Pariksha Pe Charcha: പ്രധാനമന്ത്രിയുടെ പരീക്ഷാ പേ ചർച്ച ഇന്ന് 11 മണിക്ക്

ന്യൂഡൽഹി: പ്രധാനമന്ത്രിയുടെ ഏഴാമത് പരീക്ഷാ പേ ചർച്ച ഇന്ന് ഡൽഹിയിൽ നടക്കും. ഡൽഹിയിലെ പ്രഗതി മൈതാനിലെ ഭാരത് മണ്ഡപത്തിൽ രാവിലെ 11 മണിക്കാണ് ചർച്ച നടക്കുന്നത്. രാജ്യത്തെ വിവിധ സംസ്ഥാനങ്ങളിൽ നിന്നും കേന്ദ്രഭരണ പ്രദേശങ്ങളിൽ നിന്നും തിരഞ്ഞെടുക്കപ്പെട്ട 3000 ത്തോളം വിദ്യാർത്ഥികൾ ഇന്ന് പ്രധാനമന്ത്രിയുമായി നേരിട്ട് സംവദിക്കും. 

പരിപാടി ഓണ്‍ലൈനായും ടെലിവിഷൻ വഴിയും പ്രദർശിപ്പിക്കും. വിദ്യാർത്ഥികളുമായി സംവദിക്കാൻ ആകാംഷയോടെ കാത്തിരിക്കുന്നുവെന്ന് പ്രധാനമന്ത്രി സോഷ്യൽ മീഡിയയിൽ സമൂഹമാധ്യമത്തിൽ കുറിച്ചിട്ടുണ്ട്. ആമസോൺ പ്രൈം പ്ലാറ്റ്ഫോമിലും ഈ പരിപാടി 11 മണി മുതൽ തൽസമയം കാണാം. രാജ്യത്തെ ഉന്നത വിദ്യാഭ്യസ സ്ഥാപനങ്ങളോടും ഈ പരിപാടി കുട്ടികളെ കാണിക്കാൻ വിദ്യാഭ്യാസ മന്ത്രാലയം മാർഗ നിർദേശം നൽകിയിട്ടുണ്ട്. ഇത്തവണ 2 കേടിയിലധികം വിദ്യാർത്ഥികളാണ് ഈ പരിപാടിയിൽ പങ്കെടുക്കാൻ രജിസ്റ്റർ ചെയ്തതെന്ന് കേന്ദ്ര വിദ്യാഭ്യാസ മന്ത്രാലയം അറിയിച്ചു. 2018 ൽ തുടങ്ങിയ പരീക്ഷാ പേ ചർച്ച ആറ് പതിപ്പുകൾ പിന്നിട്ടിരിക്കുകയാണ്. കൊവിഡ് കാലത്ത് പരിപാടി ഓണ്‍ലൈനായിട്ടാണ് നടത്തിയത്. 

പരീക്ഷ പേ ചർച്ച എന്ന പരിപാടിയിൽ ഇന്ന് വിദ്യാർത്ഥികളെ കൂടാതെ 14 ലക്ഷത്തിലധികം അദ്ധ്യാപകരും അഞ്ച് ലക്ഷത്തിലധികം രക്ഷിതാക്കളും പങ്കെടുക്കും. പരിപാടിയിൽ ഏകലവ്യ മോഡൽ റസിഡൻഷ്യൽ സ്‌കൂളിലെ നൂറ് വിദ്യാർത്ഥികൾ ആദ്യമായി പങ്കെടുക്കും. പരിപാടി ദൂരദർശൻ, ഡിഡി നാഷണൽ, ഡിഡി ന്യൂസ്, ഡിഡി ഇന്ത്യ എന്നീ ചാനലുകളിലും പിഎംഒ, വിദ്യാഭ്യാസ മന്ത്രാലയം, ദൂരദർശൻ, വിദ്യാഭ്യാസ മന്ത്രാലയത്തിന്റെ യൂടൂബ് ചാനൽ തുടങ്ങിയ വിവിധ വെബ്‌സൈറ്റുകളിലുടെയും കാണാൻ സാധിക്കും.