RBI Gets Bomb Threat: റിസർവ് ബാങ്കിന് ബോംബ് ഭീഷണി

മുംബൈ: റിസർവ് ബാങ്കിൻ്റെ മുംബൈയിലെ ആസ്ഥാനം സ്‌ഫോടകവസ്തുക്കൾ ഉപയോഗിച്ച് തകർക്കുമെന്ന് ഭീഷണി സന്ദേശം. ഇന്നലെയാണ് റഷ്യൻ ഭാഷയിലുള്ള ഭീഷണി സന്ദേശം ആർബിഐ ഗവർണർ സഞ്ജയ് മൽഹോത്രയുടെ ഔദ്യോഗിക ഇമെയിൽ ഐഡിയിൽ ലഭിച്ചത്. 

ഇമെയിൽ ഭീഷണിയെ കുറിച്ചുള്ള വിവരം ലഭിച്ചതിനെത്തുടർന്ന് മുംബൈ പോലീസ് അയച്ചയാൾക്കെതിരെ ഭാരതീയ ന്യായ സംഹിതയുടെ പ്രസക്തമായ വകുപ്പുകൾ പ്രകാരം കേസ് ഫയൽ ചെയ്യുകയും അന്വേഷണം ആരംഭിക്കുകയും ചെയ്തു.

റഷ്യൻ ഭാഷയിലായിരുന്നു ഭീഷണി സന്ദേശം ലഭിച്ചത്.  ഇമെയിൽ അയക്കാൻ വിപിഎൻ ഉപയോഗിച്ചിട്ടുണ്ടോ എന്നതടക്കം പോലീസ് അന്വേഷിക്കുന്നുണ്ട്.  അന്വേഷണത്തിൽ ഇമെയിൽ അയച്ചയാളുടെ ഐപി അഡ്രസ് കണ്ടെത്തിയതായാൻ റിപ്പോർട്ട്. 

ആറ് വർഷത്തിന് ശേഷം അധികാരമൊഴിഞ്ഞ ശക്തികാന്ത ദാസിന് പകരമായി പുതിയ ആർബിഐ ഗവർണർ സഞ്ജയ് മൽഹോത്ര റിസർവ് ബാങ്കിൻ്റെ 26-ാമത് ഗവർണറായി ചുമതലയേറ്റതിന് ദിവസങ്ങക്കുള്ളിലാണ് ഈ ഭീഷണി വന്നിരിക്കുന്നത്.

രാജസ്ഥാൻ കേഡറിലെ ഐഎഎസ് ഉദ്യോഗസ്ഥനായ മൽഹോത്രയെ പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള ക്യാബിനറ്റാണ് തിരഞ്ഞെടുത്തത്.  കഴിഞ്ഞ മാസം ആദ്യം മുംബൈയിലെ ആർബിഐ കസ്റ്റമർ കെയർ സെൻ്ററിലേക്കും പാക്കിസ്ഥാൻ ആസ്ഥാനമായുള്ള ഭീകര സംഘടനയായ ലഷ്‌കർ-ഇ-തൊയ്ബയുടെ "സിഇഒ" എന്ന് അവകാശപ്പെടുന്ന ഒരാളിൽ നിന്ന് ഭീഷണി കോൾ വന്നിരുന്നു. സംഭവം ഉടൻ തന്നെ മുംബൈ പോലീസിൽ അറിയിക്കുകയും അവർ നടത്തിയ തിരച്ചിലിൽ ശയാസ്പദമായ ഒന്നും കണ്ടെത്താനുമായില്ല.