kallakurichi liquor death: കള്ളക്കുറിച്ചി വിഷ മദ്യദുരന്തം; മുഖ്യപ്രതി ചിന്നദുരൈ അറസ്റ്റിൽ

ചെന്നൈ: തമിഴ്നാട് കള്ളക്കുറിച്ചയിലെ വ്യാജമദ്യദുരന്തവുമായി ബന്ധപ്പെട്ട കേസിലെ മുഖ്യപ്രതിയായ ചിന്നദുരൈ പോലീസ് പിടിയിൽ. നൂറോളം വ്യാജമദ്യ ദുരന്തക്കേസിലെ മുഖ്യപ്രതിയാണ് പിടിയിലായ ചിന്നദുരൈ എന്ന് തമിഴ്നാട് പൊലീസ് പറഞ്ഞു. ഇയാളെ പൊലീസ് അറസ്റ്റ് ചെയ്തത് കടലൂരിൽ നിന്നാണ്. വ്യാജമദ്യദുരന്തക്കേസുമായി ബന്ധപ്പെട്ട് ഗോവിന്ദരാജ്, ദാമോദരൻ, വിജയ എന്നിവരെ നേരത്തെ പിടികൂടിയിരുന്നു. കള്ളക്കുറിച്ചിയിൽ വ്യാജമദ്യദുരന്തത്തിലെ മരണസംഖ്യ 50 ആയി ഉയർന്നു. 

വ്യാജമദ്യദുരന്ത സംഭവവുമായി ബന്ധപ്പെട്ട് തമിഴ്നാട് സർക്കാർ പ്രതിരോധത്തിലായിരിക്കുകയാണ്. വ്യാദമദ്യ നിർമാണവുമായി ബന്ധപ്പെട്ട നൂറിലധികം കേസുകളിൽ പ്രതിയായ ഒരു വ്യക്തി എങ്ങനെ ജയിലിന് പുറത്തിറങ്ങി സമാന കുറ്റകൃത്യങ്ങൾ തുടരുന്നു എന്നത് ചൂണ്ടിക്കാട്ടി സ്റ്റാലിൻ  സർക്കാറിനെതിരെ രൂക്ഷവിമർശനമാണ് ഉയരുന്നത്.  കള്ളക്കുറിച്ചി വിഷമദ്യദുരന്തത്തിൽ കൊല്ലപ്പെട്ടവരുടെ കുടുംബം ഇന്നലെ തന്നെ ചിന്നദുരൈയുടെ അറസ്റ്റ് ആവശ്യപ്പെട്ടിരുന്നു.

വ്യാജമദ്യദുരന്തക്കേസുമായി ബന്ധപ്പെട്ട സംഭവത്തിൽ രാജ്ഭവൻ നടപടി ആരംഭിച്ചു. ഗവർണർ ചീഫ് സെക്രട്ടറിയോട് റിപ്പോർട്ട് തേടിയിരുന്നു. വിഷമദ്യ ദുരന്തത്തിൽ സർക്കാർ പ്രഖ്യാപിച്ച സിബിസിഐഡി അന്വേഷണം ഇന്ന് ആരംഭിക്കും. അതേസമയം ഫോറൻസിക് പരിശോധനയിലൂടെ മദ്യത്തിൽ മെഥനോളിന്റെ അംശം തിരിച്ചറിഞ്ഞു. ലോഡിംഗ് തൊഴിലാളികളും ദിവസ വേതനക്കാരുമാണ് അപകടത്തിൽ പെട്ടതിൽ ഭൂരഭാ​ഗവും. ഇതിനിടെ  വ്യാജ മദ്യ ദുരന്തത്തിന് പിന്നാലെ ജില്ലാ കലക്ടർ ശ്രാവൺ കുമാറിനെ സ്ഥലം മാറ്റി.  ജില്ലാ പൊലീസ് മേധാവിക്കെതിരെയും നടപടി സ്വീകരിച്ചു. എസ്പി സമയ്‌സിങ് മീനയെ സംഭവത്തിൽ സസ്‌പെൻഡ് ചെയ്തു. ഡെപ്യൂട്ടി സൂപ്രണ്ടടക്കം തമിഴ്നാട് പൊലീസ് ലഹരിവിരുദ്ധ വിഭാഗത്തിലെ മുഴുവൻ ഉദ്യോഗസ്ഥരെയും താൽക്കാലികമായി സസ്പെൻഡ് ചെയ്തിട്ടുണ്ട്.