Accident: കർണാടകയിലെ ചിക്കബല്ലാപ്പൂരിൽ വാഹനാപകടം; നിർത്തിയിട്ടിരുന്ന ട്രക്കിലേക്ക് കാർ ഇടിച്ചുകയറി 12 പേർ മരിച്ചു

കർണാടകയിലെ ചിക്കബല്ലാപ്പൂരിൽ വാഹനാപകടത്തിൽ 12 പേർ മരിച്ചു. ബാംഗ്ലൂർ-ഹൈദരാബാദ് എൻഎച്ച് 44ൽ കാർ നിർത്തിയിട്ടിരുന്ന ട്രക്കിൽ ഇടിച്ചാണ് അപകടമുണ്ടായത്. ബാഗേപള്ളിയിൽ നിന്ന് ചിക്കബല്ലാപ്പൂരിലേക്ക് പോവുകയായിരുന്നവരാണ് അപകടത്തിൽ പെട്ടതെന്ന് ബാഗേപള്ളി ട്രാഫിക് പോലീസ് പറഞ്ഞു.

വ്യാഴാഴ്ച പുലർച്ചെ ഏഴ് മണിയോടെ ചിക്കബല്ലാപ്പൂരിലെ ട്രാഫിക് പോലീസ് സ്റ്റേഷന് സമീപത്ത് വച്ചാണ് അപകടം നടന്നത്. നിർത്തിയിട്ട ടാങ്കർ ലോറിയുടെ പുറകിലേക്ക് ടാറ്റാ സുമോ കാർ ഇടിച്ചുകയറിയാണ് അപകടമുണ്ടായത്. വാഹനത്തിൽ 14 പേർ ഉണ്ടായിരുന്നതായാണ് വിവരം. ജോലിക്ക് പോകുന്ന ആളുകളുമായി വന്ന വാഹനമാണ് അപകടത്തിൽപ്പെട്ടതെന്നാണ് വിവരം.

നാല് സ്ത്രീകൾ ഉൾപ്പെടെ 12 പേരാണ് മരിച്ചതെന്ന് വാർത്താ ഏജൻസി പിടിഐ റിപ്പോർട്ട് ചെയ്യുന്നു. ഒരാൾക്ക് ഗുരുതരമായി പരിക്കേറ്റു. പരിക്കേറ്റയാളെ സമീപത്തെ ആശുപത്രിയിൽ ചികിത്സയിൽ പ്രവേശിപ്പിച്ചു. “അപകടത്തിന്റെ കൃത്യമായ കാരണം അന്വേഷിക്കുകയാണ്, എന്നാൽ മൂടൽമഞ്ഞ് കാരണം ദൃശ്യപരത കുറവായതാണ് അപകടത്തിന് കാരണമായതെന്നാണ് പ്രാഥമിക നി​ഗമനം” ചിക്കബല്ലാപൂർ പോലീസ് സൂപ്രണ്ട് ഡി എൽ നാഗേഷ് പറഞ്ഞു.