Lok Sabha Election 2024: ഗെയിം മാറ്റി കോണ്‍ഗ്രസ്‌, റായ്ബറേലിയിൽ പ്രിയങ്ക ഗാന്ധി തന്നെ!! പ്രഖ്യാപനം ഉടന്‍

Rae Bareli Latest Update: ലോക്‌സഭാ തിരഞ്ഞെടുപ്പിനുള്ള രാഷ്ട്രീയ ബ്യൂഗിൾ മുഴങ്ങിക്കഴിഞ്ഞു. എല്ലാ പാർട്ടികളും തിരഞ്ഞടുപ്പിനുള്ള ഒരുക്കങ്ങളുടെ തിരക്കിലാണ്. അതേസമയം, ഉത്തർപ്രദേശിൽ ബിജെപി  സ്ഥാനാർത്ഥി പ്രഖ്യാപനം നടത്തി ആദ്യഘട്ട തിരഞ്ഞെടുപ്പ് പ്രചാരണവും ആരംഭിച്ചുകഴിഞ്ഞിരിയ്ക്കുകയാണ്. 

മറുവശത്ത്, ഇന്ത്യ സഖ്യത്തിന്‍റെ ഭാഗമായ കോൺഗ്രസും ഉത്തര്‍ പ്രദേശിലെ നിരവധി സീറ്റുകളിലേക്കുള്ള സ്ഥാനാർത്ഥികളുടെ പട്ടിക പുറത്തിറക്കി. എന്നാൽ, അമേത്തി, റായ്ബറേലി സീറ്റുകളിൽ നിന്ന് ആരെയും പാർട്ടി ഇതുവരെ നാമനിർദേശം ചെയ്തിരുന്നില്ല. 

എന്നാല്‍, ഇപ്പോള്‍ പുറത്തുവരുന്ന വാര്‍ത്തകള്‍ അനുസരിച്ച് ഉത്തര്‍ പ്രദേശില്‍ രാഷ്ട്രീയ ചൂട് ഉയരാനുള്ള സാധ്യതയാണ് കാണുന്നത്. അതായത്, കോൺഗ്രസ് യുപിയുടെ ഗെയിം പ്ലാൻ മാറ്റി.  

 റായ്ബറേലിയിൽ നിന്ന് , പ്രിയങ്ക ഗാന്ധിയെ മത്സരിപ്പിക്കാന്‍ ധാരണയായതായി വൃത്തങ്ങൾ അറിയിച്ചു. പ്രിയങ്കയുടെ സ്ഥാനാർത്ഥിത്വം സംബന്ധിച്ച പ്രഖ്യാപനം ഉടന്‍ ഉണ്ടായേക്കും എന്നാണ് സൂചനകള്‍. 

റായ്ബറേലിയുമായുള്ള ഗാന്ധി കുടുംബത്തിന്‍റെ ബന്ധം വളരെ പുരാതനം  

റായ്ബറേലിയുമായി ഗാന്ധി കുടുംബത്തിന് വളരെ പഴയ ബന്ധമാണ് ഉള്ളത്.  റായ്ബറേലി കോൺഗ്രസിന്‍റെ ശക്തികേന്ദ്രമായി കണക്കാക്കപ്പെടുന്നു. ഗാന്ധി കുടുംബത്തിലെ നിരവധി പേർ ഇവിടെനിന്ന് ലോക്‌സഭയിൽ എത്തിയിട്ടുണ്ട്. രണ്ട് തവണ ഈ സീറ്റിൽ വിജയിച്ചാണ് ഇന്ദിരാഗാന്ധി എംപിയായത്. ഇതുമാത്രമല്ല, മുൻ കോൺഗ്രസ് അദ്ധ്യക്ഷ സോണിയാ ഗാന്ധി  നാലുതവണ ഈ സീറ്റിൽ നിന്ന് വിജയിച്ച് പാർലമെന്‍റില്‍ എത്തിയിട്ടുണ്ട്. കഴിഞ്ഞ തിരഞ്ഞെടുപ്പിൽ റായ്ബറേലിയിൽ മാത്രമാണ് കോൺഗ്രസ് വിജയിച്ചത്.

ആരോഗ്യകാരണങ്ങളാൽ ഇത്തവണ ലോക്‌സഭാ തിരഞ്ഞെടുപ്പിൽ മത്സരിക്കാൻ സോണിയ ഗാന്ധി വിസമ്മതിച്ചിരുന്നു. അതോടെ, പാര്‍ട്ടി അവരെ രാജസ്ഥാനിൽ നിന്ന് രാജ്യസഭയിലേക്ക് അയച്ചു. സോണിയാ ഗാന്ധി രാജ്യസഭയിലെത്തിയതോടെ റായ്ബറേലിയിൽ നിന്ന് ആരു മത്സരിക്കുമെന്ന കാര്യത്തിലായിരുന്നു എല്ലാവരുടെയും കണ്ണ്.

പ്രിയങ്ക ഗാന്ധി ഇത്തവണ തിരഞ്ഞെടുപ്പിൽ മത്സരിക്കണമെന്ന ആവശ്യവുമായി നിരവധി  പ്രാദേശിക നേതാക്കൾ രംഗത്തെത്തിയിരുന്നു. സോണിയ ഗാന്ധി തിരഞ്ഞെടുപ്പിൽ മത്സരിക്കാൻ വിസമ്മതിച്ചപ്പോൾ മുതൽ പ്രാദേശിക നേതാക്കളും പാർട്ടി അനുഭാവികളും പ്രിയങ്ക ഗാന്ധിയെ റായ്ബറേലിയിൽ നിന്ന് മത്സരിപ്പിക്കണമെന്ന് ആവശ്യപ്പെട്ടിരുന്നു.  എന്നാല്‍, ഇപ്പോള്‍ 
റായ്ബറേലിയിലെ സ്ഥാനാർത്ഥിത്വം സംബന്ധിച്ച് കോൺഗ്രസ് നേതാക്കൾക്കിടയിൽ ധാരണയായതായാണ്  റിപ്പോര്‍ട്ട്. അതായത്, ഏപ്രിൽ 15ന് ശേഷം പുറത്തുവരുന്ന കോൺഗ്രസ് സ്ഥാനാർത്ഥി പട്ടികയിൽ പ്രിയങ്കയുടെ പേരും ഉൾപ്പെട്ടേക്കും..!