Mukesh Ambani: മുകേഷ് അംബാനിക്ക് വധഭീഷണി; 20 കോടി നൽകിയില്ലെങ്കിൽ കൊല്ലുമെന്ന് സന്ദേശം

മുംബൈ: റിലയൻസ് ഇൻഡസ്ട്രീസ് ചെയർമാൻ മുകേഷ് അംബാനിക്ക് വധഭീഷണി. 20 കോടി നൽകിയില്ലെങ്കിൽ വെടിവെച്ചു കൊല്ലുമെന്നാണ് ഭീഷണി സന്ദേശത്തിൽ വ്യക്തമാക്കുന്നത്. ഒക്‌ടോബർ 27 നാണ് വധഭീഷണി ഇ-മെയിലിൽ ലഭിച്ചത്. സംഭവത്തിൽ മുംബൈയിലെ ഗാംദേവി പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. 

ഐപിസി 387, 506 (2) വകുപ്പുകൾ പ്രകാരമാണ് പോലീസ് കേസ് രജിസ്റ്റർ ചെയ്തിരിക്കുന്നത്.  20 കോടി നൽകിയില്ലെങ്കിൽ വെടിവെച്ചുകൊല്ലും എന്നാണ് ഇ-മെയിൽ സന്ദേശത്തിൽ പറഞ്ഞിരിക്കുന്നത് ഒപ്പം  ഇന്ത്യയിലെ മികച്ച ഷൂട്ടർമാർ ഞങ്ങളോടൊപ്പമുണ്ടെന്നും കുറിച്ചിട്ടുണ്ട്.  ഷദാബ് ഖാൻ എന്ന പേരിലുളള ഇമെയില്‍ ഐഡിയില്‍ നിന്നാണ് അംബാനിക്ക് സന്ദേശം ലഭച്ചിരിക്കുന്നതെന്ന് അധികൃതര്‍ അറിയിച്ചിട്ടുണ്ട്. കേസിൽ ആരെയും ഇതുവരെ അറസ്റ്റ് ചെയ്തിട്ടില്ല. കൂടുതൽ അന്വേഷണം നടന്നുവരികയാണ്.  

കഴിഞ്ഞ വര്‍ഷവും അംബാനിക്കും കുടുംബത്തിനും വധഭീഷണി ഉണ്ടായിരുന്നു. സംഭവത്തില്‍ ഒരു ബീഹാര്‍ സ്വദേശിയെ മുംബൈ പോലീസ് അറസ്റ്റ് ചെയ്യുകയുമുണ്ടായി. വസതിയായ ആന്റിലയും എച്ച്‌. എൻ റിലയൻസ് ആശുപത്രിയും ബോംബ് വച്ച്‌ തകര്‍ക്കും എന്നായിരുന്നു അന്നത്തെ ഭീഷണി.  2021 ൽ അംബാനിയുടെ വീടിനു പുറത്തു നിന്നും സ്‌ഫോടക വസ്തുക്കൾ കണ്ടെത്തിയത് ഏറെ ചർച്ചകൾക്കിടയാക്കിയിരുന്നു. ഈ കേസിൽ മുംബൈ പോലീസിലെ ഉദ്യോഗസ്ഥനടക്കം അറസ്റ്റിലായിരുന്നു.