Congress സഖ്യം തന്റെ ജനപ്രീതിക്ക് കോട്ടമുണ്ടാക്കിയെന്ന് കുമാരസ്വാമി; കരയുന്നത് ഗൗഡ കുടുംബത്തിന്റെ സംസ്ക്കാരമെന്ന് സിദ്ദരാമയ്യ

ബം​ഗളൂരു: കോൺ​ഗ്രസിനെതിരെ വീണ്ടും രൂക്ഷവിമർശനവുമായി ക‌ർണാടക മുൻ മുഖ്യമന്ത്രിയും ജനതാദൾ (S) നിയമസഭകക്ഷി നേതാവുമായ എച്ച്.ഡി.കുമാരസ്വാമി (HD Kumaraswamy). ക‌ർണാടകയിൽ കോൺ​ഗ്രസുമായി ചേ‌ർന്ന് സർക്കാർ  രൂപീകരിച്ചതിനെ തുട‌ർന്ന് തന്റെ ജനപ്രീതി നഷ്ടമായെന്ന് കുമാരസ്വാമി മൈസൂരിൽ മാധ്യമപ്രവ‌ർത്തകരോട് പറഞ്ഞു. ബിജെപിയുമായി (BJP) സഖ്യം രൂപീകരിച്ചിരുന്നെങ്കിൽ താൻ 5 വ‍ർഷം മുഖമന്ത്രിയായി തികച്ചേനെന്നും കുമാരസ്വാമി പറഞ്ഞു.

കോൺ​ഗ്രസ് സഖ്യമെന്ന കെണിയിൽ വീഴുകയായിരുന്നും കോൺ​ഗ്രസ് നേതാക്കളായ സിദ്ധരാമയ്യ (Siddaramaiah) തുടങ്ങിയവ‌ർ തനിക്കെതിരെ ​ഗൂഡാലോചന നടത്തിയെന്നും കുമാരസ്വാമി കൂട്ടിച്ചേ‍ർത്തു. എതിർകക്ഷിയായിരുന്ന ബിജെപി പോലും തന്നെ ഇതുപോലെ വഞ്ചിട്ടില്ലെന്നും അദ്ദേഹം പറഞ്ഞു. 

താൻ 12 വർഷം കൊണ്ട് നേടിയെടുത്ത ജനപ്രീതിയാണ് കോൺ​ഗ്രസുമായി ചേ‌ർന്നപ്പോൾ തനിക്ക് നഷ്ടമായിയെന്നും എന്നാൽ നേരത്തെ 2006ൽ ബിജെപിയുമായി പിരഞ്ഞ് മുഖ്യമന്ത്രി സ്ഥാനം രാജിവെച്ചപ്പോൾ പോലും തനിക്കുണ്ടായിരുന്ന ജനപിന്തുണയ്ക്ക് യാതൊരു കോട്ടവും സംഭവിച്ചില്ലയെന്ന് കുമാരസ്വാമി പറഞ്ഞു.

എന്നാൽ കുമാരസ്വാമിക്ക് യാതൊരു ജനപിന്തുണയില്ലെന്നും കള്ളം പറയാൻ മിടുക്കനാണെന്നും കോൺ​ഗ്രസ് നേതാവ് സിദ്ധരാമയ്യ രം​ഗത്തെത്തി. കരയുന്നത് ​ഗൗഡ കുടംബത്തിന്റെ പ്രത്യേകതയാണെന്നും, കരഞ്ഞാണ് ജനങ്ങൾക്കിടയിൽ ഇവർ വിശ്വാസമുണ്ടാക്കുന്നെതന്നും അതുകൊണ്ട് ഈ കണ്ണുനീരിന് യാതൊരു വിലയുമില്ലെന്ന് സിദ്ധരാമയ്യ കുറ്റപ്പെടുത്തി.