Maratha Quota Protest : മഹരാഷ്ട്രയിൽ എൻസിപി എംഎൽഎയുടെ വീടിന് മറാത്ത ക്വാട്ട പ്രതിഷേധിക്കാർ തീവെച്ചു

മുംബൈ : മഹരാഷ്ട്രയിൽ എൻസിപി എംഎൽഎ പ്രകാശ് സോളങ്കെയുടെ വീടിന് തീവെച്ചു. മഹരാഷ്ട്രയിലെ ബീഡ് ജില്ലയിൽ എംഎൽഎയുടെ വസതിക്ക് മറാത്ത സംവരണം പ്രതിഷേധക്കാരാണ് തീവെച്ചത്. മറാത്ത സംവരണത്തിനായി നിരഹാരം സമരം ചെയ്യുന്ന മനോജ് പാട്ടിലിനെതിരെ എൻസിപി എംഎൽഎ നടത്തിയ പ്രസ്താവനയിൽ പ്രതിഷേധിച്ചാണ് പ്രതിഷേധിക്കാർ സോളാങ്കെയുടെ വീടിന് തീവെച്ചത്. എംഎൽഎയുടെ വീടിന് നേരെ കല്ലേറുണ്ടാകുകയും ചെയ്തു. ആക്രമണത്തിൽ വീടിന്റെ ഒരു ഭാഗം നശിച്ചു. പ്രതിഷേധക്കാർ പുറത്ത് നിറത്തിട്ടിരുന്ന കാറുകൾ തകർക്കുകയും ചെയ്തു. 

താനും കുടുംബവും തന്റെ ജീവനക്കാരും സുരക്ഷിതരാണ് എംഎൽഎ അറിയിച്ചതായി വാർത്ത ഏജൻസിയായ എഎൻഐ റിപ്പോർട്ട് ചെയ്തു. എന്നാൽ തീവെപ്പിൽ വീടിന് കനത്ത നാശമുണ്ടായതായി എൻസിപിയുടെ എംഎൽഎ അറിയിച്ചു. സംസ്ഥാനത്തെ ആഭ്യന്തര വകുപ്പിന്റെ അനാസ്ഥയാണ് എംഎൽഎയുടെ വീടിന് നേരെയുണ്ടായ ആക്രമണമെന്ന് എൻസിപി നേതാവ് സുപ്രിയ സുലെ പറഞ്ഞു. മഹരാഷ്ട്രയുടെ ത്രിപ്പിൾ എഞ്ചിൻ സർക്കാരിന്റെ പരാജയമാണിത്. ഇന്ന് ഒരു എംഎൽഎയുടെ വീടിന് തീവെച്ചു, ആഭ്യന്തര മന്ത്രി എന്താണ് ചെയ്യുന്നത്? ഇത് അവരുടെ ഉത്തരവാദിത്വമല്ലേ? സുപ്രിയ സൂലെ ചോദിച്ചു.