിന്ന് മൂന്ന് ലക്ഷം രൂപ വീതം നഷ്ടപരിഹാരം നൽകുമെന്നും പറഞ്ഞു. 

മരിച്ചവരുടെ കുടുംബാംഗങ്ങളെ നേരിട്ട് കണ്ട് അനുശോചനം രേഖപ്പെടുത്തുകയും ദുരിതാശ്വാസ നിധിയിലേക്കുള്ള ചെക്ക് കൈമാറുകയും ചെയ്തു.റവന്യൂ-ദുരന്തനിവാരണ മന്ത്രി കെകെഎസ്എസ്ആർ രാമചന്ദ്രൻ, തൊഴിൽ ക്ഷേമ മന്ത്രി സി വി ഗണേശൻ, നിയമസഭാംഗങ്ങളായ ശ്രീനിവാസൻ, രഗുരാമൻ, ജില്ലാ കലക്ടർ ജയശീലൻ, തുടങ്ങിയവർ പങ്കെടുത്തു. തമിഴ്‌നാട് സർക്കാരിന് വേണ്ടി മൂന്ന് ലക്ഷവും ലേബർ വെൽഫെയർ ബോർഡിൻ്റെ പേരിൽ രണ്ട് ലക്ഷത്തി അയ്യായിരവും നൽകും.

മരിച്ചവരുടെ കുടുംബങ്ങൾ സർക്കാർ ജോലി ആവശ്യപ്പെട്ടിട്ടുണ്ട്. ഇവരുടെ ആവശ്യങ്ങൾ മുഖ്യമന്ത്രിയെ കണ്ട് ചർച്ച ചെയ്യും. അംഗൻവാടി, പോഷകാഹാര കേന്ദ്രങ്ങൾ തുടങ്ങിയ ജോലികളിൽ ഇവർക്ക് മുൻഗണന നൽകുമെന്നും അദ്ദേഹം വ്യക്തമാക്കി. അതേസമയം വെമ്പക്കോട്ടയിൽ പടക്ക ഫാക്ടറി അപകടത്തിൽ 10 പേർ മരിച്ച സംഭവത്തിൽ പടക്ക നിർമാണശാല മാനേജർ ജയപാലും സുരേഷും ഉൾപ്പെടെ രണ്ടുപേരെ ആലംകുളം പൊലീസ് അറസ്റ്റ് ചെയ്തു. ഇവർ അപകടത്തെക്കുറിച്ച് അന്വേഷിച്ചുവരികയാണ്. കൂടാതെ ഒളിവിലുള്ള പടക്ക ഫാക്ടറി ഉടമ വിഘ്നേഷിനായി തിരച്ചിൽ നടത്തുകയാണ്.