Telangana: തെലങ്കാനയെ രേവന്ത് റെഡ്ഡി നയിക്കും, ഡിസംബർ 7 ന് സത്യപ്രതിജ്ഞാ ചടങ്ങ്

Telangana Update: തെലങ്കാനയിലെ തിരഞ്ഞെടുപ്പ് വിജയത്തിന് പിന്നാലെ രേവന്ത് റെഡ്ഡി മുഖ്യമന്ത്രിയാകുമെന്ന് കോൺഗ്രസ് നേതൃത്വം  പ്രഖ്യാപിച്ചു. ഡിസംബർ 7ന് തെലങ്കാനയുടെ പുതിയ മുഖ്യമന്ത്രിയായി രേവന്ത് റെഡ്ഡി സത്യപ്രതിജ്ഞാ ചെയ്യും. 

രേവന്ത് റെഡ്ഡി നേതൃത്വത്തില്‍ തുടര്‍ന്നും മുന്നോട്ടുനീങ്ങാന്‍ കോൺഗ്രസ് ദേശീയ  അദ്ധ്യക്ഷന്‍  തീരുമാനിച്ചതായി കോൺഗ്രസ് ജനറൽ സെക്രട്ടറി കെസി വേണുഗോപാൽ വാർത്താസമ്മേളനത്തിൽ പറഞ്ഞു. 

BRS ന്‍റെ 10 വര്‍ഷത്തെ ഭരണത്തിന് വിരാമമിട്ടുകൊണ്ട്  119 അംഗ നിയമസഭയിൽ 64 സീറ്റുകൾ നേടിയാണ് കോൺഗ്രസ് തെലങ്കാനയില്‍ വൻ വിജയം നേടിയത്.

തെലങ്കാന കോൺഗ്രസ് അദ്ധ്യക്ഷന്‍ രേവന്ത് റെഡ്ഡി സംസ്ഥാന കോൺഗ്രസ് പാർട്ടിയ്ക്ക് ശക്തമായ അടിത്തറയാണ് നല്‍കിയിരിയ്ക്കുന്നത്. വെറും 6 വർഷം മുന്‍പ് പാർട്ടിയിൽ ചേർന്ന  56 കാരനായ റെഡ്ഡിയുടെ ഉയര്‍ച്ച വളരെ വേഗത്തിലായിരുന്നു. 

കോണ്‍ഗ്രസ്‌  സംസ്ഥാന ഘടകത്തിന്‍റെ വർക്കിംഗ് പ്രസിഡന്റും പാർലമെന്‍റ് അംഗവുമായി അതിവേഗം ഉയർന്നു അദ്ദേഹം. നിലവിൽ തെലങ്കാന കോൺഗ്രസിനെ നയിക്കുന്നത് അദ്ദേഹമാണ്. റെഡ്ഡിയുടെ നേതൃത്വ ശൈലി പ്രശംസയും ഒപ്പം വിമർശനവും നേടിയിട്ടുണ്ട്. പ്രത്യേകിച്ച് സ്വന്തം പാർട്ടിയിലെ അംഗങ്ങളെ പരസ്യമായി വിമർശിക്കാനും അദ്ദേഹം മടി കാട്ടാറില്ല എന്നത് തന്നെ.  കോണ്‍ഗ്രസ്‌ പാര്‍ട്ടിയില്‍ ചേരുന്നതിനു മുന്‍പ് TDP യില്‍ അംഗമായിരുന്ന അദ്ദേഹം രണ്ട് തവണ  എം‌എൽ‌എയായിരുന്നു.