Zomato: ടൊമാറ്റോ സൊമാറ്റോ ആയ കഥ; കമ്പനിയുടെ പേര് വന്ന വഴി വെളിപ്പെടുത്തി ദീപീന്ദർ ഗോയൽ

ഇന്ത്യക്കാരുടെ പ്രിയപ്പെട്ട ഓൺലൈൻ ഫുഡ് ഡെലിവറി പ്ലാറ്റ്ഫോമാണ് സൊമാറ്റോ. പക്ഷേ സൊമാറ്റോക്ക് ആ പേര് എങ്ങനെ വന്നു എന്നതിനെ പറ്റി ആർക്കെങ്കിലും അറിയാമോ?

ഇപ്പോഴിതാ തന്റെ കമ്പനിയുടെ പേരിന് പിന്നിലെ രഹസ്യം പരസ്യമാക്കിയിരിക്കുകയാണ് സൊമാറ്റോ സിഇഒ ദീപിന്ദർ ​ഗോയൽ. കോമഡി ഷോയായ ദി ​ഗ്രേറ്റ് ഇന്ത്യൻ കപിൽ ഷോയിൽ പങ്കെടുത്തപ്പോഴാണ് ദീപിന്ദർ ഇക്കാര്യം വെളിപ്പെടുത്തിയത്. 

അവതാരകനായ കപിൽ ശർമ്മ ദീപിന്ദർ ​ഗോയലിനോട് ഞങ്ങൾ ടൊമാറ്റോ, പൊട്ടാറ്റോ എന്നൊക്കെ കേട്ടിട്ടുണ്ട്, പക്ഷേ എന്താണ് ഈ സൊമാറ്റോ എന്ന് ചോദിക്കുകയുണ്ടായി. ഈ ചോദ്യത്തിന് ചെറിയ പുഞ്ചിരിയോടെയാണ് ദീപീന്ദർ ഉത്തരം പറഞ്ഞത്. യഥാർത്ഥത്തിൽ ഞങ്ങൾ 'ടൊമാറ്റോ ഡോട്ട് കോം' എന്ന പേരായിരുന്നു തീരുമാനിച്ചത്. പക്ഷേ ഞങ്ങൾക്ക് ആ ഡൊമെയ്ൻ കിട്ടിയില്ല, അതിനാൽ ഒരക്ഷരം മാറ്റി 'സൊമാറ്റോ ഡോട്ട് കോം' എന്നാക്കി ഡൊമെയ്ൻ നേടി. വളരെ രസകരമായിട്ടായിരുന്നു സിഇഒയുടെ മറുപടി.

തന്റെ വിവാഹത്തെ പറ്റിയും അദ്ദേഹം മനസ്സ് തുറക്കുന്നുണ്ട്. മെക്സിക്കോയിൽ നിന്നുള്ള ​ഗ്രേഷ്യ മുനോസിനെ കണ്ടുമുട്ടിയത് എങ്ങനെയാണെന്ന കപിൽ ശർമ്മയുടെ ചോദ്യത്തിനാണ് ദീപീന്ദർ മറുപടി പറഞ്ഞത്. സുഹൃത്ത് വഴിയാണ് ​ഗ്രേഷ്യയെ പരിചയപ്പെടുന്നത്. ​ഗ്രേഷ്യ ആദ്യമായി ഡൽഹിയിൽ വന്നപ്പോൾ നിനക്ക് ചേരുന്ന ഒരു പെൺകുട്ടിയുണ്ടെന്നും അവളെ നീ കാണണം, കണ്ടു കഴിഞ്ഞാൽ ഉറപ്പായും നീ വിവാഹം കഴിക്കുമെന്നും സുഹൃത്ത് പറഞ്ഞു. അവന്റെ ദീർഘവീക്ഷണം തെറ്റിയില്ലെന്നും ദീപീന്ദർ പറയുന്നു.